استفسار هام بخصوص موضوع ال Throtle Body

**Mostafa** · 15-11-2007 04:18 PM

نوع العربيه : فيات سيينا HL موديل 2000
انا كنت اتكلمت قبل كده عن مشكله ان العربيه كانت بتبطل لوحدها و بعدمحاولات لحل المشكله انتهينا الى تنظيف ال Throtle Body بالاسبراى والمشكله اتحلت بنسبه 95%
الى حد كبير جدا المشكله اختفت . لكن برضه احيانا وفى مرات نادره الاقى وانا ماشى وبهدى واول ما افصل الغيار تروح العربيه مبطله نفس المشكله بس بقت بتحصل قليل قوى قوى.
جربت اعلى العربيه شويه عشان متبطلش . الموضوع ده فشل تماما . العربيه بقت عاليه ار بى ام على 1.2 وبرضه احيانا تبطل.
جربت اعمل حاجه تانيه من اسبوع كده : جبت حزام من اللى بيتربطوا على الطاسات دول وحزمت سلك الاكسليريتور مع خرطوم تانى بحيث ابقى شادد السلك شويه . والحمد لله المشكله مختفيه تماما. وقست استهلاك البنزين كان طبيبعى خالص ومفيش اى مشكله الحمد لله.
انا سألت بتاع مركز الصيانه قالللى هيا مش مظبوطه كده ؟ قلت له اه قاللى خلاص واجع دماغك ليه.
المشكله ان انا غتت ومحنتف قوى ومبعرفش استخدم الحاجه الا وهيا على اصلها . ونفسى اعرف ايه المشكله .
حد يعرف حاجه تقدر تفيدنى فى الموضوع ده ؟؟؟؟؟

**MMamdouh** · 15-11-2007 04:20 PM

don't fix it unless it is broke

MMamdouh

**sab3aawy** · 20-11-2007 11:48 AM

اعتقد انك محتاج تكشف على الحساس بتاع فتحة الthrotle bodyلان ممكن يكون مخرف وبالتالى بيدى انطباعات زائفة لل ECU فى كمية الوقود المطلوبة للعربية

**محمد ابراهيم 1** · 20-11-2007 05:29 PM

اعتقد انك محتاج تكشف على الحساس بتاع فتحة الthrotle bodyلان ممكن يكون مخرف وبالتالى بيدى انطباعات زائفة لل ECU فى كمية الوقود المطلوبة للعربية

رغم إنى مش فاهم حاجه لكن أكيد الكلام ده صح

**sab3aawy** · 22-11-2007 01:38 PM

المشاركة الأصلية كتبت بواسطة محمد ابراهيم 1

اعتقد انك محتاج تكشف على الحساس بتاع فتحة الthrotle bodyلان ممكن يكون مخرف وبالتالى بيدى انطباعات زائفة لل ECU فى كمية الوقود المطلوبة للعربية

رغم إنى مش فاهم حاجه لكن أكيد الكلام ده صح

:D :D :D :D :D :D

فكرتنى بسعيد صالح فى مسرحية مدرسة المشاغبين ، لما كان عادل امام عمال بيتكلم كلام كبير أوى، راح هو قايل:" الراجل ده بيتكلم صح، مع انى مش فاهم هو بيقول ايه لكن ما دام قال دراع مرسى يبقى بيتكلم صح"

حساس الthrotle body شغلته انه يعرف بلف الهواء مفتوح قد ايه ، وبلف الهواء هو اللى احنا بنتحكم فيه بداوسة البنزين، ويببلغ ال ECU (وحد كومبيوتر السيارة) بفتحة الهواء دى، يقوم الECU يضبط عدد مرات فتح وغلق الرشاشات علشان تدى كمية البنزين المناسب لكمية الهواء دى، وبالتالى لو الحساس ده خرف مية البنزين اللى هتروح للمحرك هتكون مش مظبوطة، بس كدة