مستعمل نضيف ولا زيرو

**ovelia** · 03-12-2007 11:17 AM

السلام عليكم

يا جماعة أنا محتارة بقالى فترة كبيرة ومش عارفة أعمل ايه. أنا جبت 128 زيرو من سنتين وباختصار طلعت عينى. أنا ساعتها قلت أى عربية زيرو هتبقى أرحم من المستعمل، بس بعد كده أكتشفت أن ال 128 الجديدة دى تقريبا عربيات قديمة ومجددنها. كل شوية تطلعلى بحاجة غبية وتحرق الدم. صحيح هيه كلها حاجات بسيطة بس بتحرق الدم.

المهم انا بما انى مليش فى البهدلة عايزة اجيب عربية متروحش للميكانيكى أصلا. بس المبلغ المتاح هو 55000 فمش عارفة اجيب لانوس أو فيرنا 2006-2007 استعمال نضيف ولا اقرص على نفسى شوية وازود 10000 واجيب برضه لانوس أو فيرنا زيرو وأشترى دماغى

أنا بصراحة كل الناس عمالة تخوفنى من المستعمل حتى لو سنة واحدة وأنا تعبت من حتة الخردة اللى معايا وعايزة أرتاح

ياريت لو حد يقدر يفيدنى

**ecybrarian** · 03-12-2007 11:31 AM

بص كده على اللينك ده
http://www.nilemotors.net/Nile/showthread.php?t=11247

**eng_mkhalaf** · 03-12-2007 11:39 AM

لو مستعملة أستعمال كويس وكيلوميتر قليل العربية هتفضل زيرو
يعنى لانوس عاملة 30 إلف كيلو وعربية موديل مثلا 2006 وصيانة كويسة هتخدم معاكى كويس قوى وتعتبر زيرو

**ovelia** · 03-12-2007 11:47 AM

ميرسى لكل اللى ردوا عليا وياريت لو فى حد عنده رأى تانى يفيدنى بيه يتفضل

**kimo-nubira** · 03-12-2007 11:49 AM

بصي انا من رايي انك تقرصي علي نفسك شويه لان مافيش حد دلوقتي بيبيع عربيته غير لما بتكون فيها عيوب كتير ولما انشاء الله ربنا يكرمك وتجيبي عربيه زيرو ( وانا برشحلك تجيبي لانوس ) مش هاتفكري في تصليح ولا ميكانيكي قبل 5 سنين علي الاقل انشاء الله ... وبما انك بنت ومش حمل بهدله وكل شويه تروحي لمكانيكي ولو العربيه وقفت بيكي في الشارع طبعا بالنسبالك تبقي مشلكه فا باختصار انا رايي تيجبي اي عربيه انتي تحبيها زيرو احسن من المستعمل ... وربنا يوفقك انشاء الله

**tarekkasaby** · 03-12-2007 11:58 AM

الزيرو زيرو مافيش كلام
ممكن بال 55000 تجيبى سبارك او بيكانتو "ازيد شويه" لو مش عايزة عربيه عائليه و لو الشنطه مش مهمه اوى

**ovelia** · 03-12-2007 12:04 PM

المشاركة الأصلية كتبت بواسطة tarekkasaby

الزيرو زيرو مافيش كلام
ممكن بال 55000 تجيبى سبارك او بيكانتو "ازيد شويه" لو مش عايزة عربيه عائليه و لو الشنطه مش مهمه اوى

أنا فعلا فكرت فى السبارك بس خفت منها عشان 1000 سى سى بس ولما سألت على البيكانتو لقينها ب60000 فاضية و 70000 فول أوبشن. بصراحة سعرها كان غريب. فقولت لو فعلا البيكانتو فى الحدود دى يبقى لانوس أو فيرنا احسن بقى. مش عارفة. هو حد سمع حاجة عن السبارك؟

**ovelia** · 03-12-2007 12:10 PM

المشاركة الأصلية كتبت بواسطة kimo-nubira

بصي انا من رايي انك تقرصي علي نفسك شويه لان مافيش حد دلوقتي بيبيع عربيته غير لما بتكون فيها عيوب كتير ولما انشاء الله ربنا يكرمك وتجيبي عربيه زيرو ( وانا برشحلك تجيبي لانوس ) مش هاتفكري في تصليح ولا ميكانيكي قبل 5 سنين علي الاقل انشاء الله ... وبما انك بنت ومش حمل بهدله وكل شويه تروحي لمكانيكي ولو العربيه وقفت بيكي في الشارع طبعا بالنسبالك تبقي مشلكه فا باختصار انا رايي تيجبي اي عربيه انتي تحبيها زيرو احسن من المستعمل ... وربنا يوفقك انشاء الله

شكرا ليك. أنا فعلا كنت باميل للزيرو أكتر. بس كنت محتارة بين الفيرنا واللانوس. وكل واحد ليه رأى مختلف. أنا خايفة جدا من الفيرنا عشان الكلام اللى سمعته عن الموتور اللى كان بايظ وأنا عارفة حظى وخايفة أدبس فى واحدة بايظةا. بس برضه فيه ناس تانية خوفتنى من اللانوس وقالت ان الفيرنا أحسن منها. حاجة تحير جدا.

**kimo-nubira** · 03-12-2007 12:32 PM

بصي والله انا لسه كنت بقارن مع اخويا امبارح بين ال فيرنا وال لانوس وال افيو علشان عايز يشتري عربيه ... ومن كتر الكلام اللي اتقال علي فيرنا انها فيها عيوب تصميم و مافيهاش ثبات علي السرعات العاليه بعد ال 100 كم في الساعه تقريبا فبصراحه انا بقلق من عربيه .. وبصراحه اكتر شكل الفيرنا من قدام مش بيعجبني ... وال لانوس انا معرفش انتي سمعتي ايه عنها لاني مسمعتش كلام عليها بلعكس كل الناس بتشكر فيها .. و ياريت تقوليلي انتي سمعتي ايه عن ال لانوس علشان اسال عن عيوبها بارضو

**sherif Anton** · 03-12-2007 12:40 PM

ارشح لك لانوس كسر زيرو ... يعنى مستعملة استعمال بسيط هتكون زي الفل انشاء الله ... ده لو عايزة توفري فلوس ومتخسريش كتيير عند اعادة البيع ... لكن لو عايزة تريحي بالك يبقى لانوس زيرو بس هتضحي بشوية فلوس زيادة. اللانوس سيارة ممتازة ... واسعة ... مريحة ... عائلية ... قطع غيار متوفرة وفي المتناول ... سعر اعادة بيع كويس و سريع