الموضوع: حادث قطار العياط..كلاكيت لتاني مرة

والدي كان في أحد القطارين !!
انا مكنتش أعرف ولا أعرف إن فيه حادثة أصلاَ لأني مسافر و محدش قاللي غير لما رجع البيت (الساعة 3 بالليل) و هو الحمد لله كويس .

حسبي الله و نعم الوكيل في البلد اللي رايحة في داهية و واخدانا معاها !
لما أكلمه إن شاء الله هحاول أعرف منه التفاصيل الحقيقية غير اللي إتذاعت بس قالولي إن عدد الناس اللي ماتوا أكبر من كدة بكتير .

الفساد والأهمال عمال يحصد فينا .... واللي بيموت اهو مات وارتاح واللي عايشين بيتكلموا كام يوم ويهللوا شوية وخلاص ، واول ماتش كورة او شريط جديد لمطرب او فيلم الممثل الفلاني ، ننسى ونظيط مع اي حاجة .. ويستمر الحصاد وتستمر المآسي ... ويستمر الأهمال والفساد في كل هيئات ووزارات وقطاعات الحكومة في البلد .. ونستمر في التزييط والتهييص الأهبل الغير مجدي ... ولن يتغير شيئ طالما لا يوجد ما يوقف الفاسد عن فساده لأنه كده كده فاسد وانعدم ضميره ، وطالما آخرنا نزيط ونحسبن ، يبقى مفيش حاجة هتتغير وهيزيد الفساد يوم بعد يوم ، وخلينا كده وكل واحد فينا هيجي عليه الدور في موته بشعة أو ظلم بين أو اي حاجة من الفساد المحيط بنا في كل مكان ، حكومة مات ضميرها ، وشعب مات عقله .

يا حسره علينا وعلى بلدنا

لا حول ولا قوة الا بالله
حسبنا الله ونعم الوكيل

التجديد مطلوب...........زمان كانت كل المصايب بسبب مختل عقليا (أو الأرهابي المعتوه على رأي عادل أمام) و بعد كده الماس الكهربائي تفوق عليه و دلوقت الجاموسة!!!!!!!!

أنا مش فاهم يعني هوه القطر لما يخبط في جاموسة لازم يقف و يفرمل و الكلام ده ولا ايه بيفكرني بأخو واحد صاحبي كان مع اصحابه راجعين من اسكندرية و اتقلبت بيهم العربية (كرولا عيون من ييجي6 سنين) كده علشان اللي سايق بالليل اتفجأ بكلب بيعدي الصحراوي فارتبك و نزل في الرمل و قلب خمس ست مرات كده والعيال اتخرشمت..........

ازاي السواقين دول مش متدربين عالمواقف الحرجة دي!!
فين المراقبة و الاتصالات و التنسيق و التواصل بين القطورات على نفس الخط
فين التحكم الألي و غرفة تحكم مركزية عالأقل علشان العامل لما يدخل الحمام ولا يدخل ينام شوية ولا يروح يتعشى ولا يمشي (زي فيلم المنسي كده) يبئى فيه تدخل مركزي!!!
ازاي قطر يتجاوز سرعته المحددة و يطيح في الناس هوه سايق عربية أبوه ده معاه أرواح
هل هيتعاقب حد من المسؤولين في الهيئة أو حتى هيستقيل أو هيقال من منصبه ولا هيلبسها العمال الغلابة (اللي بأهمالهم بأعتبرهم قتله زيهم زي البهوات المسؤولين) ومحدش يقولي هما ذنبهم ايه ده مفيش امكانيات لأو برضه هما أكيد مكانوش في أماكنهم ولا اتصرفوا

و أخيرا ما تنسوش.........................المصري اللي على حق يقول للغلط لأ...........يا شيخ اتنيل!!!!!!!

رحمة الله و رضوانه على تلك النفوس التي قتلت بغير ذنب و حسبنا الله و نعم الوكيل
انا لله و انا اليه راجعون...........