النهاردة قلت يا ود اروح اغير زيت الموتور و زيت الفتيس
رحت اشتريت فلتر فوكسهول ب 30 جنية و طبعا جركن زيت اكس اتش بى ب 100 جنية و رحت للميكانيكى و غيرت زيت الموتور و الفلتر
و لما سالته على زيت الفتيس قاللى رقم غريب على سعة الفتيس ( 7 لتر زيت ) المهم انا كبرت دماغى على زيت الفتيس و قلت اهوة العربية ماشية
و بعدين رحت عند واحد بتاع عفشة لان عفشة قدام كنت مغير مساعدين من حوالى 10 شهور ( اى 7000 كم فقط لانى حاطط العربية جوا عنيا )
و عينك ما تشوف الا النور
جبت شوية طلبات ب 800 جنية كل انواع الجلود و بيض العفشة كله اتغير بصراحة العربية طلعت زى الفل بس اتكلفت باجرة و الزيت الموتور و الفلتر فى حدود 1170 جنية
و ناقص عفشة ورا لان جوز المساعدين ضاربين و هخما مش غاليين فقط ب 520 جنية نوع بلشتين
و ان شاء الله اغيرهم الشهر دة علشان احس بحلاوة العربية مرة واحدة و من غير ما حاجة تنغص عليا الترويق الى انا عملته
و طبعا الموضوع لا يخلو من الاسئلة
العربية موديل 96 الشكل القديم 2000 سى سى اوتوماتيك
العربية ناقصها حوالى 3000 او 4000 تانى تروق و تبقى زى الفل
هل بعد ما ادفع المبلغ دة هلاقية بعد اعلان شركة جى ام انها مش هتبيع شركة اوبل
او السؤال بطريقة تانية هل عدم بيع شركة جى ام للاوبل هيكون سبب فى ارتفاع اسعار الاوبل مرة تانية ؟
علشان بس احس انى بادفع و العربية تستاهل مش هدفع المصاريف دى و فى الاخر الاقى العربية تعمل 40 او 42 الف جنية
و فى انتظار ردودكم يا اصدقائى