الموضوع: واحة سيوة

الاخ العزيز الباشمهندس صالح.....اولا انا قعدت اجهز للرحله دى مدة طويله بس هى تستحق فعلا الانتظار
أنا اول حاجه قعدت ابحث فى الانترنت عن معلومات عن سيوة و كمان عن اماكن الاقامه لانى قمت بالرحله دى مع اسرتى و مع اصدقاء من ألمانيا حضروا مخصوص لزيارة الجنه المفقودة (واحه سيوة)
انا اتصلت ببعض الفنادق فى الواحه قبل ما اسافر وجدت ان فيه اسعار معقوله و فيه اسعار غاليه حسب نوع الفندق
فيه فنادق 4 نجوم لو انت عاوز اقامه مريحه لكن هتكلفك مش اقل من 275 جنيه للفرد يوميا و فيه فنادق مستواها عادى و سعرها معقول جدا.....انا عن نفسى جربت الاثنين و استقريت فى فندق صغير و جميل اسمه فندق النخيل و هو فى الميدان الرئيسى بالواحه و يكلفك 50 جنيه للشاليه عبارة عن غرفه كبيرة بحمام و فيها سريرين و هو فى قلب الواحه
نسيت اقولك و انا فى اسكندريه فى طريقى للواحه دخلت مكتب الهيئه العامه للاستعلاماتو هنا دلونى على فندق اسمه قصر الزيتونه....و لما وصلت الواحه تعبت لغايه لما لقيته لانه بعيد عن سنتر الواحه جنب جبل الدكرورى و لما وصلت وجدت انه اتباع لواحد مصرى عايش فى امريكا و كان لسه بيجهزة و عرض علينا الاقامه بعد ما يجهز لينا غرف سريعه و طلب 225 جنيه للغرفه فى الليله و بعد مفاوضات و لانه لسه بيجهز المكان اتفقنا على 150 جنيه فى الليله....لكن تركناة بعد كدة و رحنا لفندق النخيل لانه حى و فيه ناس كتير و جنب الميدان الرئيسى للواحه و كل الخدمات جنبنا
المهم....لو هتروح بسيارتك لازم تكون عربيه مضمونه 100% لانك هتقطع 300 كيلو رايح و زيهم و انت راجع حته واحدة بدون محطات بنزين و لا اى خدمه على طريق مطروح - سيوة
لكن هى رحله تستحق...اكمل كلامى معاك بعدين
سلام

انا سمعت انه فيه طريق غير ممهد يربط بين الواحات البحريه و واحه سيوة لكن دة محتاج سيارة دفع رباعى و جى بى اس و خبرة فى الملاحه البريه و دة غالبا بيستخدموة فى الراليات او السفارى لكن الطريق الممهد الوحيد للواحه هو بين مطروح و سيوة و طوله 300 كيلو و هو بحاله جيدة لكن لا يوجد اى خدمات عليه سوى كافيتريا فى منتصف الطريق فى منطقه تسمى بير النص و هى كافيتريا بدائيه جدا و لكن ممكن تشرب حاجه ساقعه او شاى و تاكل بسكويت و ترتاح شويه و تكمل الطريق و غالبا كل الرحلات بالاتوبيس بتقف عند الاستراحه دى.
طبعا لازم تاخد معاك مياة معدنيه و بعض المشروبات للطريق و فيه حاجه مهمه لازم تاخد حاجه علشان الناموس و الحشرات الطائرة سواء اقراص للناموس او اسبراى او كريم لان دى اكتلر حاجه بتقلق فى رحله سيوة.
لو انت عاوز تريح نفسك ممكن تاخد اتوبيس من القاهرة مباشرة للواحه لكن السفر بالسيارة متعه بجانب انك هتحتاج السيارة داخل الواحه لان فيه اماكن سياحبه بعيدة عن مركز الاقامه
و نكمل كلامنا بعدين
سلام

أما بخصوص الاكل و الشرب...اولا فيه مطاعم فى الواحه و اشهر مطعم هو مطعم عبدة فى وسط الواحه - قريب جدا من فندق النخيل - و انا اكلت اول ما نزلت الواحه الاكل معقول و الاسعار غاليه بالمقارنه بجودة الطعام و المكان...لكن ماشى الحال ...و بعد كام يوم فى الواحه لقيت فيها كل حاجه الواحد عاوزها فيه سوبر ماركت كتير و عندهم كل حاجه انت عاوزها...بقينا نشترى اكل و سريع و نجهزة فى الفندق...ممكن كمان تطلب من المطبخ فى الفندق يجهز لك اى وجبه انت عاوزها و السعر يتفق عليه
باختصار ..ماتشيلش هم الاكل ...فى المطعم فى الفندق او تشترى اكل كله موجود و الاسعار معقوله ....الاهم انك تقضى وقت جميل و تستمتع بالواحه.....و نكمل كلامنا ان شاء الله

بالنسبه للطريق , انا من بورسعيد و سافرت من بورسعيد للاسكندريه لمطروح لسيوة و كانت المسافه على عداد الكيلومتر 900 كيلو , اما بالنسبه ليك فانا اعتقد انه فيه طريق من القاهرة الى العلمين علشان اللى بيسافروا للساحل الشمالى بدون ما يمروا بالاسكندريه.....انا شفت تقاطع هذا الطريق مع الطريق الساحلى ...قريب من العلمين...انا اقدرها تقريبا ب 750 كيلو من القاهرة و زيهم للعودة و انت برضه اسأل عن الطريق دة لكن ان شاء الله ما تزيدش عن كدة.
انا انصحك لو معاك الاسرة (انا سافرت بأسرتى و عندى 3 أطفال )ترتاح يوم فى مطروح , فيه فندق موقعه رائع على البحر مباشرة اسمه الليدو قضينا فيه ليله اخدنا شقه كبيرة بتطل على البحر و فيه شاطىء خاص بالفندق ب 90 جنيه الليله.
بعد كدة تمون بنزين و تشترى احتياجاتك من مطروح و تتوكل على الله لطريق الواحه الصبح بدرى...خللى بالك طول الطريق مافيش محطات بنزين...املاء التانك على الاخر ( فول تانك )
بدايه طريق سيوة اتجه لغرب مطروح ( طريق السلوم) و عند الشرطه العسكريه توقف و اسأل على طريق سيوة....هتلف و ترجع مسافه بسيطه و بعد كدة تدخل طوالى لطريق سيوة ...هو طريق مريح و ممهد جيدا لكن ينقصه الخدمات و بصراحه انا بأعتبر قطع الطريق بالكامل و معك اسرتك و خاصه الاطفال مغامرة...خاصه ان شبكه المحمول مش مغطيه كل الطريق لكن ربنا يسلمك ان شاء الله.
و نكمل كلامنا ان شاء الله
سلام

و الله هو الطريق فى اوله فيه حركه سير واضحه لان فيه ابار بترول و شركات تنقيب لكن دة لغايه حوالى 50 كيلو بعد كدة حركه السير قليله و اللى تلاقيه على الطريق اما رايح سيوة او راجع منها فقط لانه لا يوجد اى قرى او حياة الا فى نهايه الطريق ( سيوة فقط ), اما بخصوص الامان فان الطريق امن ان شاء الله
و نكمل كلامنا ان شاء الله