السيارة تهتز من الخلف مثل حركة ديل السمكة - أرجو الافادة .

**AYMAN4PLUS** · 11-11-2009 03:14 PM

السلام عليكم ورحمة الله وبركاته ،

العربية عندى لما أكون ماشى على الغيار الاول والثانى بتهتز من الخلف زى اهتزاز ديل السمكة بالضبط يمين وشمال ، ولما أمشى على أى غيار سواء ثالث أو رابع أو خامس العربية ماتعملش أى اهتزاز .

صديق قاللى ده عيب كاوتش والمفروض تغير فردتين الكاوتش اللى ورا علشان ماينفعش تركب فردة جديدة مع فردة قديمة ، وبرضه قال ممكن يكون عيب عفشة .

عندى سؤالين :

الأول: لو العيب عيب كاوتش المفروض أغير الفردتين اللى ورا بفردتين جداد ، ولا المفروض أغير الفردة اللى عاملة الهزة فقط .

الثانى: المفروض أروح لمين : لميكانيكى ولا بتاع كاوتش ولا بتاع عفشة ؟

أرجو الرد من الاخوة أصحاب الخبرة ،

وشكرا مقدما .

**Ashraf_Ashraf** · 11-11-2009 03:31 PM

انا راى انك تركب الاتنين اللى قدام ورا وجرب اذا راح الاهتزاز يبقى كاوتش او جنط معوج واى حد هتروح له هيقولك غير الكاوتش الاول علشان يقدر يحدد العيب منين

**samirayad** · 11-11-2009 03:46 PM

انا راى انك تركب الاتنين اللى قدام ورا وجرب اذا راح الاهتزاز يبقى كاوتش او جنط معوج واى حد هتروح له هيقولك غير الكاوتش الاول علشان يقدر يحدد العيب منين

أنا مع هذا الرأى
وعندى أقتراح آخر
حل كاوتش الفردتين الخلفيين من على الجنوط وحطهم مكان الكاوتش الأمامى
وخد كاوتش اللى كانوا قدام وحطهم على جنوط اللى ورا

لو ديل السمكه لسه شغال فى الخلف
يبقى أيه العيب ...........الجنوط الخلفيه
طيب لو ديل السمكه طلع شغال قدام
يبقى فين العيب ....الكاوتش اللى كان راكب ورا
هههههه

**reamoz** · 11-11-2009 04:32 PM

ياباشا انت لو روحت عند اي بتاع كاوتش بيفهم هيعرف لو في عجلة فيها عالي وواطي أو لوحة في السلك بمجرد مايمشي إيدة على العجلة ومدام الموضوع انت بتحس بية جامد وانت ماشي يبقى اللوحة أو الجزء المكرش هيكون واضح وهيخليك تشوفه بعينك وتتأكد بنفسك أن هو دة العيب

وحكاية لو فردة واحدة بس الي بايظة تجيب واحدة ولا إتنين دة انت اللي تقدر تحددة حسب عمر الفردتين
يعني لو هما جداد ولسة النقشة غويطة ممكن تكون الفردة اللي باظت نتيجة مطب جامد ولا حاجة فخسارة انك ترمي التانية كمان
لكن لو العجل قديم وطلعان عينة يبقى أكيد يفضل إنك تغير الإتنين

وفي حالة إن الكاوتش كويس والموضوع جنط ولو إن الموضوع ده 80% عيب كاوتش سهل جدا بردة إنه يرفع العربية والعجلة راكبة فيها وتشوف بعينك لو فيه رفة في الجنط ولا لأ

**mr_sameh** · 11-11-2009 06:49 PM

انا اعتقد ان الموضوع مش كاوتش خالص لان الكاوتش هيعمل رجة واهتزاز . اما المشكلة اللي عندك هتكون سببها العفشه وغالبا الشدادات الخلفية او المساعدين الخلفية . لان انا كان عندي المشكلة دي واكتشفت ان سببها اعوجاج في الشداد الخلفي نتيجة لان واحد رفع العربية من تحت الشداد

**helmy537** · 12-11-2009 09:09 AM

شوف كدا جلب المقصات لتكون متاكله

**AYMAN4PLUS** · 12-11-2009 11:12 AM

شكرا يااخوانى على الردود ،

ياريت تلاحظوا معايا ان حركة ديل السمكة دى بتحصل بس على السرعة الهادئة خصوصا لما أكون بهدى من سرعة عالية الى سرعة منخفضة مثلا 20 كيلو علشان فى مطب جاى ولاحاجة فى الحالة دى بأشعر بالهزة ، لكن السرعات من الغيار الثالث لغاية الخامس بتروح الهزة تماما ، يعنى لو الكاوتش أو حتى الجنط هو السبب فى الحركة دى كنت شعرت بالهزة دى على جميع السرعات .

هل كلامى ده صحيح ؟

فى انتظار ردكم الكريم .

**samirayad** · 12-11-2009 01:34 PM

هل كلامى ده صحيح ؟

فى الحقيقه كلامك معقول فعلا ومنطقى جدا
وأنا فعلا مركزتش فى النقطه دى
وأعتقد كده بيكون موجود عندك بوش جانبى
بيظهر مع السرعه البطيئه قبل التحميل بسرعه عاليه على الفرد الخلفيه
وكده حنفكر فى رباط الجنوط نفسها على الصرر
حاول ترفع فرده فرده
وأربط رباط صح بطريقة المقص أو الصليبه
وقبل ماتعيد على الرباط
راجع على صواميل المحاور الخلفيه مع الطنابير
والمفروض تشوف عفشجى كويس
يراجع على البلى والمحاور الخلفيه برضه
بس طبعا لو لقيت بوش كبير فى مسامير تركيب الفرد على الطنابير
راجع عليها الأول وجرب

**AYMAN4PLUS** · 12-11-2009 03:58 PM

شكرا ياأستاذ سمير على ردك ،

انت أبو أحمد وأنا برضه أبو أحمد ، ربنا يحفظ أولادنا جميعا من كل داء .

ان شاء الله ح أكشف على العربية وأبلغكم باللى حصل .

مع خالص تحياتى ،

وشكرا .