معدل إستهلاك البنزين لكل أنواع السيارات

**exact** · 24-11-2009 12:13 AM

المشاركة الأصلية كتبت بواسطة reamoz

أول إستفتاح اهوه :ta_clap[1]:

بس ياباشا اكيد انت قصدك انها بتعمل 300كم /20لتر في مشاوير متنوعة يعني داخل المدينة شوية وخارجها شوية. صح؟
علشان لازم يكون في فرق في حالة ان المشي كلة داخل المدينة عن مايكون كلة خارج المدينة (طريق سفر يعني)

هو كده بالظبط

المشاركة الأصلية كتبت بواسطة future_aya

أذا المعلومة التى ارسلت
بخصوص السوزوكى سويفت الــ 1300 سى سى

هو انه 300 كم / 20 لتر
اى 15 كم/ لتر تقريبا

بخصوص لادا 2107 انجشن 1500 سى سى
215 كم / 20 لتر
اى 10.75 كم / اللتر تقريبا

ملحوظه 1- اجريت تجربة على 10 سيارات من نفس النوع والموديل لنفس الطريق وظروف التشغيل ولم نحصل على نفس المعدل بالضبط
2-لاحقا وفى الوقت المناسب سوف نسرد بعض النقاط تخص قائد السيارة
(( اى طريقة القيادة على الطريق )) لتحسين معدل استهلاك الوقود وشكرا

مش فاهم قصدك بخصوص رقم 1 بس أنا متأكد من كده لأني مراقب الموضوع ده وعامل ملف اكسيل عندي فيه آخر 6 شهور بس فيه تفاصيل اكتــــر شويتين والرقم المتوسط بالظبط 299 كم للصفيحة لأنه زاد في بعض الاوقات وقل في اوقات تانية عن كده...
وبخصوص رقم 2 انا عارف حكاية الاساليب دي وبامشي بيها ومن ضمنها انك تنقل الفتيس بدري ومتقرصش عالغيار ولا باكبس جامد مرة واحدة يعني انا مثلا مقسمها على عداد السرعة كده في دماغي على العشرينات... بانقل للتالت على 40, والرابع على 60, والخامس من اول 80, ودي صدقني بتفرق كتير جدا في استهلاك البنزين مع اني غالبا باستعمل بنزين 80 منذ حوالي 5 شهور...بالاضافة لكون الكاوتش لاااااااااازم يبقى مظبوط على 30 بالنسبة لي.. لأني مهتم جدا بموضوع البنزين ده بالإضافة لاني باستعمل زيت مخلق كليا (Fully Synthetic)اللي هو 10000 كيلو زي موبيل وان وناوي اجرب هيليكس ألترا المرة الجاية

**reamoz** · 24-11-2009 11:08 AM

من أساليب تحسين معدل الإستهلاك زي ماقلت ياباشا فعلا عدم الحرق على الغيار وظبط ضغط الهواء داخل الكاوتش لتقليل معامل الإحتكاك بالطريق
وفي حاجات تانية كتير منها:

- عدم زيادة السرعة في السفر عن 100-110 لأن بعد السرعة دي بتكون مقاومة الهواء عالية وبالتالي علشان نزود السرعة أكتر من كدة بنحتاج عزم أكبر من الموتور مما يتطلب حرق كمية بنزين أكتر
- إغلاق النوافذ عند السير على سرعات عالية - علشان نخلي جسم السيارة الإنسيابي يعدي الهواء من حولة لكن لو النوافذ مفتوحة بيدخل الهواء داخل السيارة ويعمل تيار يزيد من مقاومة الهواء وممكن نشغل مروحة التهوية الداخلية أو حتى التكييف هيكون حملة على الموتور أقل من مقاومة الهواء
- عند السير في طرق سريعة تموير السيارة قبل تهدئة السرعة أو التوقف بمسافة كبيرة - علشان نستفيد من قوة القصور الذاتي للسيارة يعني قبل الكارتة أو الكمين بحوالي 500 متر كدة ولا حاجة ممكن نمور العربية ونسيبها ماشية من غير منستهلك بنزين في المسافة دي وفي نفس الوقت لما نوصل للمكان اللي هنقف فيه بتكون سرعة السيارة قلت كتير ده كمان بيوفر في إستهلاك الفرامل والأسلوب دة بردة ممكن نستخدمة لو إحنا بنسيب مسافة كويسة بيننا وبين اللي قدامنا لما نلاقي اللي قدامنا بيهدي
- عند التسارع الضغط على دواسة البنزين يكون سنة سنة - علشان الضغط علي الدواسة لأخرها مرة واحدة مش هيزود في التسارع فجأة والنتيجة هتكون إن البنزين الزيادة مش هيتحرق كويس وهيتم إهدارة
- في المطالع لما نلاقي سرعة العربية بتقل منزودش بنزين - لأن في المطلع بيكون التسارع صعب جدا وبيستهلك بنزين كتير ممكن لو عايزين نحافظ على سرعتنا نزود شوية قبل المطلع ونثبت رجلنا على دواسة البنزين وبمجرد إنتهاء المطلع هنلاقي السرعة بتزيد تاني منغير ماندو بنزين اكتر

