الموضوع: سلوك ردئ، فرضه التجار، واتبعه الكثير منا بشكل مخجل

يا بيه دى راششة جنبين وكبوت

يا باشا دى راششة رفرف وباب

يا عم دى راششة عتب

متاخدهاش دى مرشوشة كلها من برة

اووووووووووععععععععىىىىىى ى تغلط فى حق نفسك وترش العربية من برة، سيبها مخبطة كدة علشان تجيبلك سعر لما تيجى تبيع

يا باشا دى عربية لقطة، هى صحيح ماتورها مفوت وجايبة فتيس وعفشتها عايز تتغير كلهاومخبطة كلها من برة وعايز جوز اكصدامات، لكن عربية إييييييييييييييييييييه، بوية شركة برة وجوة

زمان فى عصر ابائنا كانت عيبة فى حق اى مالك سيارة من آبائنا انه يمشى بعربيته مجرحة ومخبطة، وكان ابائنا بيعملوا جمعيات علشان يسمكر العربية ويدهنها علشان يبقى شكلها نضيف

لكن فى عصرنا الذى يفرض فية الجهال مبادئهم ويسير عليها المثقفين اصبحت عيبة وخيبة ان تباع السيارة وقد تم اعادة طلائها من الخارج، يالهوى دى راشة برة، يا خرابى دى راششة برة، يانهار اسود دى راششة برة، فتكون النتيجة ان كل منا يتحمل على نفسه منظر سيارته الجديدة وقد تشوهت وتعضعضت وتكرمشت، علشان خاطر تحلا فى عين الزبون التالى اللى هيشتريها وهى لا تزال بخبطات الفابريكة، طمعا فى 1000 جنيه زيادة قد تجئ وقد لا تجئ بعد عمر طويل لأن كلنا عارفين ان الكلام بيكون كتير لكن ما يحسم الامر فى النهاية هو قدرات المفاوضة فى البيع والشراء

ليه احرم نفسى من منظر ورونق سيارتى علشان اخليها حلوة فى عين اللى هيشترى بعدى، هو انا خلفته ونسيته، انا دافع فى العربية دم قلبى علشان اركبها انا واستمتع بها انا وليس من سيشتريها بعدى،

وبالتجربة من خلال بيع وشراء العديد من السيارات تخص زملائى واقاربى، العربية السليمة الى مافيهاش حوادث مؤثرة وحالتها المكيانيكية ممتازة وصالونها نضيف بحالته، اى العربية الغير مهانة، بتتباع فى ثوانى سواء كانت راششة نص تحتانى وللا فوقانى وللا مرشوشة كلها من برة، وياما فيه عربيات ببوية الفابريكة مبتجيبش فلوس لانها حالتها تعبانة ومستهلكة

انا مش هقول انى لسة هاعلن العصيان على هذة القاعدة الجاهلية لأنى اعلنت العصيان عليها من زمان، من ايام العربية اللانوس، انا كنت راششها كلها، وبعدين بعد كدة رجعت رشيت شنطة وكبوت لانهم اتبهدلوا من قعدة العيال عليها، والعربية اتباعت فى ثوانى لأن الحالة ببتكلم عن نفسها

والعربية الشاهين كنت راشش لها الجنبين والكبوت الامامى لأانهم اتنقروا واتحكوا كتير والعربية واقفة الى جانب الكبوت اتعضعض بسبب 2 من الشباب الروش اتخانقوا عليه ، وكان لا يمكن انى اتحمل منظره كدة علشان خاطر اللى هيشترى العربية من بعدى
ومع ذلك العربية اتباعت فى ثوانى واضطريت ابيعها لواحد معرفة واعتذر لاتنين معرفة تانيين كانوا هيموتوا عليها

انا ارفض انى اسيب عربيتى مبهدله علشان سساعة لما ابيع اقول بوية شركة برة علشان 1000 جنيه زيادة تساعدنى فى شراء سيارة اخرى تتخبط منى بعد اسبوع من شرائها واسيبها برضه مبهدلة علشان ال1000 جنيه اياها، وهكذا افضل طول عمرى راكب عربية مبهدلة عشان خاطر (بوية شركة) ساعة البيع

منظر عربيتى هو جزء من مظهرى العام وكام ارفض انى اروح شغلى بقميص مقطع ارفض ان زملائى فى العمل يشوفونى بعربية مبهدلة، ويعتقدوا انى بخيل احرم نفسى من اصلاح الخبطة او انى قابل على نفسى المنظر ده علشان ال1000 بتاعة بوية الشركة

100 100
دة كلام الناس العملية