الموضوع: مساعدة فى شراء بولونيز

المشاركة الأصلية كتبت بواسطة Hhassan

ازيكو يااحلى منتدى موجود فى مصر وسلام خصوصى لاصحاب البولونيز
من كتر الكلام على العربية وعن تجربة لاحد اقاربى بالعربية ديه وبعد حيرة مش كبيرة اوى قررت انى اكون من مالكى البولونيز فى مصر وبما انى ديه اول عربية فى حياتى انا كنت عايز اشترى بولونيز بس ليه كام سؤال والبركة فيكم بقى
احسن موديل للعربية ديه ايه ؟
الماتور احسن 1600 ولا 1500 وهو كام حصان
انا عامل ميزانية للعربية ديه 15 الى 20 الف
النهارده وانا جاى من الشغل شوفت عربية مركونه تحت عمارة وصاحبها عارضها للبيع وكاتب ان هيه موديل 90 بس مش كاتب ان هيه فبريكة فكنت عايز اعرف اتكلم معاه فى اى كام
ولو روحت سوق العاشر ممكن الاقى حاجة كويس فبريكة يعنى؟.

أهو ده الكلام .. زين ما اخترت العربية
هى أهم حاجة طبعا فى المستعمل الحاااااااالة لو كنت عاوز تركب وماتحملش هم كبير فى تصليح وخلافه
بس انا شخصيا بافضل موديلات 88 - 89 - 90 - 91 وبلاش قبل 88 لأن فى منها بمواتير 1300 وبيكون حالتها تصعب ع الكافر

عامة مش هاتفرق كتير 1500 من 1600 لأنك بتتكلم فى حوالى 80 حصان فى موتور كامة واحدة 8 صباب وفتيس 5 سرعات بيوصل العربية لسرعة قصوى 155 كم/س
يعنى العزم شديد والقوة حديد = بولونيز الدبابة

وبرضه مش هاتفرق فابريقة ولا لأ لأن اهم حاجة تتأكد منها اساسيات العربية حوض وشنطة والشاسيه مافيهوش لحامات وتبقى فبريقة جوة طبعا لون بلادها

وبالنسبة للعربية اللى حضرتك شوفتها مو90 انا رأيى لو حالة نمرة 1 يبقى اخرها 17 الف عشان المفروض ان سوق المستعمل واقع بس اسأل برضه وشوف صاحبها عاوز فيها كام وحالتها تستاهل ولا لأ

وربنا يوفقك فى الاختيار ومبروك مقدما يا ريس
وابقى وافينا بآخر التطورات