الموضوع: التخفيض الجمركي على السيارات الاوروبية -- حسبة بسيطة

المشاركة الأصلية كتبت بواسطة m20ahmed

السلام عليكم ..
شكرا للأخوة اللى شرحو وجهة نظر قوية فى ألغاء جمارك السيارات أحب أضيف أن البلد هاتخف لأن 80 % من اللى واخدين شقق فى أكتوبر والشروق والمناطق الجديدة دية مش قاعدين فيها ..أما قاعدين مع أهاليهم فى وسط البلد أو مأجرين أيجار جديد فى وسط البلد لأن بردة تكلفة المواصلات غالية كل يوم + بهدلة المواصلات العامة .. دة يخلى فئة جديدة تجيب عربيات ويسكونو برة القاهرة

على ماالجمارك تنزل تكون الناس زادت

المشاركة الأصلية كتبت بواسطة hegazio

معلش .. للمرة التانية
ازاي كل الناس شايفة بس ان العربيات الجديدة حتحل محل القديمة و التلوث حيقل و الأعطال حتختفي ؟!!!!!!!

تفكير عجيب فعلا !!!!!!

العربيات القديمة حتبقي بخمس الاف جنيه و ساعتها البوابين حيشتروها يجيبو بيها الخضار و حتفضل ماشية

فيه حاجة فالمرور لو اشتغلت بما يرضي الله مش الجيب المشكلة دي هتتحل "الفحص"

العربيات الجديدة ممكن تبقي بعشرين الف و ساعتها علي الأقل 2.5 مليون من مستخدمي الاوتوبيسات و الميكروباسات
و برضه الميكروباسات و الوتوبيسات حتفضل موجوده !!!!!
بس الضغط عليها هيقل جامد وهيتعملها صيانة ومستواها هيكون أحسن شوية

لا يمكن اعتبار تخفيض الجمارك ميزة أو فائدة الا :-
تظبيط قوانين تكهين السيارات القديمة أولا
أنا مش مع القانون ده نهائي اعمل فحص ولو العربية 2010 وبايظة تترمي ولو 1800 وسليمة تمشي
ياجماعة فيه عربيات تحف بجد موديلات 40 و 50
الحاجات دي جميلة قوي قوي ولو أنا نظبط عربيتي ليه ارميها وهي سالما ومعدية من فحوصات الأمان وال سرعة والبيئة
تظبيط قانون المرور ثانيا
تظبيط اماكن باركنج شبه مجانية في مختلف الأنحاء
صعب قوي فالقاهرة أو جيزة ده حتى المدن الجديدة مفيهاش كده
الغاء المركزية في البلد لتخفيف الانتقالات من و الي
تظبيط الروتين و العاملات الحكومية

بدون ذلك ستتحول البلد الي ناس كتيييييييييييييييير معاها عربيات و كله واقف مكانه

الحل الوحيد او الاستبدال الاجبارى
يعنى اللى عايز يرخص عربيه جديده يجبر على تكهين واحده قديمه مكانها

وبكده العربيات القديمه هاتختفى تماما واصحابها هايبعوها للمشترين الجدد بسعر معقول جدا..يعنى موديل ال 60 وال 70 هاتتباع ب 30-40 والبى ام الجديده هاتبقى ب 300 الف بدل 550

وبعد كام سنه هايتبقى اقدم عربيه فى مصر عمرها 15-20 سنه....ويحصل شبه توقف للبيع الجديد..يقوموا يوقفوا الشرط ده كام سنه وهكذا دورات

ولازم و لابد من زيادة اعداد الاتويسات الجديده وانشاء خطوط مترو انفاق جديده للناس اللى هاتبيع عربياتها القديمه

انه يتم وضع ضرائب عاليه على العربيات ولكن سعر البنزين بيكون مدعوم والرخيص بيكون رسومه معقوله

العربية الجديدة مابتستهلكش بنزين زي القديم
ليه بقى أنا ادفع جمرك عالي وعربيتي استهلاكها 7/100 عشان واحد معاه عربية خردة بتقول صفيحة في ال 100

موضوع ممتاز
بس هل فعلا بيتم تخفيض الجمارك سنوياً بنسبة 10% من قيمة الجمارك المفروضة لإن الواحد مش حاسس بالموضوع ده وانا مبتكلمش في الحالات اللي بيحصل فيها تغيير للتصميم زي من لانسر بومة مثلاً لشارك لان طبيعي ان السعر يزيد انا بتكلم عن مثلا حالات زي السيفك مثلاً من 2007 : 2011 نفس الشكل المفروض ان موضوع االتخفيض الجمركي يكون ملموس فيها؟

الموضوع له عيب و ميزة..

