الموضوع: إستفسار بخصوص اسعار قطع غيار بولو 2001 ؟؟؟

الIbiza طول عمرها اسبانى (و بتتعمل فى مصنع Seat فى Martorell و الموتور و العفشة المانى) و الموتور بتاع الPolo هو بتاع الIbiza نفس القوة و نفس الخامات و بتفرق فى الفتايس شوية عشان نسب النقلات.

ياااااااااااا انت فين يا عم عماد عاش مين شافك يا راجل ليك شوووووقه ( حسن حسنى ) وبعدين دا انا الشربينى حبيبك بالراحه شويه عليه الله يكرمك ويخليهوملك ويخليلك حبة العربيات الحلويين الى انت لسه قايلى عليهم دول اه بس أرجع واقولك عندك حق ما انا جايلك فى عقر دارك وغلطلك فى الابيزا اسمك المستعار ونوعك المفضل فعلى طول طاخ طيخ

بالنسبة لكلام سيتك دا انت لو تاخد بالك من كلامى هتلاقينى بقول تقريبا يعنى كلامى مش عن معلومات فنية او علميه أكيده بس أرجع واقولك ان الى أعرفه و أكيد ان الابيزا تجميعها برازيلى والبولو تجميعها المانى وبالتالى على كلامك ان الابيزا اسبانى يبقى الشاسيه والخامات اسبانى اما البولو المانى والى شبه مؤكد البولو ماتورها المانى اما الابيزا فهى أسبانى وبعدين دا انت يا راجل بتقول انها طول عمرها اسبانى يبقى ماتورها المانى ازاى الا إذا كنت تقصد كل ما هو غير الماتور والعفشه هيه الى اسبانى بس حكاية ان البولو والأبيزا نفس الماتور دى مش عارف ليه مش مقتنع بيها والسبب :

1- لما سالت واحد صاحبى معاه ابيزا 2000 قالى ان البولو سواء ال 2000 او ال 2001 طلعتها احسن وسحبها أحسن 2- سألت واحد تانى قالى ان فى واحد يعرفه كان معاه ابيزا سافر بيها سفريه جه بعها ودا على كلامه انها مش بتاعة سفر كتير
3- نرجع بقى لصاحبى تانى مره سافر بيها بتاع 50 كيلو كدا تقريبا لاقى أمبير الحراره جاب أخره وبعدين لما سبها وجه يروح لاقاه رجع تانى بقى فى النص .( انا عارف انها ممكن تكون حالة فرديه بس برده تقريبا مبتحصلش مع البولو )
4- هات انت كدا عربيه بولو 2000 مع عربيه ابيزا 2000 والاتنين 1000 سىسى على طريق سريع وشوف مين يعدى يا ريس . ( واى خدمه )

انا على فكره بعيد تانى انا كلامى دا معتمد على سماع من ناس وعلى تجربة ناس يعنى مش عن تمكن ولا حاجه .

[QUOTE]لو بتتكلم عن ما قبل ال2000 فا الاتنين واحد اما من 2000 فا طبعا طابلوة الPolo احلى و خصوصا العدادات بتاعة الGTI اللى فية رينجات نيكل.[/QUOTE]

تمام يا باشا كويس ان اتفقنا فى حاجه

هنا نختلف, الIbiza اوسع فى الصالون و الشنطة و الحوض و عموما الIbiza اطول و اعرض من الPolo و دة لان ال Ibiza بتستخدم شاسيهات اكبر و ممكن تحط فية المواتير لحد 2800 من غير اى تعديل اما الPolo كانت بتستخدم شاسيهات صغيرة نسبيا و تاخد لحد 1600 بس اكتر من كدة تحتاج شغل كتير.

ماشى يا سيدى ما اختلفناش بس فى حاجه - ان مش كون ان الابيزا أطول و أعرض من البولو فلازم ان صالونها وشنطتها يكونوا أكبر هو الممكن انهم يكونوا زى بعض انما أكبر مظونش دا كفايه يا راجل الطابلوه الى بيبقى زانق على الراكب الى جنب السواق الى تحس وانت أعد ان المنطقه الى قدام خاصه بالسواق بس
- اما الحوض فهو فعلا أكبر ودا يخلينى أقولك ان مين قالك انها بتتحسب على حسب تسقيطك للمواتير فيها والسبب أن أكتر الناس بل أكتر من المعظم كمان مبيفكروش فى المواضيع دى بس هيه تفرق طبعا مع الناس الى غاويه تسقيط وكدا فقط لا غير .

و بالتالى قاعدة العجل فى الIbiza اعرض = ثبات اكتر.

يا عمنا بس مش دا السبب الوحيد لان اساسا البولو ال 2000 وال 2001 بتيجى ب جنت 13 فبالتالى كوتشها طخين شويه اما الابيزا 2000 فبتيجى جنتها 14 وبالتالى كوتشها أرفع شويه وانت سيد العارفين ان الجنط كل اما بيكبر بيساعد فى سهولة التحكم فى العربيه وكمان فى ثباتها

وبعدين يعنى مش شرط اوى ان كل اما الشاسيه يكبر دا معناه ثبات اكتر لان فى عربيات كتير شاسيهاتها أصغر وثابتها أكتر من عربيات شاسيهاتها أكبر وعلى فكره دا برده بيختلف ساعات من إحساس واحد للتانى .

