عضو جديد تيداوي في منتدى النيسان ..

**_vivo_** · 11-08-2011 03:57 PM

السلام عليكم و رحمة الله ..
أولاً أحب أتعرف على السادة أعضاء المنتدى بعد إذنكم يعني و إسمحوا لي أنضم ليكم في أسرة نيسان ..
أنا إن شاء الله إشتريت تيدا هاتش باك بلس .. بس من غير فتحة سقف و دا لأن أبويا لسة عايش في أن فتحة السقف عيب مش ميزة بس الحمد لله يعني الراجل عمل اللي عليه و زيادة ..
بس لسه ماستلمتهاش .. و مأجل موضوع الإستلام ده شوية على ما أظبط الجراج .. عشان خايف أركنها في الشارع بأمانة لأن أتعلم عليا قبل كده بسبب الموضوع ده ..
أنا كنت ناوي أجيب اللون الأحمر بس للأسف لقيت إن العربية معدش بينزل منها غير الأسود و الفضي و الشامبين .. و إن الأحمر و الأزرق معرفش راحوا فين ..
طولت عليكو بس معلش بأه إستحملوني ..
كنت بس حابب أعرف من السادة ملاك التيدا و أنا بستلم لو في أي ملاحظات أو أي حاجة أعملها عشان أتجنب أي عيوب ممكن تظهر كده في الأول ..
و لكم جزيل الشكر ..

**SonaSteel** · 11-08-2011 07:14 PM

لولا انك سألت ملاك التيدا .... كنت هاجاوبك :))
بس المرة الجاية بقي :P:P
--------------------------------
ولا أقولك سماح المرة ديه :))
اولا الف الف مبارك عليك وربنا يرزقك خيرها ويكفيك شرها .... وقول للحاج الله يسامحك وربنا يخليهولك :))
ثانيا بقي .....عايز تعيش مع اللينك ده
نصايح
هتلاقي فيه الخير كله ان شاء الله
واي سؤال تاني ..... استني بقي ملاك التيدا ههههه
وخاصة ان صاحب اللينك هو عمدة الصقور ...... وحظك ان معاه تيدا :)))))))

**Ahmed.TV** · 11-08-2011 11:48 PM

الف مبروك عليك التيدا .. واهلا بيك صقر معانا من صقور نيسان

عربية محترمة جدا وربنا يكيفيك شر الطريق

موضوع تركز على ايه فى الاستلام وما بعد الاستلام كله موجود فى الموضوع اللى حطلك لينكه حسين .. والموضوع ده حيفيدك

وبعدين انت مقولتش حتستلم منين .. لو من موزع معتمد يبقا اطمن ومتقلقش حيشرحولك كل صغيرة وكببيرة فى العربية

متشغلش بالك باى اسئلة او مشاكل ميكانيكية فى العربية .. لان العربية اعطالها قليلة جدا .. واتمتع بيها

والف مليون مبروك

تحياتى

**Bishoy.Girgis** · 12-08-2011 09:13 PM

الف مبروك عليك مقدما يا باشا العربية الجديدة و مبروك علينا صقر جديد من صقور نيسان

**mohaismail** · 12-08-2011 09:45 PM

الف مبروك ى باشا عربية محترمة جدا وصعب جدا تشتكى منها وتقريبا ملهاش عيوب وربنا يباركلك فيها
وبخصوص اللون شوف انت ساكن فين ومشاويرك فين لو بتمشى فى طرق نضيفة ومفهاش تراب كتير هات الاسود لانه شيك جدا لو غير كده هات فضى .

**zenda** · 13-08-2011 08:41 AM

اللون الأحمر موجود للتيدا شايفة امبارح عندنا فى الاسكندرية عند موزع نيسان احمد مرعى كانت هاتشباك بس بفتحة سقف :d
انما اللون الازرق هو اللى فعلا مش بينزل.