الميزة, ان هايبقى سهل ان اى حد يجيب عربية جديدة بسعر معقول بدل الأسعار العجيبة دلوقتى, انا بادخل أشوف اسعار العربيات بره مصر ضغطى بيعلى D:
و طبعاً ده هايسهل ان مثلاً زى ما m20ahmed قال الناس اللى ساكنة فى المدن الجديدة يروجوا و يرجعوا و يخفوا الضغط من على البلد..
ده غير ان الواحد يترحم من المواصلات فى البلد اللا أدمية دى..

العيب و اللى مالوش حل تقريباً..
مفيش مكان !!
بمعنى, فى الامارات مثلاً عشان يبنوا اى مبنى لازم التصميم يكون فيه مكان لجراج الناس تركن فيه..
عدولى هنا فى مصر كام مبنى فيه حاجة زى كده؟؟ قليل أوى..
يعنى احنا فى الشارع عندنا الواحد مش بيركن, بجد بمعنى الكلمة الواحد بيرمى عربيته فى اى مساحة فاضية عشان مفيش مكان لركنة, هابقى ارفعلكوا صورة للمنظر D:

تانى حاجة, فى اى حتة فى العالم الناس بتصمم الشوارع عشان تستحمل ل 50 سنة قدام على الأقل.. تصميم الشوارع هنا يستحمل 3ايام و نص بالكتير قدام..

الشوارع ضيقة و استحالة تستوعب كميات العربيات دى, و انتوا اكتر ناس عارفين الزحمة فى مصر شكلها ايه.. يعنى تخيلوا مثلاً شارع فيصل العربيات لو زادت فيه بنسبة 30% أو 40% D:

المدن الجديدة اه حل بس مش هايخفف الأزمة أوى عشان احنا عندنا مصيبة اسمها المركزية, كل حاجة فى العاصمة, معظم الناس شركاتها متمركزة فى مناطق معينة...

القانون ده لو اتطبق مرة واحدة بجد انا شايفة ان هاتبقى كارثة, اذا كان مبيعات 2011 وصلت 178 الف عربية تقريباً و بالاسعار دى, لو اتشالت الجمارك هاتوصل كام؟؟؟!!

الحل.. لا يوجد حل قريب, لازم ثقافة شعب تتغير, بدل ما كل واحد يركب عربيته , كل مجموعة فى منطقة مثلاً يركبوا مع بعض و يبدلوا العربيات (اضعف الايمان), يبقى فيه بدائل أدمية بدل الاوتيبيسات المتهالكة و الميكروباصات اللى عايزة الحرق و المترو اللى احسن الواحد يمشى بدل ما يركبه =/ عشان الناس تستخدمها..

و لو اتطبق القانون ده, لازم يتطبق تكهين العربيات القديمة, المصريين عندهم عادة عجيبة فى الاحتفاظ بالاشياء كانما اصبحت جزء من روحهم (و مش فى العربيات بس).. و لو قلنا العربيات القديمة موجودة علشان ناس كتير مكانش معاها حق العربيات الجديدة, مش هايبقى فيه حجة بعد كده !!

الحكومة اللى ربنا ينتعها بالسلامة و تيجى تبدأ عمليات ترميم للشوارع و توسيعها لو أمكن و الاهم التشجيع على الانتقال لأماكن تانية زى المدن الجديدة, و تبقى فيه تسهيلات للشباب بقى و للشركات عشان تفتح فروع جديدة هناك, اى حاجة بس يفضوا البلد شوية =S

اه, و ياريت يلغوا التوك توك D:

سورى طولت عليكم بس الموضوع شدنى..

...