الموضوع: نــويبـــع ، الوجة الأخر لمصر

السلام عليكم ورحمة الله

إليكم رحلة نويبع فى أجازة العيد

إليكم مصر الرائعة اللى الناس بتجيلها من أخر الدنيا

الطريق طبعا حوالي 500 كيلو من القاهرة السويس ثم النفق وشوية جنوبا لحد التقاطع وبعد كدة شمال طريق نخل ثم التمد ثم النقب
ومن النقب يمين نويبع أو شمال طابا والوصلتين 100 كيلو
بمجرد عبور النفق الطريق كلة يا طالع يا نازل قليل لما تمشي شوية مسافة معدولة

والطريق نويبع طابا 60 كيلو متر يعنى اللى يروح واحدة منهم لازم يروح التانية لأن 60 كيلو دول ممتعين جدا ومش مسافة اصلا


رجاء الأنتظار فترة كويسة لتحميل الصور لأن حجمهم أكثر من 20 ميجا
دول قعدت انقي فيهم طبعا من بين صور كتير جدا علشان الحجم


بداية بصورة لعزيزة فى محطة وطنية قبل النفق بشوية
شدي حيلك
ودة أول مشوار طويل جدا وتجربة حقيقية ليها من بعد ما جبتها قرابة الأربع شهور مع انها بقت عاملة ييجى 11 الف كيلو فيهم بس كلهم سفر عادي
الأسم السابق كان كعبيرة (ودة اسم بيطلقة ولاد اختي على أى هاتش باك وبخاصة الماتريكس) ، لكن بعد المشوار دة بقت اصيلة وعزيزة وكلة ماشي



وبمجرد عبور النفق اللى على اسم الشهيد أحمد حمدي الله يرحمة والواحد بتاخدة حالة من الشجون وذكريات أيام الحرب ورمل سينا اللى مروي بالدم


بعد ما عدينا النفق وخدنا طريق نخل و مفاجأة غير سارة .. وصلة متكسرة ، بس الحمد لله طلعت مش طويلة قوي لأن أخر مرة روحت كان فى 40 كيلو متر كلهم متكسرين بالطريقة دي



الطريق طبعا كلة مطالع ومنازل والأسفلت ماشي فى وسطها زى التعبان ومتبقاش شايف هوا رايح فين ولا شايف اللى مقابلك
لكن ممتع جدا
لو بالليل وعربية فوق على المطلع وانت لسة تحت بتكون شايفها كأنها نجمة فى السما


قبل نويبع بحوالي 30 كيلو تقريبا بندخل فى سلسلة الجبال المحيطة بالخليج والممر اسمة وادي وتير ، هوا الممر الوحيد اللى بيعدي سلسلة الجبال هوا و ممر طريق طابا هتشوفوة فى الصور الأخيرة


كل ما بنتعمق فى الوادي بيكون الطريق أضيق وجنب حرف الجبل وملفات بتقرب على 180 درجة




شجرة من اللى بيطلعو فى الحجر وسبحان الله معرفش بتجيب مياة منين !
سبحان الله العظيم


والملفات بتزداد حدة


نخيل كتير منتشر بطول الوادي ، وكان فى ينابيع مياة كتير بس للأسف مش عارف راحت فين





لا تعليق غير سبحان الله


وقلنا ننزل نتصور ، وصورة لعزيزة قاهرة الصحراء
الصراحة انا طول عمرى بكرة اليابانى بس العربية دى كنت مقتنع بيها علي قد الفلوس اللى فضلت معايا بعد الانوس بس بعد المشوار دة ابتديت احبها
كتر خير الدنيا 1000 سي سي وعمرها 18 سنة وما شاء الله ولا الهوا
و90% من العربيات فى سيناء كلها تويوتا على فكرة لاند كروزر لزوم السفاري و نص نقل تويوتات معشوقة البدو (الأربعة شنكل تحديدا علشان بتسكر العداد من غير ما تعوم زى ما البدو بيقولو) و الأتوبيس الكوستر والميكروباصات
تويوتا هتحتل سينا قريب


طبعا الطريق اول ما تدخل نويبع وانت نازل منحدر بين الجبال بيكون البحر فى وشك بس الصورة دى لما تدخل يمين وبتوضح المسافات للمدن القادمة
لما بتدخل يمين كدة بيوديك على الميناء ، وشمال على المدينة نفسها والقري السياحية جنبها


منظر الشروق من القرية وطبعا الشمس بتطلع من الناحية التانية من وراء جبال السعودية اللى ظاهرة بوضوح لأن الخليج صغير
يعنى قدامك بحر وجبال و وراك سفح الجبل وبعدين جبال برضو
قمة المتعة


ودة المشهد الخلفي اللى ورا القري السياحية



صورة مع عزيزة قدام الشالية
لا مؤاخذة مكشر بس الشمس حامية


صورة للقرية المجاورة وهيا كانت مملوكة لرأفت الهجان
ومفيش قري كتير على فكرة هما كلهم بتاع 4 ولا حاجة والشواطئ مفتوحة على بعضها
والدنيا كانت رايقة جداااااا القرية بتاعتنا مكانش فيها حد غيرنا وكنا مبرطعين هههه
للأسف السياحة نايمة هناك خالص


صورة تانية للشط
وكدة الموج كان عالي يا عينى ارتفاعة من 10 الي 20 سنتيمتر مع الأعتذار للوحش الأبيض الهائج دائما


عيلين من البدو بيبيعو مشغولات من اللى بيعملوها خرز وخشب ، الكل فاكرنا سياح وبيقولو وان دولار ، ابويا قالة وان باوند الواد قالة ماشي هههههه وخدنا شوية بخمسة جنية :P



عزيزة بالبكيني قدام الشالية بتاخد حمام شمس



يتبع .......