عندكم حد عايز "يحلق" ؟

**pro_samir** · 23-10-2009 07:15 PM

سلام عليكم

مش عارف سمعتو عن الموضوع دة ولا إية ؟

واحد شغال معايا في الشركة من طنطا بيحكي انة في يوم جرس الباب رن فا قام فتح ..

لاقي واحد "صيني" لابس بالطو أبيض وشايل شنطة وبيقولة بعربي متكسر "عندكم حد عايز يحلق؟" هههههه

صاحبنا دة مردش علية وهلك علي نفسة من الضحك والراجل اتحرج وراح وقف قدام الأسانسير وهوا متوتر جدا وعايز يتداري منة والتاني مش قادر و ميت من الضحك ههههه

لحد ما الراجل جاب أخرة وراح نازل علي السلم

وعرف بعدها انة حلق لواحد في نفس العمارة ظبطة كويس ومكنة حلاقة مخصوص ومش عارف اية وكل دة بخمسة جنية

الموضوع دة منتشر ولا إية ؟

و يا تري ممكن تسلم دماغك لواحد صيني ؟

**sniper_man2008** · 23-10-2009 07:33 PM

هما الصينيين وصلوا لطنطا .

**asbeats** · 23-10-2009 07:38 PM

كمان بالطو ابيض وشنطه!!!

مش عايزين قلق في القعدة يا رجاله

**pro_samir** · 23-10-2009 07:38 PM

المشاركة الأصلية كتبت بواسطة sniper_man2008

هما الصينيين وصلوا لطنطا .

يا باشا يا ريت علي طنطا وبس .. دانا ببقي ماشي في طرق زراعية الاقيهم طالعين من القري ومعاهم شنط معرفش بيهببو إية ، وكتير قوي تلاقيهم نازلين مناطق شعبية وعمالين يلفو في الحواري يشوفو الناس محتاجة إية ويروحو يصنعوة وييجو يبيعو

لكن حلاق صيني و ديليفري كمان ! دة ناقص ياخد باتنين جنية بيض بدل الفلوس

**TaoTao** · 23-10-2009 08:02 PM

قرأت تحقيق صحفي عن الموضوع ده قبل كدة، والله ناس مجتهدة وتستحق كل تقدير واحترام ..
ولو حد خايف من التعقيم وكدة ممكن يجيب لنفسه عدة حلاقة مخصوص، ويبقى وفر على نفسه مشوار الحلاقة .
الصينيين دول بيبهروني جداً في دأبهم وإصرارهم