الموضوع: العربية بتنتش تاني

التى بى اس هو حسار وضع صمام الخنقthrotle position sensor او بالبلدى كدة حساس دواسة البنزين، يعنى هو اللى بيحس انت دايس بنزين قد ايه، وهو فيه 3 منظومات، منظومة للاحساس انت دايس بنزين قد ايه ودى عبارة عن potentiometer، او بالبلدى حاجة زى زرار تعليه الصوت بتاع الراديوهات القديمة كدة، كل ما يلف يدى اشاره اعلى لكومبيوتر السيارة، ومنظومة تانية للاحساس انك شرلت رجلك من على البنزين عبارة عن limit switch او مفتاح كهربى بسيط ييلمس ويوصل التيار لما تشيل رجلك من على البنزين ، ومفتاح تانى زيه بيلمس ويوصل تيار لما تدوس بنزين على الآخر ، الموتور بينتقل من مود التحكم بالدواسة الى مود السلانسيه لما المفتاح بتاع (انت شايل رجلك) يوصل التيار لكونترول السيارة وبالتالى الكونترول بيعرف انك شايل رجلك من على الدواسة

التى بى اس على بعضه عبارة عن حتة اسطوانة بلاستيكية سوداء صغيرة فى حجم غطاء جركن الزيت، موجود على اعلى جسم المحرك فى المنطقة المسماهthrotle body اللى هى عند نهاية خرطوم الهواء اللى جاى من فلتر الهواء رايح للموتور، هتلاقيه ورا الثروتل بادى ، بينه وبين جدار كابينة القيادة وراكب فيه فيشتين واحدة زرقاء وواحدة بنى، الزرقاء تخص حالة ضغط الدواسة والبنى تخص النهايتين(شايل رجلك او دايس على الآخر)

الهم، اية اللى انت ممكن تعمله مع التى بى اس،

1- اولا تعليم السيارة مكان السلانسيه وده كما هو وارد فى اقتباس largeman


(وده الموضوع بالكامل لمزيد من الفائدةhttp://www.nilemotors.net/Nile/showthread.php?t=30026)

2-ضبط وضعية التى بى اس، وده عن طريق تهوية المسمارين مقاس 7 اللى رابطين التى بى اس فى جسم المحرك ولف التى بى اس مسافة قصيرة جدا (لا تتعدى المللى متر) لليمين او اليسار ثم اعادة ربط المسامير، اقترح عليك ان لو عمليه التعليم مجابتش نتيجة انك تلف التى بى اس مسافة مللى متر واحد عكس عقارب الساعة(يعنى النص الفوقانى من التى بى اس يلف يروح ناحية يمين السيارة، يعنى الناحية اللى مش فيها الديريكسيون) وجرب بعد كدة وقول لنا ايه الأخبار

شكرا يا جماهة على الاهتمام لكن بصراحة انا مابحبش اضبط اي حاجة في العربية من ساعة ما اشترتها
وانا متاكد ان المعلومات والنصائح منكم كلها هامة ومفيدة لكن ليه التوكيل ماعملش كدا مع انه كل مرة باروح له مابدفعش حاجة على الضبط ولا هما ماعندهمش فكرة
- المهندس سبعاوي ياريت تنصحني بتوكيل نيسان كويس اروح له ويكون مضمون

المشكلة فىالعيوب التى لا تظهر بسهولة وفى كل لحظة هى فرق الاحساس بين القائم بالاصلاح ومالك السيارة، القائم بالاصلاح يقوم بعمل ضبط(ستاندرد) ثم يجربها لفة فاذا اختفت المشكلة فى هذة اللفة اعتبر ان عمله انتهى، وهذا امر متكرر عند كل الميكانيكية وكل التوكيلات، ولا يمكن ان نعيبه عليهم لأن هذا هو ما بيدهم، هو معندوش فيشة الكترونية يحطها فى العربية تقول له ان الفتيس بطل ينتش، هو بيظبط حاجة معينة ويطلع يجرب مرة واحدة ، ولو لقاها اختفت خلاص، لذلك استيعابك للمشكلة وتاريخها وما تم بشأنها بيكون مفيد جدا لتوجيه التوكيل للعمل طالما انت مش بتحب تظبط بايدك

لذلك انصحك انك تروح التوكيل وتقول لهم ان حصل النتشة وانت رحت لهم نضفوا التى بى اس والنتشة رجعت تانى بعد فتره، فهل ممكن يكون التى بى اس محتاج ظبط، او حاصل ان التى بى اس بيسلم للسلانسيه بدرى او متاخر وبالتالى السلانسيه محتاج ظبط، هل بلف الأيدك محتاج يتنضف، ناقى معاهم المشكلة علشان تفتح امامهم سكة الحل

انا متعاملش غير مع مودن موتورز والسبع وبصراحة شايف ان السبع ادائهم احترافى جدا عن مودرن موتورز، سواء فيما يتعلق باسلوب التعامل مع العميل او خدمة السيارة، انا لحد النهاردة بتعامل مع مودرن موتورز علشان العربية السوزوكى، وشايف ان اسلوبهم حكومى جدا ، زحمة موت وناس مش فاضية تسمع منك اساسا واسلوب التعامل هو تنويعة على لحن"هو كدة، عاجبك وللا راسك والحيط" ، لكن مقدرش افتى بشان باقى مراكز الصيانة، بس النصيحة استمر فى محاولة حل المشكلة مع السبع، لأن العيب مش من عندهم لكن العيب ان هذة المشكلة بتاخد تجارب كتير لحلها