لو الناس معاها فلوس كتير ومفيش جمارك والدخل المادى مرتفع تلاقى الناس كلها بتجيب تويوتا كامرى وهوندا أكورد ونيسان ألتيما والعربيات الفور باى فور كمان زى دول الخليج كده
عرض للطباعة
لو الناس معاها فلوس كتير ومفيش جمارك والدخل المادى مرتفع تلاقى الناس كلها بتجيب تويوتا كامرى وهوندا أكورد ونيسان ألتيما والعربيات الفور باى فور كمان زى دول الخليج كده
وتلاقى كمان الماركات الغالية بدأت تظهر فى شوارع البلد
صعب قوى لما يبقى فيه عربية 1600 سى سى سعرها معدى 200 ألف جنيه علشان إيه يعنى ، علشان شوية الكماليات ، طيب ما فيه عربيات 1600 سى سى برضه سعرها تحت الـــ 120 ألف جنيه
نرجع لموضوعنا وهو سيارات فورد
سيارات فورد سيارات جميلة جداً واعتمادية ولها معشوقيها ، لكن الناس بيبقى معاها فلوس العربية تلاقيهم بيفكروا فى تويوتا كرولا الشكل الجديد أو لانسر شارك الشكل الجديد
ودى بترجع لنفسية الناس ، لإنه شاف العربية مع واحد من أصدقائه والعربية شكلها عاجبه وهو مبهور بيها ولو فكر إنه يجيب ماركة تانية بيبقى متخيل إن العربية اللى هيجيبها ممكن تطلع أى كلام أو يطلع فيها مشكلة معينة غير متوقعة ويجب عليه الذهاب للتوكيل ودفع المبلغ المعتبر علشان العربية ترجع مية مية تانى زى الاول ، وبعدين يضايق أكتر إنه مجابش زى صاحبه ده وريح دماغه وإن صاحبه ده كان بيفكر صح واختار العربية الصح اللى فيها الاعتمادية وقلة الأعطال
وهو يعينى يفضل موسوس متوقع أى مشكلة ممكن تحصل تانى ومستنى اليوم اللى العربية هتعطل فيه وصاحبه شارى دماغه والعربية معاه زى الفل وبيعمل الصيانة الدورية فقط وأحيانا لا والعربية ماشية كويس معاه برضه
ولما ييجى يحط سعر للعربية يلاقى عربية صاحبه ماسكة سعر وهو يعنى عربيه عمالة تخسر كل سنة مبلغ وقدره
ويقعد يقول ياريتنى اشتريت عربية زى بتاعته
ده غير المقارنات اللى العربيات عمالة تدخل فيها زى الثبات والتسارع والعزل واستهلاك الوقود والاعتمادية واسعار قطع الغيار وقوة جهاز التكييف وارتفاع العربية عن الأرض والحك فى المطبات الجبلية
زى ما يكونوا الناس عمالين يقارنوا ما بين عربية bmw ومرسيدس ونسيوا إن دى عربيات اقتصادية
يعنى الجودة بتاعتها لازم تكون أقل من جودة السيارات اللى بيقولوا عليها سيارات الرفاهية
لكن فيه عريبات اقتصادية كسرت القاعدة دى وقربت من مستوى جودة عالى فى التقفيل والخامات المستخدمة وجودة الدهان وده اللى التوكيل بيلعب عليه
يعنى التوكيل لما يلاقى العربية نضيفة والناس بتشكر فيها تلاقى التوكيل حاطط أسعار غير منطقية فى عربية 1600 سى سى
يدوبك لما دخل عليها كماليات زايدة شوية زى إدارة العربية بدون مفتاح والإيرباج الكتير وتبريد المشروبات ومشغل الاسطونات والفرش الجلد تلاقى العربية سعرها نط فى السما