الموضوع: سنة ونصف من العذاب المستمر

انا الحقيقة يا زملاء المنتدى الاعزاء فى مشكلة ممتدة لما يزيد عن السنة لدرجة انى مليت
بأختصار بعد استلامى للسيارة الاسبرانزا 1600 موديل 2008 اقول بعد استلامى لها بثلاثة ايام تركتها خلالها فى الكراج لحين احضار بقية اوراق الترخيص وجيت ادور لقيت البطارية فاصلة ودورت زق وكانت فضيحة فى الشارع .. رخصت ورحت مركز الصيانة بالتوكيل ودخلوها وطلعوها دايرة بعد ما شحنوا البطارية وقالوا معرفش ايه كان فاصل فى الكونتاكت .. طيب سبتها يومين لانى كنت مسافر خلالهم ورجعت ادور ما دارتش غير زق ، رحت مركز صيانة تانى فى الصحراوى فغيروا البطارية على الضمان .. مفيش 15 يوم وسافرت لمدة ثلاثى ايام رجعت ادور مادارتش غير زق .. اخر ما زهقت اشتريت كابل توصيلة بخمسين جنيه عشان اى حد معدى يدينى توصيلة .. رحت لمركز الصيانة شرحت المشكلة شالوا البطارية وادونى بطارية جديدة وبأختصار ظلت المشكلة على ماهى عليه بعد شهر .. رحتلهم وانا ها انفجر لأنى مش شارى عربية زيرو عشان تريحنى تقوم تورينى الويل .. وفى كل مرة يقيسوا ويعملوا فقلت لهم العربية دى فيها ماس او سرية بتهرب كهربة وتفضى البطارية لو ما دارتش العربية لمدة يومين .. وفضلت فى مسلسل رايح جاى فغيروا نصف الكمبيوتر الامامى وغيروا نصف الكمبيوتر الخلفى اللى فى الشنطة وغيروا بعدها تابلوه العدادات .. ولغاية دلوقتى مش عارفين يوصلوا فين العيب لأنهم مش فاهمين وكل اللى طالع عليهم امشى كل يوم بالعربية .. طب ها امشى بالعربية على الفاضى وبدون لزمة وبدون هدف .. ها امشى وخلاص عشان اشحن البطارية يوميا .. مش معقول .. انا واثق ان العربية فيها ماس بيسحب البطارية ويفضيها لوالعربية ما دارتش لمدة يومين .. لكن فين الماس ده محدش عارف واللى انا عايز اعرفه من خبراء المنتدى فى الكهرباء .. لما بيكون فى العربية سرية او ماس ازاى بيتم التوصل لمكانه بالضبط لانه ممكن يكون سلكة ملمسة فى قعدة كرسى او مسمار تحت فرش ومش باين فأزاى يتعرف مكان الماس ويتم الوصل له لأنى بصراحة زهقت وقرفت وكرهت العربية دى رغم انها عربية ممتازة لكن مشكلتها فى ضمانها ومراكز صيانتها .. ارجو من الخبراءافادتى او اذا كان هناك مركز او فنى او ورشة موثوق فيها متخصصة فى الوصول لحل هذه المشكلة فأرجو ان يدلنى احد عليها بالعنوان والتليفون وربنا يكتب لكم الاجر والثواب .. منتظر الافادة وللجميع خالص الشكر

المشاركة الأصلية كتبت بواسطة demos70

حتى بعد تغيير الظفيره ممكن يظل العيب موجود لو العيب في أي جزء كهربي من العربيه. مشاكل تسريب تيار كهربي من العربيه محتاجه خبره + صبر + ضمير لانك المفروض بتوصل ملتيميتر على التوالي مع البطاريه لازم هيدي قراءة عن حجم التيار المسحوب ثم تبدأ بفك كل مكون كهربي من العربيه واحد واحد و نشوف ايه الجزء اللي فكيته اللي خلا التسرب يمتنع و ده من خلال مراجعه الملتيميتر كل متفك وصله تراجع الملتيميتر لو مقلتش القيمه ركبها تاني و شوف غيرها لحد متلاقي ان القراءة قلت من 2 أمبير الي مثلا 0.8 أمبير مش لازم يدي قراءه صفر بل لن يعطي صفر ابدا لان العربيات الجديده فيها أجهزه تسحب تيار خفيف و هي مش دايره الي أن تدخل في حالة نوم أو "سليب مود" فرضا لما فكيت وصلة السيدي أو نور الشنطه مثلا قل سحب التيار يبقى العيب اما في السي دي أو في سلك الظفيره المتصل به أو في الوصله البلاستيك و بعد كل ده ممكن تحتاج تكود العربيه لتطفي بعض اللمض الي ممكن تنور نتيجه لفصلك الكهرباء عنها زي الأيرباج مثلا....هي سهله لو عملتها بنفسك أكنك بتطارد فار في بيتك هتفضل ورا العيب لحد ما تجيبه لكن لو جايب حد يطارد الفار بفلوس هيدور شويه و لو ملقاش هيطلعلك فار من جيبه و يقولك لقينا الفار يا بيـــــــه

المشاركة الأصلية كتبت بواسطة أبو ياسين

طب ايه رايك كحل موقت انك كل متيجى تركن العربيه يومين ثلاثه تفصل كابلات البطاريه؟؟
و كان الله فى عونك

مؤيد وبشدة