الموضوع: تجربتي مع أخوان مقار

بسم الله الرحمن الرحيم
السلام عليكم ورحمه الله وبركاته

اولا انا كنت عايز اكشف علي عربيتي الاوبل فيكترا موديل 1997 معدله 2000cdx
واليكم التجربه
المكان : اخوان مقار
العنوان:1 شارع التحرير الدقي بجوارالجيزه الوطنيه للسيارات (مرسيدس )
تليفون :33371159--33371210
الراحه الاسبوعيه :يوم الاحد
مواعيد العمل :من 8 الي 5 مساء
انا طبعا روحت التوكيل ده 4 مرات
المره الاولي روحت وكانت الساعه 12 الظهر (بدون حجز ) وللأسف مارضيوش يستقبلوا العربيه لان العدد كامل واللي واقف علي البوابه مارضيش يحجزلي لليوم اللي بعده الكلام ده كان يوم الخميس

طبعا بعد ما روحت كلمتهم في التليفون وحجزت ميعاد عندهم لليوم التالي

المره التانيه :روحت الساعه 8 الصبح يوم الجمعه بناء علي الحجز وعند البوابه بيستقبلك عامل بيديك ورقه فيها ايه اللي عايز تعمله وبيلزق استيكر علي الزجاج فيه القسم المطلوب وبيمضيك عليها
وبعد كده تخش تقف في الدور لغايه ما يجي حد يستلم عربيتك منهم
طبعا انا وقفت حوالي نص ساعه عقبال ما حد جه وفي الاخر قالي ان جهاز الزوايا والشاسيه عطلان واحنا ممكن نكشفلك ميكانيكا وسمكره ومالناش دعوه بالشاسيه
طبعا انا روحت للمدير المسئول واتكلمت معاه لان ازاي بعد ما حجزت في التليفون ومن عند البوابه مفيش حد يقولي ان الجهاز عطلان طبعا المهندس قالي معلش قولتله طيب انا عاوز اكشف علي الشاسيه راح قالي ماينفعش اكشفلك عليه بالنظر ممكن تيجي في يوم تاني يكون الجهاز اتصلح قولت ما علينا خليته يبداء في الكشف طبعا طلبوا مني رخصه العربيه واسم صاحبها علشان يكشفوا علي الملف بتاعها اللي عندهم ولا لا وعدلوا البيانات الجديده بتاعت صاحبها ومضوني علي ورقه انيموافق انهم يشتغلوا فيها
سألت المختبر اللي هيشتغلفي العربيه ينفع احضر الفحص وكانت الاجابه ممنوع الدخول لغير العاملين
طيب هستلم العربيه امتي ياباشا قالي تعالي بعد اربع ساعات يعني الساعه 3 (الكلام ده كان الساعه 10 الصبح )
سيبت العربيه ورجعت الساعه 3 لقيت العربيه خلصانه وجاهزه ومعاها تقرير وقف الراجل اللي اختبرها يناقشه معايا وبعد كده اداني ورقه اروح بيها الخزنه
طبعا تكلفه الفحص الشامل كالاتي
165 كشف ميكانيكا
60 اشغال ودهانات
25 جنيه (كشف زوايا وشاسيه ) (طبعا اتخصمت علشان ماكشفتش)
10% ضريبه مبيعات
يبقي اجمالي الكشف الشامل 275 جنيها
طبعا دفعت واخدت ورقه علشان اخرج بيها العربيه وتقرير

الزياره التالته:حجزت ميعاد مع التوكيل علي يوم الاربعاء وكان حجزي زوايا وشاسيه وبعد ما روحت قالولي الجهاز عطلان طيب هيتصلح امتي مانعرفش

كلمتهم في نفس اليوم بالليل قالولي الجهاز اتصلح
الزياره الرابعه :روحت التوكيل وكشفت زوايا وشاسيه وطلع الشاسيه سليم وظبطولي الزوايا ودفعت 50 جنيه كشف زوايا وشاسيه وضبط زوايا

ملاحظاتي علي التجربه :
1-سعر الكشف الشامل 275 جنيه
2- مش مهم تحجز ميعاد لكن المهم تروح بدري (الساعه 8 الصبح )
3- الحجز مالوش اي لزوم لو حد مش حاجز وحه قبلك يبقي ليه الاولويه
4-اسعار قطع الغيار سر من الاسرار العسكريه هناك ممنوع تماما حد يقولك سعر اي قطعه غيار
5- ماتعتمدش علي خدمه العملاء اللي في التليفون لانهم مش عارفين اسعار الكشف ولا الاجهزه اللي متاحه ولا لا
6- خدمه العملاء ونظام الاستقبال تحتاج الي مزيد من الاهتمام
7-اماكن الانتظار (للأشخاص )قليله جدا بالظبط مكان يسع 10 اشخاص علشان كده كنت واقف جنب عربيتي في الشمس
أرجو ان تكونوا قد استفدتم وشكرا جزيلا لكم
[S][/S]

اولا الف شكر على التقرير الجميل يا اسلام باشا
انا بتعامل مع مقار من 3 سنين من ساعة ما اشتريت العربية
1- فعلا مفيش عندهم حجز. الاولوية لأسبقية الحضور
2- يستحسن تروح بدري ويكون يوم جمعة او سبت
3- الاول كانو بيقبلو اي قطع غيار من برة. دلوقتي يمكن بدأو شوية يرفضو بس لو عارفينك كويس خلاص او لو قطعة عندهم غالية جدا هما بيقولولك هتها من برة وممكن يقولولك على النوع اللي تجيبه كمان
4- معلومة ممكن تكون مفجأة ليكو. المختبرين دول معظمهم مش مهندسين ولا ليهم دعوة بالسيارات اصلا. فيه منهم اللي كان سواق واللي كان ميكانيكي زوايا وووووووو. فأهم حاجة الميكانيكي اللي هيشتغل في العربية جوة مش المختبر
5- عموما انا حاليا برده بتعامل مع المختبر عماد خطاب لأنه يعتبر احسن واحد فيهم دلوقتي وعلى الاقل فاهم الشغل وما بيفتحشي زي تامر ووجيه وهاني وعبد الفتاح ثانيا معاه جوة صنايعية كويسين وعندهم ضمير ومنهم واحد ساكن معايا في حلوان واعرفه شخصيا
6- انا لا احبز الانتظار في صالة الاستقبال علشان ده ممكن يوحي للمختبر انك مستعجل على العربية وبالتالي ممكن ينقل الاستعجال ده للصنايعي اللي شغال جوة ويكلفت العربية. فحاول دياما تعمل اي مشوار او مصلحة في الوقت ده او لو مش محتاج العربية في اليوم ده روح وارجعلهم تاني يوم
7- المصنعيات عندهم برده سعرها معقول حتى لو اغلى من برة شوية وماتنسوش تروحو للمهندس مصطفي مدير الورشة علشان تاخدو ال 10% الخصم على المصنعيات
8- فيه عندهم مركز لبيع قطع الغيار تقدر تسأل على اي حاجة انت عاوزها وممكن تشتريها عادي جدا
9- فيه عندهم ميزة كويسة جدا انهم ممكن يعملو حاجة في العربية وما يكتبوهاش في الفاتورة وديه انا جربتها معاهم كذا مرة