انا قريت الموضوع فى السريع مش بتمعن يعنى بس ليا كذا ملاحظة

اولا الصور الاولى لعربية لوجان اتقلبت اثناء اختبار معين... طالما معندناش باقى بيانات و ظروف الاختبار منقدرش نقول هل هى عربية امنة ولا لا لان ببساطة كل عربية ليها حدود معينة مينفعش تتجاوزها و احنا هنا منعرفش هل فى الاختبار العربية تجاوزت حدود الامان بتاعتها ولا لا

غالبا اللى بيحصل فى اوروبا ان بيتعمل اختبار سلالوم على سرعة معينة و بتقيم اداء العربية فى الاختبار و يتقارن بباقى العربيات و لو العربية اتقلبت زى مثلا الِ A كلاس اول ما ظهرت يبقى دة عيب فى العربية... اذا العبرة بظروف الاختبار مش بالناتج فقط...مهو ممكن اى حد يقلب عربية BMW لوضغط عليها فوق حدودها

بالنسبة للفيدوهات التانية... مجموعه منها كانت لعربيات سباق... بالتالى لا الملفات اللى بتتاخد ينفع تتاخد بالعربية الستاندرد ولا الفيديو يفيد فى شىء من ناحية اثبات ثبات العربية لان دى حاجة تانية خالص غير العربية بتاعت السوق

نفس الكلام ينطبق على العربية اللى اتقلبت... دى عربية سباق و من جوة فيها cage عشان لما تتقلب الناس اللى جوة متتفعصش... و قوانين الرالى بتحتم ان القفص دة يستحمل مرة و نص قد وزن العربية

المجموعة التانية كانت لاختبارات برضة مفيش معلومات عنها... يعنى السرعة و المساقة المقطوعة الخ الخ بالتاى الاختبار مش مقياس لحاجة

المقارنة الصح لازم تبقى نسبية... يعنى اما اختبار معين معروف قواعدة (السرعة و المسافة بين الاقماع و زمن الاختبار الخ الخ) و يتم تقييم العربية بناء على النتيجة او يكون اختبارفيه بنقارن عربية بعربية تانية فى نفس الاختبار و نقيم فرق الاداء... يعنى لازم يبقى عندى ستاندرد بقارن بيه او نتيجة اختبار لعربية تانية و نقارن النتائج ببعض

دى كدة زى ما واحد يجيى يقولك فيه عربية 100 حصان... دى قوية؟؟؟...

عمرك ما حتعرف تجاوب الا لما تعرف وزنها و حجمها و سرعتها القصوى و زمن التسارع بتاعها عشان تعرف وضعها فى الفئة بتاعتها او انك تقارنها بعربية تانية من نفس الفئة او تقارنها بالعربية اللى فى دماغ صاحب السؤال... لكن بدون المقارنة بعربية تانية يبقى اجابة السؤال دة مستحيلة

you can't establish an opinion without a benchmark to compare against

MMamdouh