الموضوع: حراره السياره ارتفعت فجأه و تم عمل الأصلاحات الازمه و اليكم التفاصيل

البدايه كانت ان اخويا كلمنى و قاللى ان امبير الحراره فى عربيته لانوس 2002 على فيها للأخر اكثر من مره فقلتلو اركن على جنب و بطل العربيه و انا جيلك

المهم رحتلوا فى خلاال نص ساعه و دورت العربيه لقيتها سخنه لسه فزودت مياه فى القربه لقيتها بتغلى فى ساعتها تصوروا بعد نص ساعه العربيه واقفه و المياه غليت فى ساعتها المهم قلتلوا من الواضح ان العربيه كانت سخنه ببشاعه

اتصلت بالأخ و الصديق العزيز محمد ممدوح و اتفقتا انى اروح لمحمد عبده ووصى علينا و رحت لمحمد عبده و لقيته مستنينى بعد ما ممدوح عمل الواجب

المهم العيب طلع فى ترموستات الكوعه و تم تغيير الأتى :

1-ترموستات gm اصلى و كوعه و جوان
2- طرمبه مياه
3- سير كاتينه
4-بليه
5- بوجيهات

و شويه رفايع تانيه

طبعا فى حاجات من اللى اتغيرت ماهاش دعوه بالمشكله بس سير الكاتينه كان لازم يتغير لآن طرمبه المياه يتلف عليه مع ان السير القديم كان بقالو 20.000 راكب بس هوا قالى ان سنون الطرمبه القديمه معلمه فيه و طالما غيرنا الطرمبه يبقى لازم نغير السير و البليه طلعت وحشه فغيرناها بالمره

المهم قطع الغيار اتكلفت حوالى 500 جنيه انا رحت جبتها بنفسى من عند ابو الحسن و كلها حاجات اصليه و بالنسبه لمحمد عبده الراجل مشكورا اخد مصنعيه 100 جنيه و الحمد لله العربيه رجعت احسن من الأول

بس عبده نبهنا انه فى احتمال ان العربيه تكون جابت جوان و انه مش هيبان دلوقتى و قال لنا خلوا بالكوا اليومين الجاين لو الحراره عليت تلنى يبقى فيه جوان و لو الدنيا تمام يبقى عدت على خير و الحمد لله

المهم العربيه بقالها اسبوع و الحمد لله تمام و مفيش مشكله و مجبتش جوان و الحمد لله

كل الشكر لمحمد ممدوح و محمد عبده

بس انا عندى سؤال هل بعد درجه الحراره معليت اوى كده من المستحسن تغيير الزيت علما بأنه كان حاطط visco 5000 من حوالى 5000 كيلو فقط بس لاحظنا ان الزيت نقص شويه و لونه اسود جداااااا فأنا فسرت ده انه نتيجه الأرتفاع الكبير لدرجه الحراره و اتأكدت ان الزيت ده جامد و الحمد لله لأنه استحمل الأجهاد الحرارى اللى حصل للعربيه

المهم السؤال هل من الأحسن يغير زيت دلوقتى ولا يزوده و يستنى ال 5000 كيلو الباقيين عادى ؟

تحياتى