وكفايه بقى لانى وجعت دماغك

[QUOTE]الPolo لحد 2001 كانت كلها المانى من الاكصدام للاكصدام بس بعد كدة (الله يسامحهم) ابتدوا يجمعوها برة.[/QUOTE]

انا كان قصدى انى المؤكد ان البولو ماتور وشاسيه ومن الاكصدام للاكصدام زى مابتقول المانى انما الى شبه مؤكد الابيزا ماتور وشاسيه اسبانى .

اما بالنسبة لتاكدك دا يا بروفيسور عماد هل انت قرأت made in germany على ماتور الابيزا زى ما بتقرأه على ماتور البولو كدا اصل انا وانا باخد بصمة الماتور وانا بفحص بصراحه قرأتها فعايز أتاكد من سعتك

[QUOTE]الPolo ممكن تحط الاستبن لحد 14 مكانة بالعافية انما الIbiza تحط استبن 15 مرتاح.[/QUOTE]

طيب يعنى مش ممكن برده ان تكون تقويره مكان الاستبن فى الابيزا تكون هيه الى كبيره شويه عن البولو وميكونش دا له تاثير على حجم الشنطه ذات نفسها

[QUOTE]هو فعلا مش شرط, بس لو انت عامل العربيتين و مديهم نفس العفشة بس دية شاسيها اطول و اعرض سنة هتديك ثبات اكتر + ان فية حاجة اغلب الناس متعرفهاش, ان الPolo نازلة على سوست اعلى فا دية حاجة مش فى صالح الثبات.[/QUOTE]

بس برده أعتقد ان الجنوط والكوتش برده بيفرق كتير بس لو قصدك انه عربيتين حطينا فيهم كل حاجه زى بعض وشاسيه واحده اكبر سنه دا بيديها ثبات أكتر دا بقى مش متأكد منه بصراحه وعشان كدا مش عايز افتى

[QUOTE]انا عربيات اخواتى الاتنين Stock (يعنى زى ما جم من المصنع) الملف اللى اخدة على 100 فى الIbiza اخدة على 80 فى الPolo.[/QUOTE]

وبرده فى النقطه دى مقدرش اقولك او أديك معلومه أكيده لانى بصراحه لسه مجننتش وخت ملف وانا على السرعات دى

وفعلا هيه بتبقى حالاااااات عواصف ذهنيه متعبه لأصحابها

نسيت أسألك يت عماد انت مسقط فى البولو بتاعتك ماتور 1400 ولا هيه جايه كدا stock على رأيك ؟

المشاركة الأصلية كتبت بواسطة elshrpeny

السلام عليكم ورحمة الله وبركاته

انا على فكره زيك تقريبا بس ممكن اقدر افيدك بحاجات قليله على أدى كدا

بالنسبه لأسعار قطع الغيار فا هى معقوله يعنى لا غاليه ولا رخيصه بمعنى لا هيه مرسيدس وبى أم ولا هيه 128 و شاهين

ثانيا : الميزه بقى بتاعة العربيه دى وقطع غيارها انها بتعمر يعنى لو حافظت عليها تعد معاك يعنى اصبح السعر كدا مقابل الاداء
وعلى العموم لو عايز تعرف اسعار حاجه معينه الاعضاء هنا ليهم خبره فى الموضوع دا أكتر منى وهيقدروا يفيدوك إن شاء الله

ثالثا: اما بقى بالنسبه للعربيه وانت بتشتريها فا أهم شىء حالة الماتور ثم حالة العربيه نفسها الى هو الهيكل يعنى
بمعنى انك تتأكد ان الماتور متحلش يعنى متغيرش او متعملوش عمره مثلا بعد كدا تشوف بقى الهيكل يعنى تشوفه مردود على البارد بمعنى انك هتلاقى حتت مموجه كدا مطرح طرق الشاكوش بتاع السمكرى وهو بيرد المنطقه الى دخلت لجوه اين كانت فى انحاء العربيه و لو راشش يبقى اترد على الساخن يعنى اسروخ وأخد معجون وأسنفر وفى الاخر اترش ولا مغير قطع زى رفرف مثلا ابواب كدا يعنى وكذلك من جوه الفرش والتابلوه وتشوف العداد برده جايب كام لحد 100000 كيلو تبقى العربيه تقريبا فابريقه دا بعد ما تتاكد طبعا من الى انا قولتهولك وكل دا يتشاف فى النهار اوعى تشوف الكلام دا بالليل عشان تقدر تفرق بين بوية الشركه وبوية الرش وعلى العموم بوية المصنع بتبقى عاطية بريق كدا مميز وملفت ورايق يعنى بمعنى اصح تقدر تشوف نفسك فيها زى المرايه .

وإن شاء الله ربنا يوفقك فى عربيه بولو 2001 حالتها ممتازه .

عمرو

ممكن الاتصال بمحلات فتح الباب فرع رمسيس (25775994) او فرع الحرفيين (26996561) او فرع الهرم (35875710)