بسم الله نوكلت على الله
2- الجزء الثاني :- تقرير وانطباع عن السياره + صور
طبعا بعد الكلام الكتير اوي اللي فوق ده هنتكلم أكيد شويه كمان
وبعد كدا هنشوف الصور بتاعت العربيه ان شاء الله
1- الانطباع المبدأي عن السياره :-
انطباعي عن العربيه من اول ما ركبتها هو كان (مش مصدق ومذهول )مكانش عندي تفائل خالص ان العربيه تكون كدا انا كنت متوقعها اقل من كدا بكتير بصراحه من كلام الاعضاء عنها وبالذات في جزئيه ان الخامات فقيره لكن انا شفت ان الخامات مقبوله بشكل كبير جدا ويمكن احسن من عربيات كتير في نفس فئتها وفي البلدان اللي حوالين ماليزيا اقصد شرق اسيا بمعنى اصح
دا انطباعي وقت ما شفت العربيه بعد سنه ونص تقريبا وانا بقرأ اخبار وبشوف صور وبس
ودي كانت اول مره (اه يا قلبي)
ساعة استلام عربيتي بصراحه مقدرتش اقيم الموقف خالص
وطلعت بيها زي أي عربيه تانيه وركنتها ولما بدأت أسوق بجد بقى وسط الزحمه واركز قدرت أقيم الموقف اللي انا فيه وااخد بعين الاعتبار تقييم للسياره هيتعمل هنا في المنتدى
وبدأت اخد بالي جد من كل حاجه في العربيه بتحصل
التسارع والعفشه والابعاد وخلافه
طبعا اول ما ركبت شديت الحزام ولاحظت ان الحزام سهل جدا في شده وخفيف في عربيات تانيه الحزام بيتشد بصعوبه ولعلمي ان الحزام بيتحرك فظبطتو تمام وابتديت اتحرك
الهاند كان سلس اوي في اديا سواء برفعوا او بنزلوا والفرامل تجاوبت معايا علطول واخدت عليها بسرعه وهيا كان مداها قريب لكن مش باللمس ( هل ده طبيعي ؟؟ مش عارف ) يعني اقصد بمداها قريب انها قريبه من رجلي لما بحتاجها ودواسة الدبرياش كانت تقيله سنه لكن اتعودت عليه بسرعه ودواسه البنزين كانت سلسه جداا اما الفتيس بقى كان وانا بستلم الرابع مكانش راضي ييجي خالص وجه بالعافيه واستاذ اسامه اعد يحرك في النقلات لحد ما بقت سلسه جدااا ودا اللي سهل عليا الموضوع في الطريق وبردو اخدت على الفتيس بسرعه جداا
بالنسبه للابعاد كنت شايفها كويس اوي (انا طويل بس مش اوي عقبالكم كدا) عشان كدا وانا ماشي على الطريق اخدت غرزه (مش غرزه اوي ) يعني عديت من عربيه ميني باص ودوست بنزين جامد والعربيه استجابتها كانت كويسه اوي وسريعه جدااا
والمرايات خدت عليها بسرعه جدا ومش هشتكي منها خالص لانها مناسبه بالنسبه ليا جداا
وجبت على الطريق 120 كتجربه للعربيه وطول الطريق ماشي من 70 الى 100 ويا اما ماسك الشمال او منتصف الطريق
بخصوص العفشه كان في مطب هوا محستش بيه بصراحه برغم اني كنت بحس بيه في عربيات تانيه واخدت حفره كدا في الطريق حسيت بيها جدااااااا وحته كانت طالعه فوق الاسفلت بردو حسيت بيها وكنا تلاته في العربيه والاوزان ما شاء الله يعني دا كفايه انا لوحدي هههههههههههههههههه
تسارع العربيه ممتاز جربتو تاني يوم وقسيت عليها جدااا لمده دقيقتين او تلاته مثلا
اه صحيح انا لما استلمت العربيه فولت وكانو 32 لتر بنزين 92 من البنزينه اللي في عباس العقاد وقرأت في كتيب المالك ان العربيه تنكها 50 لتر وتاخد بنزين 95 او اعلى وبنزين خالي من الرصاص ولحد ما وصلت البيت عملت 73 كيلو غير انها جيالي 61 كيلو تقريبا يعني المجموع 134 كيلو وخلصت ربع التانك الاول والحمد لله
وبخصوص الصوت في العربيه فهو ممتاز مش بطال والكاسيت في اوبشن كتيره وكويسه اوي
واحلى حاجه فيه انك تقدر تشغل كل سماعه لوحدها (طبعا عارفين ان العربيه فيها 4 سماعات ) وممكن تشغل الاتنين اللي ورى او اللي ادام بس ينقصها بس aux كان مفروض يبقى موجود لان الكاسيت في اوبشن لل aux
اما بخصوص الدركسيون بقى انا كان نفسي يبقى اخف من كدا
كذا عربيه سوقتها وكان الباور بتاعها خفيف ومريح اكتر منها
لكن الباور فيها ممتاز جدا والدركسيون ماسك نفسو ومحترم ذاتو
المجمل بقى ان العربيه ما شاء الله عليها عجباني جدا
ومرتاح وانا اعد فيها ومريحه في اعدتها ومتازه في الرؤيا
ومفيش أي عوائق وسلسه جداا وثابته ما شاء الله
مجربتهاش في ملفات حاده لكن ملف عادي على سرعة 100 كيلو
العربيه حاليا موجوده في الجراج طلعت بيها مره واحده فقط
وان شاء الله الطلعه الجايه عشان الترخيص وبعد كدا اطلع براحتي
دا تقييمي عن العربيه
وأي سؤال انا جاهز ان شاء الله
الرجاء عدم الرد لحين الانتهاء من الموضوع
المفضلات