الموضوع: مأساة المخالفات ( نداء للسيد وزير الداخلية )

قصتي بالتفصيل يا سادة يا كرام كالتالي:

اشتريت عربية أوكتافيا a4 موديل 99 في أواخر 2006 و طبعا أخدت من البايع توكيل و شهادة برائة زمة و كان عليه مخالفات بحوالي 5600 جنية (و ده ايام قانون المرور القديم) يعني الراجل كان عايش حياتة بالعربية. المهم كان فاضل على انتهاء الرخصة حوال 8 شهور فقلت امشي بيها بالتوكيل شوية و ما انقلش الملكية دلوقتي علشان كمان العربية كانت محتاجة رشة نظافة و كان فيها كام خبطة بسيطة من الرفارف و قلت اريح شوية من سعر العربية و بعدين ابقي اعملها.
المهم في شهر يونيو 2007 دخلّت العربية سمكرة و دوكو و ضبطتها و قولت اروح انقل الملكية و كان لازم طبعا اروح اجيب شهادة مخالفات تاني علشان اللي معاية عدى عليها شهر ، و المفاجأة لقيت الموظف بيقولي خد ادفع دول.
ببص على المخالفات لقيتها كلها قبل تاريخ استلامي العربية من البايع و الاجمالي هو 700 جنيه. حاولت أفهم الموظف اني واخد شهادة برائة زمة من البايع في التاريخ ده و تواريخ المخالفات كلها قبل استلامي السيارة. قالي خوش قول الكلام ده لوكيل النيابة.
دخلت لوكيل النيابة و حكيتلوا و قصتي قالي :باحترام أنا مصدقك بس المخالفات دي ما كانتش جاتلنا ساعة ما الراجل اللي باعلك العربية عمل شهادة برائة زمة و كان لازم تنقل الملكية في ساعتها و دي مخالفات لازم تتسدد ، ادفعها انت و بعدين حاول تاخدها من الراجل اللي باعلك العربية ، قولت أمري لله و راح وكيل النيابة مخفضلي المخالفات لحد 350 جنيه و رحت ادفع زي الباشا (و مشيها باشا) و كملت الاجراءات اللي أخدت 3 أيام من العذاب لحد ما مسكت الرخصة في ايدي و الحمد لله ، و لما حاولت أكلم الراجل اللي باعلي العربية لقيته سافر فرنسا و مش عارفين ممكن يرجع تاني امتي، و استعوضت الله في ال 350 جنيه.
و بعديها ب 4 شهور جاتلي فرصة للعمل بقطر و ذلك بفضل من الله ، و كان لازم اسافر باسرع وقت ممكن فحاولت ابيع العربية بسعر معقول علشان ما أخسرش كتير لكن معرفتش قولت خلاص احوطها في جراج و أمري لله و فعلا اتفقت مع جراج و أخد مني 1200 في السنة و قولت مش مشكله على الاقل لما انزل اجازة ابقى الاقي عربية تحت رجلي أحسن من الايجار.
و بعد 5 شهور في قطر اشتريت عربية أوكتافيا a5 مويل 2008 قولت انزلها معايا مصر أن شاء الله في النزول الاخير و معظم التوكيلات هنا بيديلك العربية مرخصة جاهزة باسمك علشان ماتتعبش نفسك و تروح المرور.
و بعد سنة لما رخصة العربية قربت تنتهي قولت اروح علشان اجدد روحت شركة التأمين و دفعت سنة في 10 دقائق بالضبط و أخدت الوثيقة و طلعت على مكتب المرور و قولت و أنا داخل( استعنت علي الشقا بالله) و كنت واخد صور من الرخصة و البطاقة و الباسبور زي ما انا متعود في مصر
لقيت جهاز الدور(اللي بتلقية في كل حته في قطر ما عدا السفارة المصرية) أول ما دخلت رحت و اخد رقم و كان فاضل علي دوري 15 فرد قبلي و أخدت كرسي و قعدت اراقب ال 8 من 12 شباك شغالين او بعد حوالي 5 دقائق فقط لقيت رقمي ظهر و رحت للموظفة و اديتلها رخصة العرية و قولتلها
لو سامحتي عايز اجدد الرخصة دي أعمل ايه
