سؤال لأصحاب التيريوس الجديدة ( بخصوص علبة الدركسيون)

**د.محمود صلاح** · 16-10-2009 09:05 PM

السلام عليكم ورحمة الله

سؤال للى عنده تيريوس الشكل الحالى : - هل علبة الدركسيون بتتحمل المطبات الشبيهه بمزلقان السكة الحديد ؟ أعنى هل علبة الدركسيون بتلب وترتج مع المطبات التى تشبه المشى على زلط او العبور على مزلقان ؟

كل العربيات اللى ركبتها كانت العلبة بتدبدب وتلب مع المطبات

برايد - جيلى - رينو ميجان - شفروليه اوبترا

فهل يحدث هذا مع التيريوس ؟

**medo_sirion** · 17-10-2009 05:12 AM

مينفعش يااااااااجماعة فى التريوس
لانها عربية جيب
يعنى متعودة على الخبط والرزع

**BAHAA** · 18-10-2009 11:46 AM

مثلا و انا بعدى على مزلقان السكه الحديد فى منطقة عرب المعادى بحس برجرجه جامده لكنى فى الوقت نفسه بحس ان العربيه جامده ..الرجرجه بتبقى فى العربيه كلها مش بس فى علبة الدركسيون

**م.محمد شافعي** · 18-10-2009 02:10 PM

السلام عليكم
طبعا موضوع الرجه دي مش محسوسه في علبة دركسيون التيريوس لان العلبه مش قريبه من مكان الاهتزاز زي باقي العربيات انما طبيعي ان العربيه بيحصل فيها كلها علي بعض رجه خفيفه مع النوع ده من المطبات او مزلقان السكه الحديد انما مش بالشكل اللي بيحصل في السيارات الملاكي العاديه.
وفي كل الاحوال هتحس بالرجه لو اخدت المطب او المزلقان بسرعه كبيره انما لو براحه مش هتحس بأي حاجه خالص.

**د.محمود صلاح** · 19-10-2009 07:58 AM

تمام , كده تمام , أقصد بالرجة هى اللى بتحسه وانت ماسك الطارة انها بتتذبذب مع المطب أو بتحس ان فى عامود الدركسيون المفصلات الصليبية بتاعته بيظهر فيها هوة gap تسمح بالأرتجاج مع المطب

**melhefnawy** · 20-10-2009 10:27 PM

شباب , ده بيحصل في التريوس و بيحصل قوي كمان ولما سألت في التوكيل قالولي ده طبيعي لأنها مش 4 x 4

أنا معاي اوتوماتيك 2x 4 2009

وطبعاً أنا مستغرب لأن ده ماكنش بيحصل معايا في عربيتي القديمة لادا 2007

أنا بحس أن كل طوبة أو ظلطة ماشي عليها باحسها في الدريكسيون و يا سلام بأه لو أرض مكسرة شويه الدريكسيون بيترج و يلف مع نفسه