في حاجات تانية بس مش أي حد ممكن يعملها علشان بتكون ضد مبدأ السلامة بس ممكن نقولها من باب العلم بالشئ

- في المنازل نستفيد من المطريق المنحدر بإننا نزود السرعة عن المعدل بتاعنا في أول المنزل وبعد كدة نمور السيارة هنلاقي إن السرعة بتقل بعدل قليل جداً حسب شدة المنحدر في حين إننا ماشيين منغير إستهلاك للبنزين يذكر - بس زي ماقلت إن الموضوع ده خطر علشان لما تكون السيارة معشقة على غيار في حالة أي طارئ يستدعي التهدئة المفاجئة بمجرد رفع الرجل من على البنزين الموتور بيعمل تهدئة للسيارة فيما يسمى بالـ Engine Break وكمان بيكون الأر بي إم عالي فابيدي قوة ضغط هواء أكبر لسيرفو الفرامل فاياريت اللي يعمل الموضوع ده يكون مركز كويس في الطريق ورجلة جاهزة للفرملة في أي وقت
- في كمان حاجة أخطر من كدة (السير خلف السيارات الكبيرة على مسافة قريبة) ده طبعا بيخلي مقاومة الهواء شبه معدومة لأن السيارة اللي قدام بتشق الهواء - بس طبعا لما أكون لازززق في العربية اللي قدامي وحجمها أكبر من حجم عربيتي يعني أنا مش شايف الطريق نهائياً وأي حاجة تخلي اللي قدامي يفرمل انا مش هاكون شايفها ومش هكون عامل حسابي فطبعا النتيجة هتكون معروفة "نوفر شوية بنزين ونضيع العربية واللي راكبينها" (ربنا يستر علينا جميعاً) دة طبعا غير خطر إن حاجة تقع عليك من العربية اللي أنت لازق فيها دي (ياسيدي لو محملة زلط)

**HRH_Sameh** · 24-11-2009 11:23 AM

أحييك ع المداخلة الاخيرة
وبالنسبة لمتوسط الاستهلاك في الشاهين 1400 2004 حوالي 225 كم / الصفيحة

**exact** · 24-11-2009 12:06 PM

تمااااااااااااااااااااااا م جدا وكلام زي الفل
بس أنا مش فاهم الحتة دي لو ممكن توضيح

المشاركة الأصلية كتبت بواسطة reamoz

- بس زي ماقلت إن الموضوع ده خطر علشان لما تكون السيارة معشقة على غيار في حالة أي طارئ يستدعي التهدئة المفاجئة بمجرد رفع الرجل من على البنزين الموتور بيعمل تهدئة للسيارة فيما يسمى بالـ engine break وكمان بيكون الأر بي إم عالي فابيدي قوة ضغط هواء أكبر لسيرفو الفرامل فاياريت اللي يعمل الموضوع ده يكون مركز كويس في الطريق ورجلة جاهزة للفرملة في أي وقت

**reamoz** · 24-11-2009 02:26 PM

ياباشا في خرطوم رفيع كدة بيكون خارج من عند المانيفولد بتاع الدخول مش بتاع العادم بيكون رايح لسيرفو الفرامل بيديله هواء فكل ماتكون سرعة الموتور أعلي بالتالي ضغط الهواء اللي بيروح للسيرفو بيكون اعلي
لو عايز تحس بالموضوع دة جرب وانت ماشي على سرعة عالية نسبياً دوس دبرياج ودوس سنة فرامل بسيطة وثبت رجلك على الدواسة وبعدين سيب الدبرياج طبعا االعربية هتهدي أكتر علشان الإنجين-بريك بس إنت هتحس بدواسة الفرامل زي ماتكون بتعلى وتجمد تحت رجلك

