حسبي الله في بتوع النقل و اللي بييجي من وراهم :@

**pro_samir** · 20-10-2009 02:52 AM

سلام عليكم

فعلا بتوع النقل دول انا مش عارف هيحترمو نفسهم امتي بجد ناس عايزة الحرق

وانا مروح من ساعتين تقريبا علي الزراعي الرائع واحد متخلف منهم ماشي 120:130 وعمال يعمل غرز وحاجة اخر قرف وانا اصلا ماشي 110:120

شديت شوية وعديتة هوا وشوية عربيات كانو ماشيين يهبلو مع بعض .. وبعدين مسكت الحارة الوسطي كالعادة ورجعت لسرعتي 110

شوية والاقي المتخلف دة جاي تاني محدوف زي الـ... وكان هيخبطني مع اني ماشي في حارتي بالظبط وكذلك عربية جيب كانت قدامي بشوية برضو كان هيخبطها والراجل حدف يمين جامد علشان يتجنبة وانا كذلك لأنة كان جنبي ب30 سم تقريبا

شوية وراح واكل مطب هوا وإذا بدفعة ظلط تطير من العربية وكان نصيبي في واحدة منهم لبست في الأزاز وفي لحظة بالظبط كان كلة مسرطن ومبقتش شايف حاجة ، بس بفضل الله موقعش ومطارش منة حاجة عليا ولا علي اخويا لأنة كان معايا ، غير شوية رايش خفيف خالص

طبعا وقفت وحطينا الدواسات علي التابلوة ونص ساعة عمالين نوقع فية ونلم المتكسر

أولا وأخرا طبعا الحمد لله رب العالمين ان الموضوع عدي علي خير واني متخضيتش وفرملت جامد ولا خبط في عربية جنبي ولا حصلنا حاجة من الأزاز

يا رب ألاقي الأزاز وميطلعش عيني

وبتوع التريلات دول والله مانا عارف اقول إية منهم لله وربنا يخلصنا من تخلفهم وتخلف اللي ساكتينلهم

**dr.amr** · 20-10-2009 03:38 AM

لا حول ولا قوة الا بالله
قدر الله وماشاء فعل الحمد لله
انا من كام يوم ماشي فوق كوبري العباسيه وقدامي عربيه سيتروين ماشيه وكان في نص بلاطه علي الكوبري بالاسمنت بتاعها ماعرفش الراجل داس عليا ليه مع ان الطريق قدامه واسع لقيت البلاطه طارت في الهواء وكانت هتنزل علي الكبوت تخرمه لولا ستر ربنا واني لحقت نفسي الحمد لله بس انهارده كان في راجل محما خشب علي عربيته وطار منه اخدت واحده في وش العربيه بس الحمد لله ماعملتش حاجه ربنا يستر طريقنا جميعا

**E30power** · 20-10-2009 03:56 AM

بتوع التريلات دول ناس عايزة الحرررررررررررررق انتا هتقولى عليهم دة انا بشوف الويل لما برجع من السويس من بلطجتهم وعجرفتهم ويا سلام لو فهمتة انو غلطان تلاقية يقلبلك الطريق fast and furious وانتا ونصيبك بقى ......حقيقى ناس مبعترفش تفكر ولا بيفهمو للاسف

**ashraf229** · 20-10-2009 09:29 AM

هما المسمار اللي مدقوق في دماغنا و عاملنا صداع دايما

ناس بلطجية و مفترية و عارفة قوة الوحش اللي راكبه و معظمهم فعلا بلا ضمير أو أخلاق أو حب لمن حولهم عالطريق

و فالحين بس يعملولك اضرابات علشان ما نلغيش المقطورة واحنا البلد الوحيد في العالم اللي بيستخدمها

وفي نفس الوقت كل يوم حادثة مرة في المحور و مرة الدائري و مرة بني سويف و مرة الغردقة و وو وو و و و و بسبب الست مقطورة دي اللي ربنا يخلصنا منها على خير كفاية كده بئى..............

**karaktar** · 20-10-2009 10:09 AM

قدر الله وماشاء فعل وحمد لله على سلامتك

**meeg** · 20-10-2009 10:24 AM

حمدا لله على سلامتك
وقدر الله وماشاء فعل

**ehab_mansour** · 20-10-2009 11:01 AM

الحمد لله علي سلامتك وربنا يرحمنا منهم
والله انا اوقات بحاول لما الاقي واحد منهم كده بعديه واحاول ازنقه وسط العربيات واهدي الطريق كله قدامه عشان ما يعرفش يجري ولا يعدي وده لأنهم ما بيجوش غير بالعافية
والله المستعان ربنا يهدي الجميع