الموضوع: عضو جديد فى منتدى تويوتا

الف مبروك يا بشمهندس خالد
ربنا يبارك لك فيها ويفكيك شرها

المشاركة الأصلية كتبت بواسطة se_coralsea

باشمهندس / خالد

طيب أيه رأيك أو تقييمك للفتيس ال mmt و هل هو وحش فعلا زي ما الناس قالت و لا هما اللي مش متعودين عليه ؟

مع خالص تحياتي و عميق تقديري
م/ سمير الشهاوي

هو الجير الى mmt اختلفت فيه الآراء، ما بين اقصى اليسار الذى يرى ان ال mmt هو سقطة تكنولوجية لتويوتا واقصى اليمين الذى يرى ان ان الmmt نجاح ساحق لتويوتا لكن احنا اللى مش فاهمينه، أما الأمر الذى يختلف عليه اقصى اليسار واقصى اليمين هو ان الmmt مفهوم مختلف للقيادة يختلف عن مفهوم الجير الأوتوماتيكى الكوكبى التقليدى، بمعنى ان قيادته اقرب لقيادة المانيوال من قيادة الأوتوماتيك، او بشكل اخر كانه مانيوال بدون دبرياج ويمكنك ان تحوله الى مود يقوم فيه بالنقل طبقا لضغطتك على البنزين، لكن فى كل الاحوال انت اللى بتتحكم فى النقلة بشكل كبير جدا، وبالتالى فان التعامل معاه ليس سهلا لمعتادى الفتيس الأوتوماتيك بطريقة دوس بنزين تمشى دوس فرامل تقف، لكن هو محتاج لمن يحب القيادة ارياضية ولديه حساسية عالية لمفهوم النقل والغيارات، وانا اتصور ان تويوتا طورت هذا الجير فى الأساس للأوروبيين، عاشقى المانيوال كارهى الأوتوماتيك ، واللعبة تعتمد بشكل كبير على قدرة السوفت وير الموضوع على محاكاه مطالب سائق السيارة، لكن يبدو ان السوفت وير الذى ظورته تويوتا ومعدات نقل الحركة احيانا ما لا تعطى الاستجابة التى يتوقعها السائق، على الأقل فى موديل 2008 الذى قمت انا بتجربته،ولذلك فهناك سائقين يتآلفون مع هذا الجير ويحفظون ردود افعاله ويسعدون به وهم بالأساس من محبى القيادة الرياضية، وهناك من لا يتآلفون معها وهؤلاء بالأساس من يبحثون عن مواصلة ناعمة هادئة مريحة سهلة القيادة تحملهم من البيت الى العمل وبالعكس

ده ملخص القصة من وجهة نظرى

المشاركة الأصلية كتبت بواسطة mahora

نقطة اخرى يا ابا السباع...... عرفنا اسبابك لتفضيل الكورولا على السيفيك..... لكن ما هى اسبابك لتفضيل الكورولا على الاوكتافيا؟

اللى انا اكتشفته فعلا فى هذة الفئة ان الفروق التى تحسم الاختيار هى فروق ضئيلة جدا لان هذة السيارات ليست لها مشاكل جمة
لذلك انا ممكن تكون النقاط اللى انا شفتها نقاط تميز للكورولا ممكن تكون نقاط رفض لدى البعض الآخر من الناس

1- موتور الكورولا اكثر تطورا 2 كامة-16 صباب- vvtويعطيها تسارع متميز فى السرعات المنخفضة والمرتفعة، فى حين ان محرك الأوكتافيا التقليدى لا تظهر امكانياته سوى فى السرعات العالية فقط وانا معظم حركتى فى طرق لا تسمح بالوصول لهذة السرعات
2- كورولا الجديدة مطورة منذ 2008 بشكل كلى عن الموديل السابق، فى حين ان الفانتازيا ماهى الا تعديل محدود على الa5 التى كانت بدورها تعديل غير مبالغ فيه على a4
3- تويوتا من اكثر السيارات التى يفهم فيها ميكانيكية مصر كلهم بعد ظهور الموديل بسنوات بسيطة، وهذا يعطيها خط آخر من الدعم الفنى بجانب التوكيل ويعطيها قبولا متميزا فى سوق المستعمل
4- التكونولجيا اليابانية عموما تكنولوجيا غير معقدة ، تعتمد على فكرة السهل الممتنع او بصيغة اخرى: انا هديلك اللى انت عايزه بدون زيدة لكن فى نفس الوقت بدون تعقيد وبدون تكلفة تشغيل خارج طاقتك
5- الكورولا أهدأ صوتا من الأوكتافيا
6- مميزات الأوكتافيا عن الكورولا لم تؤثر فى تأثير مميزات الكورولا، يعنى مسألة عزل صوت الشارع الرائع والاحساس بالمتانة الاوروبية لم تكن مسائل جذب عالية بالنسبة لى

