الموضوع: Suzuki SX4

المشاركة الأصلية كتبت بواسطة salsaa

الحقيقة مشاركة قيمة .. مشكورة جدا عليها ..

الفترة اللى فاتت كنت محتار جدا ما بين ال sx4 و مابين التيدا .. بس غالبا هجيب ال sx4 .. و ده لسببين .. أولا ان السوزوكى يابانى 100% .. أما التيدا تقفيل مكسيكى .. و تانى سبب هوة التصميم الخارجى .. ودى طبعا أذواق

بس بصراحة اللى شايفه نقطة ضعف شوية فى ال sx4 (و ياريت تصححيلى لو كنت غلطان ) هوة التابلوه .. حاسس انه فقير شوية مقارنة مع عربيات كتيرة بنفس السعر .. برضه الزراير الكتير فى التابلوه بتعمل منظر :

و برضه الشنطة ( أنا كل ده بتكلم على الهاتش باك ) .. حاسس انها ممكن كانت تكون أكبر من كدة .. يا ريت بما انك جربتيها .. تقوليلنا رأيك فى النقطتين دول ..

اشكرك يا فندم

الحقيقة انا معايا السيدان مش الهاتشباك وبصراحة ماشوفتش الهاتشباك ولا اتفرجت عليها لسببين اولهم انى كنت عايزة عربية بشنطة كبيرة وواسعة وثانيهم انها ماكانتش موجودة اصلا انا لما اشتريت كان فيه عربيتين بس سيدان فى اسكندرية كلها

لكن انا شايفة وده من وجهة نظرى بس ان تابلوه العربية السيدان شيك وحلو وطبعا دى اذواق وطبعا الشنطة تخبى فيها القتيل مايبانش ههههه
بس زى ماقلت لحضرتك انا مش شوفت الهاتشباك فمش هافتى فيها

المشاركة الأصلية كتبت بواسطة basemsaeed

الشكر لله يا فندم و حضرتك اللى كلك ذوق و احترام

اما بالنسبة للمواضيع للى كانت عن العربية,فديه قديمة و الناس اكيد عاوزة تعرف العربية عاملة ايه لحد دلوقتى مع ملاكها عشان يتأكدوا من اعتمادية العربية خصوصا ان العربية بش منتشرة اوى
و انا اسف انى حتعب حضرتك عشان التقييم اللى حضرتك حتعمليه,,بس كله استفادة للكل
و اذا كان على المواضيع,,فا فيه مواضيع ضاعت كتير,,لان المنتدى عمل تجديد للسيرفر
و ربنا يباركلك فى العربية اللى معاكى و تشترى ان شاء الله عربية افضل منها و يباركلك ربنا فيها
اسف على الاطالة
و شكرا

ان شاء الله هاحاول انى اعمل الموضوع ده فى اقرب وقت ومتشكرة مرة تانية على ذوق حضرتك

المشاركة الأصلية كتبت بواسطة a_wagih

قصدى انها سيئة فى التعليق هو الاهتزاز فى المطبات لما تمشى فى طريق مكسر او على عين القط قبل مداخل الكبارى الاهتزاز بيبقى شديد اكتر من السيارات اللى انا جربتها. اما السحب فهى عبيه بطيئة وسحبها مش زى باقى السيارات اللى انا ذكرتها فى تعليقى. عموما لو بتقارن السياره بالصينى فهى اكيد افضل انما لا تقارن بالميتسوبيشى او الكرولا هيا عامله زى الياريس لو كنت ركبتها.

العربية فعلا عفشتها ناشفة شوية لكن مش زى ماحضرتك بتقول فى اهتزاز شديد والعفشة الناشفة بدرجة معينة مطلوبة فى شوارعنا الجميلة ودى ميزة فى العربية مش عيب وطبعا عشان الناس ماتفكرش انها ناشفة قوى فهى احسن من السيراتو وانا ركبتها كتير وانا شايفة ان السيراتو فى الشارع زى الرز مع انى مع احترامى لكل ملاكها ماادفعش فيها المبلغ ده كله لانها لا تستحقه وكمان انا مااحبش ابقى راكبة عربية الشعب كله راكبها زى السيراتو او اللانسر او اليارس او حتى الكورولا وهى طبعا عربية مفيش عليها كلام لكن انا احب اكون متميزة

وبالنسبة لنقطى السحب والتسارع فاكيد العربية اللى حضرتك ركبتها فيها مشكلة لان سحب العربية دى اكتر من ممتاز وده مش كلامى والله ده من لسان ناس راكبين لانسر ونيسان ويارس والنترا وده حقيقى والله العربية فى تسارعها وسحبها رائعة وعمرها ماخيبتنى ابدا وشكرا لمرور حضرتك وارجو انى مااكونش قولت شئ يضايقك

المشاركة الأصلية كتبت بواسطة a_wagih

قصدى انها سيئة فى التعليق هو الاهتزاز فى المطبات لما تمشى فى طريق مكسر او على عين القط قبل مداخل الكبارى الاهتزاز بيبقى شديد اكتر من السيارات اللى انا جربتها. اما السحب فهى عبيه بطيئة وسحبها مش زى باقى السيارات اللى انا ذكرتها فى تعليقى. عموما لو بتقارن السياره بالصينى فهى اكيد افضل انما لا تقارن بالميتسوبيشى او الكرولا هيا عامله زى الياريس لو كنت ركبتها.

انا متفق معاك تماما ان عفشتها ناشفه ومتعبة في الطرق المكسره عشان كده اللي عايز عفشه ناعمه ومريحه مايجيبهاش ... يعني عفشتها وحشه كراحه ... ولكنها عفشه قويه وحمالة اسيه

حضرتك بتقول "لو بتقارن السياره بالصينى فهي اكيد افضل " .... مفيش مقارنه دي سياره يابانيه بالكامل !! ... وهي اكيد افضل كتقفيل ومتانه واداء واعمر افتراضي من الكوري ايضا

التسارع ... ممتاز ... والفتيس الاوتوماتيك بتاعها تكنولوجي عالي واداؤه ممتاز

فيها عيب مهم اكيد حضرتك خدت بالك منه .. القوايم الاماميه بتقلل الرؤية في الملفات

السلام عليكم ..

ياريت بس لو حد يوضح لنا ال sx4 السيدان اللي في مصر كام فئة ؟
يعني هل بتنزل فئة واحدة و لا فئتين ؟
و أيه الأوبشن اللي فيها ...

مع خالص تحياتي
م/ سمير الشهاوي

وعايز اعرف لوسمحتم فرق الاوبشن بين ال 2009 وال 2011 بالنسبة للهاتش باك وايه فرق الاوبشن برده بين السيدان والهاتش باك
وشكرا