الموضوع: حوار من القلب للقلب - الجزء الثاني

س1: اية الى بيكون معاك فى جيبك دايما وانت خارج ؟
ج1: مفاتيحي(مفاتيح الصيدلية -مفاتيح العربية-مفتاح البيت-الموبايل-المحفظة بما فيها من كارنيهات ورخصة العربية ورخصتي الخاصة والبطاقة-وعلية السجاير والولاعــة-والاب توب).

س2: امتى اخر مرة اتمنيت امنية وكانت اية ؟
ج2: إمبارح بس ..إتمنيت إن الزمن يرجع بيا 5 سنين لورا..كنت هعمل حاجات كتير أوي ..وحاجات أكـــــــــــــــتر مكنتش هعملها.

س3: اية الهدف الاسطورى الى نفسك تحققة وحاسس ان طريقة صعب؟
ج3:نفسي أعيش وسط ناس ماتسرقنيش


س4: نفسك يكون اول مولود ليك ولد ولا بنت (طبعا الموضوع بيد الله ) بس عاوزين كلمة ؟
ج4:بالنسبة للموضوع ده بالذات ..أنا خايف يكون ليا إبن أو بنت
خايف بجد من الأيام السودة إلي إحنا عايشنها ..خايف مايقدرش يعيش وسط الناس زي ما أنا مش قادر أعيش وسطهم

بس طبعا
لو حصل ..أتمنى يكون ولد ..وأسميه عبد الرحمــــــــــــــــــــ ن


س5: لو قلتلك اكتب تاريخ عاوز تمحية من حياتك ؟
ج5:مش فاكر التاريخ بالتحديد ..بس يوم ماشوفت حبي الأول


س6: لو معاك 10 تفاحات وقلتلك وزعهم على 10 من اعضاء المنتدى هايكونوا ميين ؟ (10 بس)
ج6: هخدهم ليا لوحدي ..مش طمع
بس علشان محدش يزعل


س7 : اكتب اسماء الاعضاء الى بترتاح معاهم واوصف كل واحد بكلمة واحدة بس ؟
ج7:
1.محمد أوكتوووو : أكبر من سنه
2.محمد سمير:محترم جدا
3.محمد شنوري: جماهيري
4.م/محمد غازي : متواضع
5.أبوصلاح:إجتماعي
6.محمد عزت(أبو إياد): خــــدُوم
7.م/مصطفى مهـــران :محترم للغاية
8.إسلام إسلام :مشاغب
9.أحمد ياقوت : محترم جدا جدا
10.مدام نور : عقل له إحترام
11.د/بحري : مضياف
12.بسكوتة: بسيطة


ومش عاوز أنسى حد ...إلخ


س8: لو عاوز تغير لون عربيتك هايكون اية ؟
ج8 : أســـــــــــود


س9: انت نفسك مرتبك الشهرى (او دخلك عموما ) يكون كام علشان يكفيك انت لوحدك (يعنى بتصرف قد اية شهريا) ؟
ج9: أنا مصاريفي الشخصية حوالي 1500 -2000 شهريا
معظمهم حاجات هبلة وهايفة ..خروجات أو إكسسوارات للعربية
وأنا أتمنى يكون دخلي مش أقل من 10.000 شهريا لو إتجوزت ..علشان أعرف أعيش كويس زي الناس


س10 : اية القسم الى تحب انة يتحذف من المنتدى ؟
ج10 : قسم الأخبار المنقولة ..حاسس إنه ملوش لازمة


س11 : اية القسم الى تحب تضيفة للمنتدى ؟
ج11:قسم يكون فيه تعديلات السيارات بشكل منظم ..ويكون مدعم بالفيدوهات من وضع الإدارة ..وليس من مشاركات الأعضاء
وكمان

قسم أدبي وفني .........نفسي بجد يكون فيه قسم هنا كده
بس أنا عارف إن ده بيتعارض وطبيعة المنتدى كمنتدى سيارات


س12 : لو قلتلك اطلب من عضو هنا رقم تليفونة هاتطلب رقم مين؟
ج12: صدقاً
محمد أوكتووووووووو