دى اسباب عامة: لكن هناك بعض الأسباب التى قد تكون خاصة بالنسبة لى

1-شكل الكورولا كتنسيق عام -او بصورة اخرى منظر الاطار العام للسيارة من على بعد 20 متر، بعجبنى اكتر من شكل الاوكاتفيا اللى بحس انها وش موديل 2010 متركب على جسم موديل 2004 متركب عبى شاسيه موديل 2000، لكن طبعا الشكل ده مسالة اذواق
2- الأوكتافيا مش بتليق غير فى الاسود وانا مش بحب الاسود
3- مركز صيانة تويوتا جنب البيت
4- اسم تويوتا ايجبت وتاريخها يطمئننى اكثر من اسم توكيل سكودا الذى يعيش على موديل واحد هو الاوكتافيا
6- بحب شكل علامة تويوتا على الديريكسون قدامى اكثر من شكل علامة سكودا
7- اسم تويوتا فى عينى اكبر من اسم سكودا، حتى ولو اعتبرنا ان سكودا تمتلكها فولكس فاجن يبقى برضه اسم سكودا ميتقارنش باسم تويوتا لكن يتقارن مع اى اسم من الأسماء الأقل شعبية عالميا التى تمتلكها تويوتا مثل دايهاتسو او سوبارو
8- احساس عام بان السكودا يوم ما يجرالها حاجة انا هحتاس، لكن الكورولا ومن تجارب الأزمة السابقة الناس كلها بتصلحها بملالليم تحت السلم بعد ما تقدم شوية وتحتاج لاصلاح

هى كلها اسباب وبسيطة ورؤية قد تكون شخصية اكثر منها موضوعية لكن كان لها عامل كبير فى حسم اختياراتى

المشاركة الأصلية كتبت بواسطة migo123

بصراحه انا لسه عند رأيي في ان اسعار الياباني في مصر مبالغ فيها جدا
مش معنى ان المنافسين اسعارهم زادت ان الكورولا بقت بسعرها الحقيقي
طيب بغض النظر عن فكره الفتيس الاتوماتيك بص على فيات لينيا وشوف الكماليات والسعر دلوقتي هتلاقي كماليات أعلى بكتيير وبفرق سعر 35 الف جنيه (لينيا تربو جميع الكماليات) ... بص على الميجان اللي ب 145 وقارن الكماليات ... بص على الجيتا اول فئة ب 150 تقريبا وقارن .........
انا مش بشكك في اختيارك للكورولا :b4_388:..... بالعكس انا عندي رأي انها من اقوى واريح اللعربيات في فئتها ........ بس لو على سعرها ... لسه برضه مبالغ فيه

هو مش اليابانى بس اللى سعره غلى، كل العربيات سعرها غلى، انا هنا مش عايز ادخل فى حسبه كورى ويابانى التى قد تسبب مذبحة كما جرت العادة، لكن انا ببساطة شايف ان لما تكون السيراتو ب 126 ألف والكروز بنفس السعر تقريبا وانتظار شهرين او 3 على ما تستلم يبقى ال 145 ألف مش خسارة فى الكورولا تسليم فورى، شفت سهلة ازاى؟ اما العربيات اللى انت اقترحتها مثل اللينيا او والميجان ففيه عامل هام جدا انت مخرجه من الاعتبار هو ان ما لدينا من هذة السيارات هى تصميمات الاوروبيين بيعملوهالنا مخصوص (أحنا اللى هو مش بس المصريين يعنى لكن كل الدول اللى زى ظروفنا زى مصر وتركيا والبرازيل والهند)، يعنى اللينيا دى لن تجد منها واحدة فى ايطاليا كلها لأنها ببساطة عبارة عن جراند بونتو بشنطة ، وهو نموذج غير مقبول فى اوروبا، ومثلها الميجان ام شنطة وامثلة كتيرة كلها سيارات تصنع بمواصفات خاصة للتسويق فى دول بعينها ، لكن الكورولا بتتعمل فى كل مكان بنفس الاطار العام للمواصفات مع فروق كماليات فقط، وبالتالى هى تتقارن بالأوروبى ذو المواصفات العالمية مثل ال 307 والأوكتافيا والبرافو، لو بصيت على العربيات دى هتلاقى انهم بنفس رينج الأسعار او اعلى كمان

الف مبروك عليك الكرولا يا باشا ومبروك علي منتدي التويوتا بيك.انته شخصيه محترمه وتستاهل كل خير.
bemo,ire