قالت: فين وثيقة التأمين
أنا: اتفضلي
الموظفة تهمهم وهي عينيها تراقب شاشة الكميوتر : مافيش مخالفات
الموظفة: فين كارت البنك (تقصد ال atm)
أنا: اتفضلي
الموظفة: الرقم السري لو سمحت
فاسرعت و ادخلت الرقم السري بسرعة لدفع 100 ريال رسم التجديد لمدة سنة
الموظفة بعد حوالي دقيقتان : تسحب الرخصة من الطباعة اللي جنب منها و تقول اتفضل و تبقي تلزق الاستيكر ده علي النمرة
أنا ببلاهة: و بعد كدة أروح فين
الموظفة باستغراب : تروح فين؟ خلاص كدة الرخصة الجديدة و الاستيكر و ايصال السداد معاك انت مش عربيتك 2008 يعني مافيش فحص
أنا ببلاهة و زهول أشد : يعني كدة خلاص
لم ترد علي لاني تقريبا خنقتها و سمعت صوت الشاشة تطلب الرقم التالي.
و خرجت و أنا مازلت مصدوم و غير مصدق ما حصل و اتصلت بزوجتي و انا اصرخ جددت الرخصة في 10 دقائق أنا مش مصدق و يتوارد علي ذهني الثلاثة أيام من العذاب لتجديد رخصتي في بلدي.
و لما سألت بعد كده من عمل السيستم بتاع المرور ده قالوا ان معظم أنظمة الحكومة الالكترونية عملتها شركة نظم معلومات معظم العاملين بيها مصريون.
"طب ما إحنا حلوين أوي اهوه" و قعدت أقول حسبي الله و نعم الوكيل في اللي كان السبب.
و بعد كده بحولي 6 شهور أخدت أجازة شهر و نزلت مصر و رحت اطلع العربية من الجراج و طبعا لقيت البطارية لقيت مصرعها و ظهر بعض الصدأ في بعض الاجزاء الحديدية في الموتور لان الجراج كانت الرطوبة عالية فيه
و قررت ابيع العربية قبل ما امشي رغم ان اسعار المستعمل نزلت كتير و فعلا لقيت مشتري و بعتها بخسارة حوالي 9000 جنيه بعد حوالي اسبوع و بعتهالوا و طبعا كان لازم اجيب شهادة مخالفات تاني.
المهم روحت المرور الساعة 7.30 صباحا و قولت علشان ابقى أول واحد و أخلص بدري لكن القدر لعب لعبتة و رحت لقيت عربية ثانية جت قبل مني و قولت مش مشكلة ابقي ثاني واحد.
و فضلت واقف قدام الكشك علشان اشتري ورقة مخافات لمدة ساعة وربع لحد ما البيه بتاع الكشك الله يكرمه فتح باب الكشك الساعة 8:45 وطبعا كان واقف قدام الكشك حوالي 80 واحد يتصارعون للوصول لشباك الكشك الصغير طابور مين يا عم الحج و بعد صراع من اللكزات و الدفع و الدوس علي الرجلين استمر لمدة 20 دقيقة بلا رحمة وصلت الشباك و قلت للراجل حرام عليك فتحت متأخر ليه قالي و انت مستعجل ليه كده كده بتوع النيابة ما بيشتغلوش قبل الساعة 9 ، المهم أشتريت الورقة و طلعت اجري علي مبني النيابة ، و فعلا لقيت 6 طوابير قدام 6 شبابيك لايقل طول الطابور الواحد عن 50 فرد و ما فيش حد قاعد علي الشبابيك و لما سألت فين طابور مخالفات الملاكي قالولي هنا ، و رحت واقف و فعلا الساعة 9:05 ابتدى الموظفين يتكرموا علي الناس و يشتغلوا و كانوا ممشين نظام غريب اولا يأخدوا الرخص من 10 أفراد و بعدين يغيبوا في الارشيف حوالي من 20 الى 30 دقيقة و بعدين ينادوا علي الاسماء ، و يا تسمع يا ما تسمعش و طبعا الناس اللي سلموا رخصهم كانوا لازقين في الشباك علشان يسمعوا اسماءهم و العربية اللي ما فيش عليها مخالفات بتكتبلوا لايوجد مخالفات و بعدين تأخدها و تروح تقف في طابور علشان تمضيها من و كيل النيابة و بعدين تروح تقف في طابور تاني علشان تختمها و اللي عليه مخالفات ده موضوع تاني.فيها 3 طوابير كمان.
