يعني يا محمد انا قصدي إن في مجتمعنا فيه حالة كبيرة من التناقض في موضوع العلاقات فا بتخلي شخصيات الأفراد هلامية !

يعني فيه بنت مثلاَ يقعدوا يقولولها في البيت الكلام مع الولاد عيب و مش عارف إيه .. تروح الجامعة و تدرس درس في كتاب اللغة الإنجليزية اللي هو منهج جامعة كامبدرج بيتكلم عن ال lifestyles و منهم الحياة مع بعض بدون زواج .. أو العلاقات الجنسية بدون إرتباط (يعني الجنس من أجل الجنس) .. أو إقتسام شقة مع صديق يكون رجل .

طبعاَ ده بيعمل تناقض في دماغها بين اللي بتعرفه في حياتها و اللي إتربت عليه .

ولد طول عمره في مدارس ولاد بس و مش متعود عالإختلاط لا في نادي ولا في صحاب ولا في أي حاجة .. بيخش الجامعة يلاقي ولاد و بنات بيتعاملوا مع بعض عادي و محدش بيعض حد يعني! يبتدي الموضوع يجننه و ميبقاش في دماغه غيره !

و فيه بعض المفاهيم مش في مصر بس .. بس زيادة عندنا شوية .. زي إن الولد كل ما البنات اللي مصاحبهم كتروا -خاصة لو حلوين- كل ما بقي شاب صايع و جامد! و البنت كل ما كتر الولاد اللي عايزين يصاحبوها و يتعرفوا عليها و هي تقيلة عليهم بقت كدة جامدة! و ده بيخلي الشخصية مريضة فا في النهاية لو فيه علاقة بتبقي مريضة !

نفس الكلام في الجواز .. واحد يقولك انا هصاحب و ألف و أعمل بس هتجوز واحدة قطة مغمضة! طب هل ده صح يعني !؟ ماهو عبط برضه ! و يعيب الرجل أكتر من المرأة! و بعدين اما كل واحد يبقي له واحدة للحب و واحدة للزواج .. مش هيبقي فيه قطط مغمضة ! ببساطة هتبقي كانت قطة واحد تاني قبل كدة بس كدبت و خبت عليك و إنت عامل فيها عنتر الرجال .. و برضه لازم هتطلع أخت حد و مخبية عليه! لأن المجتمع لا يسمح لها بالصراحة .. إضافة إلي أن الموضوع مش عيب أصلاَ .. يعني يا جماعة هو غلط الواحد يرتبط بواحدة كانت مرتبطة قبليه في حدود الأدب؟ هي البنت سلعة و اما ترتبط بحد خلاص كدة بقت مستعملة !؟ طب ماهي ممكن تكدب عليك و تمثل البراءة عادي! هيحصل إيه من الصراحة !؟ هل المجتمع لازم يعاقبها عشان عندها مشاعر و حبت حد !؟

نفس الموضوع في الجواز .. ييجي الولد أو البنت يتجوزوا بعد حياة مليئة أو عديمة الهلس يقولك الناس بتعمل إيه عشان يتجوزوا ؟ أه عند سن معين يحدده المجتمع .. و بشروط معينة في شريك الحياة برضه يحددها المجتمع .. و كل الناس لازم تتجوز .. طب خلاص علي بركة الله! الفاتحة!

مين فينا مبيحبش الأفلام الرومانسية ؟ أهو ده خلق برضه شخصيات متناقضة بتقعد تقول ده ميصحش و مع ذلك تقعد تستني فيلم روميو و جوليت أو تيتانيك لو بيتعرض في التليفزيون!

لو فيه ناس مرتبطة و علاقتهم كويسة ببعض مفيهاش أي شئ يعاب و هم شخصيات ناضجة و عارفين إيه الصح و الغلط .. يبقي فين العيب ؟

انا بتكلم عن اللي بيحصل من فضلكم محدش يقولي أصل الدين بيقول و الشرع بيقول .. انا بتكلم عن الوضع الحالي .
و محدش برضه يقولي الباب و الشباك و الدولاب ! لو كل واحد هيبقي مفروض عليه يخطب واحدة عشان معجب بيها (مع متطلبات الخطوبة حالياَ و شبكة مش عارف إيه و لازم مرتب كام) يبقي إنت كدة بتعمل رعب للشباب عالفاضي .. و طبعاَ مش هينفع أروح لواحد أقوله انا معجب ببنتك بس مش هخطبها!

المجتمع لا يسمح بالصراحة !