بسم الله

انا عامل تعديل فرامل الانوس كامل ورا وقدام من حوالى 4 شهور
قبل ما احكيلكو على التعديل بستغل الفرصه دى علشان اشكر صديقى ( محمد ممدوح ) على تعبه الكبير معايا وبقوله ربنا يجازيك بكل خير
واكيد لازم ننسبله الفضل فى فكرة التعديل اللى فعلا فارق كتيىىىىىىىىىىىىىىىىىر اوى فى آداء العربيه
بس هذود كام فكره على التعديل وده من خلال تجربتى علشان فعلا يبقى perfect وتحس انك راكب عربيه تانيه مش دايو خالص

بس قبل التعديل لازم تركب جنوط وكاوتش يا اما ( 185\60\14 يا اما 195\50\15 ) ودة اللى انا مركبه
حاول تجيب الجنوط اندونيسى ومتجبش صينى علشان متعزبكش فى الترصيص وتعيش معاك وتجيب كاوتش نظيف مثلا ( برجستون ) ومتنزلش عن ( الكومهو ) كويس بالنسبه لسعرة
هيفرق معاك كتير
نيجى بقه للتعديل
ونبداء بالسهل الامامى
1 - طنبورتين ماركة ( ليمفوردر) المانى بتوع اوبل فكترا ب 300 جنيه من عند بتوع قطع غيار الامانى جنب محل الشاطر لقطع غيار الامانى الاستعمال امام محل الروضة ( جديد زيرو )
2 - طقم تيل فرامل ماركة ( جولد ) كورى بتاع دايو نوبيرا او شيفورلية اوبترا ب 45 جنيه من عند بتوع قطع غيار الكورى ( جديد زيرو )
3 - طقم كالبرات بتاع (لانوس 1600 او دايو اسبيرو) كورى ب 150 جنيه من عند محل الروضه فى الحرفيين ( استعمال خارج )
4 - ماستر فرامل عمومى بتاع ( نوبيرا مقاس 22 ) وده ليه حلين يأما جديد ماركة ( ماتيللى ) ايطالى ب 270 جنيه ( ملقيتوش ) ويا أما استعمال من عند محل الروضه او الشهبندر اللى جنبه ب 130 جنيه ( استعمال خارج )
5 - علبتين زيت باكم ماركة ( لوكهيد ) انجليزى ب 33 جنية من محل جنب الشهبندر على طول
6 - هنغير خرطوم الهواء اللى واصل بين السيرفو والمانفيلود ( ودة المسئول عن شفط الهواء من السيرفو وذيادة القوه الفرمليه ) بخرطوم بتاع عربيه بولو المانى ( استعمال خارج )

كل المكونات السابق ذكرها فك وتركيب مسامير بكل سهولة وبدون اى تعديل يعنى عل وضعه
.
وبكدة التعديل الامامى اكتمل ...

هنيجى للصعب بقى !!!؟

التعديل الخلفى
او تركيب فرامل سكينه وراء

1 - جنبين خلفى كاملين بتوع (اوبل فكترا مكنة 2000 cc موديل 95 او اوبل استرا مكنة 1600 cc موديل 2002 ) ودول اللى انا جبتهم لانهم احدث وانضف ب 450 جنيه من عند محل الشاطر امام محل الروضه مباشرة

هتحتاج اثناء التركيب لتعديل قاعدتين علشان يمسكو جراب فرامل الهاند ودول هيبقو راكبين على الدونجل الخلفى
ودة الجزء الصعب فى كل الموضوع

وبكدة زيارة واحدة للحرفيين و فى منطقة لا تتعدى ال200 متر هتجيب بأذن الله كل حاجتك وتخلص تعديلك الكامل للفرامل .....

ملحوظات هامه جدا .....

1 - تأكد من اختيار المكونات الاستعمال بحاله جيده جدا
2 - تنظيف المكونات ومكان تركيبها فى العربيه جيدا
3 - احكام ربط كل المكونات وشيك عليها بنفسك دى فرامل يعنى ارواح
4 - استنزاف الهواء الموجود فى دورة الفرامل جيدا مرة واثنين وثلاثة ( مهم جدااااااااااااااا)
5 - الفرامل هتحتاج وقت كبير علشان تطبع ومتنساش ان الاربع عجلات مغيرين تيل يعنى هتحس اول يومين ان الفرامل ضعيفة شويه
6- من الافضل انك تركب المكونات ( التعديل ) فى مكان قريب ليك ( يعنى متركبهاش وتسافر ) علشان لو فى اى مشاكل فى التركيب يمكن تداركها .


دة كدة التعديل الكامل

ايه الفرق بين قبل وبعد ؟

قبل
1 - انا معايا العربيه زيرو ومفيهاش مشاكل بس على سرعة 140 كيلو فيما فوق لوطلعت وقفت فوق الدواسة العربيه هتهدى لاكن مش هتقف يعنى العجل مش هيكلبش الا لما تهدى وبراحتها اوى
2 - العربية بتاكل تيل جامد والطنابير بتقفع بسرعه من السخونة الذايده ( يعنى لما تدوس فرامل تحس برعشه فى الدركسيون )
3 - لو انت جراى وبتفرمل كتير هتشم ريحة شياط من كتر سخونة الطنابير والتيل دة غير ان قوة الفرامل هتنخفض بمقدار 40%
4 - لو دوست فرملة جامدة على سرعه هتلاقى وش العربيه نزل فى الارض والشنطه عومت معاك لان الفرامل بتعتمد بنسبه كبيره على العجل قدام وبخاصه لو رجلاش العجل اللى وراء مهوى
5 - بتحتاج كل فترة تعمل تنظيف ورجلاش للعجل الخلفى عند ذيادة مشوار فرملة اليد لان اليد والفرامل الخلفى على تيل واحد ( انخفاض دواسة الفرامل مع الوقت )

بعد التعديل
1 - دوست فرامل جامد من 140 كيلوالاربع عجلات كلبشو وطلعو دخان والعربية وقفت فى خط مستقيم
2 - مفيش السخونه الزايدة والتيل مش بيتاكل بسرعه
3 - مفيش ريحة الشياط ومفيش انخفاض فى قوة الفرمله مع كتر الاستخدام
4 - ثبات العربيه مع الفرامل المفاجئة لان الاربع عجلات بيمسكو فى وقت واحد ذى الالمانى
5 - مش بتحتاج تعمل رجلاش لان الفرامل وراء بقت سكينه يعنى بتعمل رجلاش لنفسها اوتوماتيك ( ارتفاع دواسة الفرامل ثابت مع الوقت )

دلوقتى معاكو التعديل كامل بمكوناتة واماكن شرائه وتكلفتة وفوايده


ولا تنسونى من صالح دعائكم لى

اخوكم عصام غنايم



ابو فارس