الموضوع: عالم الشبكات

انا فعلا مبسوط يا جماعة من الموضوع و كل الاعضاء اللى تجاوبوا معاه.

بالنسبة لرأيى، انا شايف انك الخلاصة عايز تعمل software switch ، هو طبعا شىء ظريف جدا انك تعمل حاجة زى كدة بايدك و هتتعلم كتير قوى و مفاهيم كتير هتتحفر فى دماغك. بس حتة انك تضرب سيسكو دية مش صح اوى، انت ناوى تعمله على Operating System ايه؟ لو ويندوز يبقى كل سنة و انت طيب!! لو لينوكس ممكن ينطق شوية لكن لا اعتقد انه بأى حال من الاحوال هيديك Performance احسن من سويتش رخيص (مش سيسكو).

خلى بالك من حاجة، انت عندك overheads كتيرة جدا، عندك نظام التشغيل و الdrivers بتاعة الLAN. فى حين ان السويتش بحجمه المدمج هيبقى السوفتوير بتاعه مكتوب بLow-level language عشان يدى اداء افضل بكتير ده غير ان ممكن تلاقى ال embedded system متأيف كويس عشان يعمل العمليات المطلوبة بأسرع شكل، انما انت بتحاول تستخدم GPP(General Purpose Processor)

انصحك انك تكمل فى الموضوع ده عشان هيفيدك فعلا بس متزعلش لو لقيت الاداء بتاع السيستم بتاعك اقل من بتاع سيسكو لان ده المتوقع، بس تبقى عملت حاجة مفيدة لنفسك.

المشاركة الأصلية كتبت بواسطة mrwho1982

ولو عملت شيكة بين جهازين ففقط ممكن تعمل السللك stright or cross

السللك في كلتا الحالتين هايشتغل بس لازم تكون مدي نفس ال gate way للجهازين

في ناس كتييييييير تقول الكلام ده غلط بس انا باكد ان الكلام ده صح واتحدي

يعني مثلا الجهاز رقم واحد يكون الاي بي بتاعة 192.168.1.12
والماسك بتاعة 255.255.255.0

والgateway 192.168.1.1

والجاهز التاني نفس المواصفات بس هاتغير اخر رقم في الاي بي يعني هايكون كالاتي 192.168.1.13

والماسك بتاعة هوهو وال لشفث صشغ بتاعه هو هو

الموضع مش فزلكة والله بس انا مجربها وكان في نقاش حاد بين 3 زمايلي النهاردة والحمد لله كبستهم

للاسف يا باشا انا من الناس اللى شايفين ان الكلام ده غلط.

اولا، طبيعى ان الGateway و ال Subnet Mask يبقوا واحد للجهازين و اكيد ال IP بتاعهم هيبقى مختلف. لغاية كدة عادى و فوق العادى و مفيهوش مشاكل.

نيجى بقه للنقطة اللى مش منطقية، انت عايز توصل جهازين بكابل Straight Through . الكلام ده مش ممكن هينفع و هوضحلك ليه. السلوك اللى فى الكابل لما بتيجى تحطها قى ال RJ45 Connector بطريقة معينة و تيجى على الطرف التانى من الكابل و تحط السلوك بنفس الاسلوب يبقى انت كدة عندك كابل عدل Straight Through، ال TX wires و ال RX wires زى بعض فى الطرفين.

تخيل ان احنا وصلنا الجهازين بالكابل ده زى ما انت بتقول، لو الجهاز الاول حاول يبعت، الdata هتوصل للجهاز التانى على ال Tx Wires و بالتالى كارت الLan مش هيستقبلها.

ال Crossover Cable بيعكسوا السلوك بتاعة الارسال و الاستقبال فى احد طرفى الكابل، بالحيث لو واحد بعت data توصل للجهاز التانى على ال Rx wires و بالتالى كارت الlan يعرف يشوفها و يستقبلها.

لما بتكون موصل الاجهزة من خلال switch او hub مش هتبقى محتاج للcrossover cable لان ال switch هو اللى بيعمل القصة دية، بيخلى ال Tx بتاع كل جهاز متوصل بالRx بتاع بقية الاجهزة.

لو لسة مش مصدق، احاول اوصلهالك عن طريق الOSI 7-layers. انت عندك مشكلة فى ال PHY layer بتحاول تعالجها فى ال Network layer

انت عندك مشكلة فى التوصيلات، يبقى و لا IP و لاGateway و لا الجن الازرق هيسد معاك.

لو انت عندك تفسير علمى للى بيحصل عندك يا ريت تقوله عشان نستفيد