الموضوع: انطباعات عن الماروتى بعد 5 آلاف كيلومتر

المشاركة الأصلية كتبت بواسطة sab3aawy

8-اما اخطر عيوب هذة السيارة على الاطلاق فهو عيب اجتماعى وليس فنى، هو "الاستهياف"، قيادة هذة السيارة على الطريق هو نوع من انواع الصراع المستمر من اجل البقاء، 75% من سائقى السيارات على الطريق لا يتعاملون معك على انك راكب سيارة ولكن على انك راكب قبقاب باتيناج ،مجرد حشرة يمكن فعصها والاستمرار فى القيادة بدون ادنى تأنيب ضمير،وكل واحد مديره منكد عليه او المدام ضارباه فى البيت او راح ضمن ابنه فى القسم امبارح بيطلع كل عقده وقرفه عليك، والاسلوب الوحيد لقيادة هذة السيارة والوصول الى مبتغاك بدون خسائر هو الأسلوب الaggressive ، لكن بغيرالأسلوب ده الناس بتوصل بيها السفالة انها تخبطك بالقصد لمجرد انهم مستهيفين العربية

أسلوب باشمهندس سبعاوى الساخر الرائع الذى يصف كل ما تمر به بكلمات بسيطة دقيقة تأخذك من قمة تركيزك الى ارتسام بسمة عريضة على وجنتيك.

تحليل رائع كالمعتاد.

جزاك الله خيرا.

رائع وتقيم جميل وبسيط يا بشمهندس سبعاوى
وخصوصا الجملة الأخيرة فى التعليق
بس بصراحة انا بحب العربية دى جدا جدا

المشاركة الأصلية كتبت بواسطة m000dy

بعد اذنك يافندم
عاوز اعرف وضع العربيه دى فى الصيف ايه
يعنى فى وقت عندى ببقى مسافر للقاهره وبوصل فى عز الضهر وطبعا انت عارف الزحمه بتسخن عربيات اد ايه وكله بيبقى واقف وفاتح كبوته وخصوصا على الكبارى لو كانت واقفه وكل شويه دبرياج اولانى وتفصل ودبرياج اولانى وتفصل ودبرياج اولانى وتفصل
فطبعا حرارة العربيات بتعلى
ايه النظام بالنسبه لدورة تبريد الماروتى فى الحالات اللى زى دى
ومن ناحيه تانيه ياريت حضرتك تقولى ايه نظامها فى السفر عشان مش عارف اخد رد نهائى من حد ناس تقول بتسافر زى الفوريره وناس تقول مابتستحملش سفر والهوا لو فى وشها يبقى معاكر ربنا على ماتوصل
وياريت لو عند حضرتك معلومه عن الموديلات المستعمله يعنى لو الواحد هايجيب العربيه دى مستعمله يفكر فى موديلات ابتداء من سنة كام عشان مايكونلهاش مشاكل مع مراعاة حالتها طبعا

بالنسبة لموضوع الصيف فأنا اعدك ان شاء الله انى اجاوبك عليه اول ما ييجى الصيف لانى اشتريتها فى آخر شهر 10 الماضى ولسة مجاش عليها صيف معايا

اما بالنسبة لموضوع السفر فأوكد بشدة انى خدتها على الطريق الصحراوى من القاهرة الى الاسكندرية(الهوا فى وشى)بسرعة مابين 100 و 120 وزودت احيانا الى 140 للحظات قليلة للتجربة، بدون اى مشاكل، وكنا فردين من الوزن فوق المتوسط فى العربية،لا مشاكل فى التسارع ولا مشاكل جمة فى الثبات على الطريق، يعنى مثلا انا كنت مطمن وانا جوها وحاسس انى مالكها ومتحكم فيها اكتر من لما كنت بسافر بالشاهين اللى كان الهوا على الطريق بيؤثر على ثباتها اكتر من الماروتى، والمسافة اخدتها من البوابة للبوابة (160 كيلومتر للاتجاه الواحد)فى ساعة ونص رايح وساعة ونص راجع وكنت باشد مع الناس على الطريق وباخد غرز وبهدى علشان غير يعدى وارجع اجرى تانى زييى زى اى عربية ماشية على الطريق بدون اى مشاكل

عرض ممتاز للعربيه
بس العربيه ديه بلذات ليها مشكله معايا انا مش بعرف اقعد فيها خالص
انا طولى 187 cm ركبت فى الكنبه مره لمده 5 دقايق كنت هموت من الزنقه
لى استفسار العربيه ماتورها 800cc مش المفروض استهلاك البنزين يبقى اقل من كدا

اولا احب اشكر ابو السباع على و صفه وتعليقه على السيارة و كمان على اضافة الابتسامة الينا - اسعد الله ايامك كلها .
ثانيا فعلا العربية دى شغلت تفكيرى فترة طويلة قبل لما اشترى اللادا و فرقت معايا علشان الشنطة نظرا للاحتياج اليها دائما - وكذلك اختلاف الاراء عليها ما بين مويد جدا لها اومعارض شديد لها .