س13: اية المحافظة الى فى مصر تحب انك تستقر فيها ؟
ج13: أي مكان هادي وبعيد ..بشرط يكون ليا فيه شغل
يعني مثلا
لو عندي صيدلية في مرسى مطروح ودخلها 10.000 شهريا
هروح من الصبح
مش علشان الفلوس أساسا..بس علشان العزلة والهدوء
وهناك مش هيكون صعب إنك يكون عندك فيلا في مكان هادي
يعني ..مرسى مطروح أو العريش
أو أطراف الإسكندرية


س14 : اية رأيك فى جملة ( القلب يحب مرة ..مايحبش مرتين) ؟
ج14:صحيحة 100 %
أول مرة بيكون إسمها حب ..وبتوجع أوي أوي لو ماكملتش
ولو حصلت تاني بعد كده
صدقني
مش بيكون حب ..ممكن يكون إعجاب
إحتياج لحد في حياتك
إحتياج عاطفي
أو ممكن تكون بتضحك على نفسك ..لكن مش هيكون حب بالتأكيد


س15 : لو قلنا ان بين الحب والاعجاب خط رفيع ..اية هوة الخط دة بالنسبة لاحمد فارما ؟
ج15:الإعجاب بيكون بشئ ظاهري
جمالها ..لبسها ..إحترامها
يعني الإعجاب بيكون له سبب ظاهر
إنما -إلي مايتسماش- الحب ملوش سبب
يعني بتحبها
بتحبها كده وخلاص ..


س16 : لو قلتلك اختار عربية موديل قديم تحت سنة 1980 هاتختار اية ؟
ج16: فـــــــــــــــورد موستاااااااااانج


س 17 : عاوزين كلمة توجهها لشخص جرحك اوى ؟
ج17: لو تقصد البنت إلي كانت حبي الأول
هقولها :" وحشتـــــــــــــــــــــ ـــــــــــــــــــــيني"

ولو أي حد تاني
هقوله :" سلف ودين"


س18: كلمة لشخص كنت فاكرة صديق بس طلع عدو ؟
ج18: المفروض إني هتجاهله نهائيــاً ..ولا كأني كنت يوم أعرفه
بس لو هقوله كلمة
هتبقـــــــا :" إنت كده مبسوط وراضي عن نفسك؟؟"


س 19 : كلمة اخيرة للمنتدى ؟
ج19: إحترام وتقدير
للمنتدى بأصحابه وأعضاءه
أنا فعلا شوفت منتديات كتير ..وصدقــاً
مافيش منتدى مصري أو غير مصري ..زي منتدانا هنا
هنا جدية ..صداقة ..حب


س 20 : كلمة عن نفسك ؟
ج20 : أقول إيه؟؟
ساعات بحس إني أهبل وعبيط ..والإحساس ده بيجيلي من تعاملي مع الناس
بس ساعات بقول لأ ..ده مش هبل ولا عبط
ده تسامح وطيبة
أنا -زي ماإنتوا عارفين- بكتب شعر
ويمكن محدش يعرف إني برسم بورتريهات..
وبحب صيد العصافير ..وبعش صيد السمك

وبموووووووووووووووت في السواقة بالليل وأنا مشغل أم كلثوم أو عبد الحليم
مش بحب التعامل المباشر مع الناس
تعرفوا
أخلاق الناس إتغيرت ..
أقصد بالتحديد
الناس دلوقتي بقت طماعة ..وإلي يطول يدبح التاني علشام الجنيه ..هيدبحه
وأقصد كمان الحسد وعيون الناس

يعني تصدقوا
واحد كان عليه شكك للصيدلية بقاله حوالي سنة ..ومش مبلغ كبير ..كان 150 جنيه
البنت إلي شغالة معايا راحتله تكلمه عليهم أكتر من مرة
وأخر مرة (بعد لما بعت العربية الدايو وإشتريت الانسر)
بيقول للبنت بالنص:" يعني البيه لسه مغير العربية ..وكمان عاوزين فلوس"



.