المهم وصلت للشباك بعد حوالي ساعتين و سلمت الرخصة و استنيت حوالي ½ ساعة في مفرمة جنب الشباك علشان اسمع اسمي ، و قالتلي هات بطاقتك و بسرعة البرق ادتلها البطاقة راحت مدياني 4 مخالفات في دبوس و قالتلي روح ادفع و تعالي
اخدت المخالفات و انا مذهول ازاي دي العربية كانت مرفوعة سنتين و راجعت التواريخ و فعلا لقيت التواريخ كلها اثناء ما كنت مسافر و ما فيش حد طلع العربية من الجراج طول هذة المدة لان مفتاحها الوحيد معايا.
و المصيبة الاكبر اني اكتشفت ان أول و رقة مخالفات كانت بنمرة عربيتي و خانة السائق فاضية و الثانية كانت بنمرة عربيتي و واحد سايق اسمة كريم و الثالثة و الرابعة نمرة عربيتي بس اخرها 9 مش 8 و السائق اسمة كريم.
كريم مين ده اوعوا بقا ، يا مدام يا مدام المخالفات دي مش بتاعتي العربية كانت مرفوعة خلال السنتين دول ، ردت بنرفزة خوش لوكيل النيابة قوله.
و وقف في طابور و كيل النيابة و لما دخلت شرحت الموضوع و ورتله ان اخر مخالفتين حتي مش بنمرة عربيتي
قالي طب ارجع للموظفة علي الشباك و قولها انت المخالفات دي مش بتاعتك. و مرة تانيه صراع اخر حتي وصلت للشباك و قولتلها وكيل النيابة بيقولك ان المخالفات دي مش بتاعتي ،
الموظفة : بصت في أول مخالفة و قالتلي هي دي مش نمرة عربيتك؟
أنا : اه بس العربية كانت مرفوعه في الفترة دي
الموظفة : ان ما ليش دعوه بالكلام دة
أنا : طب بصي في الباقي يا مدام مين كريم دة اللي سايق عربيتين بنمرتين ورا بعض
الموظفة : بعد ما جت على نفسها و قلّبت في الورق و سحبت آخر مخالفتين قالتلي خلاص روح ادفع دول
أنا : طيب علي الاقل واضح ان الاسمه كريم ده هو نفسة سائق العربية اللي 219 مش 218 فاكيد اللي كتب النمرة كتبها غلط
الموظفة بعصبية شديدة جدا بعد ما سحبت المخالفة الثانية و قذفت في وجهي المخالفة الاولى: روح ادفع بقا يا استاذ
و هنا مر شريط تجديد رخصة العربية في قطر من أمام عيني و حسيت برغبة شديدة اني انط من فوق الازاز و انهال عليها بالضرب لحد ما يبان لها صاحب ، لكن مسكت نفسي و قولت عدي الاجازة دي علي خير.
و رحت اقف في طابور وكيل النيابة علشان يخفض المخالفة من 300 الي 150 جنيه و بعدين روحت وقفت في طابور الخزينة علشان ادفع و كان الاستاذ المحترم المحصل بياخد 4 مع بعض علشان دفتر الايصالات بيبقي 4 ايصالات في صفحة واحدة و هو مش عايز يشيل الكربون و يحطة تاني في كل ايصال و اذا كان عجبك ، و بعدين رجعت تاني للموظفة علشان تشوف ايصال السداد و اخد الشهادة و الحمد لله اخدتها و بعدين روحت وقفت في طابور للتسجيل و هو شباك علية موظف و جهاز كمبيوتر مهمتة ان يسجل ايه بالضبط مش عارف. و بعدين طابور النيابة علشان امضاء السيد الوكيل و أخيرا طابور الختم و كانت الساعة ساعتها 2:30.

أعتذر للتطويل الشديد لكن انا متاكد ان فيه ناس كتيرة جدا حصل لها زي اللي حصلي و اتظلمت زي وجايز اكتر مني

و السؤال للسادة المسؤلين متي ستنتهي هذه المهزلة المستمرة.

مش هاقول حاجه ذياده اكتر من اللي انا كاتبه في توقيعي وربنا يعينا ويعينك في البلد ديه