**exact** · 24-11-2009 02:33 PM

اول مرة اعرف الموضوع ده...بس انا ساعات باحس فعلا في تغييير قوة الفرامل بعض الاوقات ومش فاهم سببه...بس معنى كلامك ده ان الفرامل احسن مع الدبرياج ومش وهي متعشقة؟؟؟؟

**reamoz** · 24-11-2009 03:06 PM

لأ مش قصدي كدة
انا لما كنت بقول دوس دبرياج كان ودوس فرامل ولما تسيب الدبرياج هتلاقي دواسة الفرامل عليت معاك كل ده المفروض العربية تكون مشقة على غيار
الفكرة في إني بقولك دوس دبرياج أن الموتور هيكون سلانسية يعني زي ماتكون مورت الفيتيس ولما تيب الدبرياج الموتور هيرجع يعلى تاني علشان العربية ماشية بسرعة علشان كدة هتحس بالفرق في دواسة الفرامل
كدة معنى كلامي إن الفرامل أحسن وهي العربية معشقة وكمان مش دايس دبرياج ندوس دبرياج لما سرعة العربية تقل خالص

**exact** · 24-11-2009 03:08 PM

وصلت ياباشا وشاكرين الافضال

**future_aya** · 24-11-2009 10:31 PM

بخصوص توفير استهلاك البنزين باتباع تعليمات قيادة معينة

1- سخين السيارة لمدة 3 دقائق دون الضغط على الاكسراتير

2- الحركة بالسيارة مع استمرار الاخذ فى الاعتبار انها لازالت فى مرحلة التسخين لمدة 3 دقائق اخرى مع السير ( القيادة )

3- اتباع السرعات الموصى بها لتصل لــ 20 كم الاول 40 كم الثانى 60 كم الثالث 80 كم الرابع ومن 80 الى اعلى الخامس ولا تتعدى 90 كم او 95 او بحد اقصى 100 كم

4- عند تغير السرعات يجب الدوي على دواسة البنزين بسلاسة ودون عجالة فى جميع الحارات

5- عند الاقتراب من المطب او المنحنى او اى اعاقة بالطريق قم بالتهدئة من بعيد بازالة قدمك من على الاكسراتير او تقليل السرعة تدريجيا دون الحاجة لاستخدام الفرامل الا عند الضرورة

6- قبل صعود السيارة لمرتفع قم بزيادة السرعة بشكل مناسب واثناء النزول حاول ان لا تضغط على الاكسراتير كثيرا ولكن لا تفصل صندوق التروس

7- ابتعد قدر الامكان عند استخدام الفرامل واعتمد على التهدئة مسبقا بتقليل السرعة حتى لا تضطر لاستخدام الفرامل بقوة

8- اضبط ضغط الهواء داخل الاطارات اسبوعيا بالقيمة الموصى بها بكتالوج سيارتك وفى غالب الاحيان تطبع قيمة ضغط الهواء على قوائم باب السائق من الداخل

9-استخدم البنزين ذات رقم الاوكتان الموصى بها

10- تاكد من نظافة وصلاحية فلتر الهواء

11- لا تحمل سيارتك حمولة اكبر من الموصى بها

12- قلل من استخدام التكيف قدر الاستطاعة

13- قبل الوصول الى نهاية الرحلة قلل سرعتك تدريجيا وتعامل مع السيارة برفق حتى الوصول بسلامة الله ثم انتظردقيقة واطفىء محرك سيارتك

باتباع ما سبق ستجد تحسن غير عادى فى معدل استهلاك الوقود بسيارتك ولكم منى جزيل الشكر ووافر الاحترام

**omaramin** · 02-04-2011 11:14 AM

تشكر على مجهودك

مشاهدة نتائج الإستطلاع: كيف ترى هذا الموضوع

الموضوع: معدل إستهلاك البنزين لكل أنواع السيارات

LinkBack

أدوات الموضوع

عرض

-

-

-

-

-

-

-

-

المواضيع المتشابهه

معدل إستهلاك البنزين عالى ؟؟؟؟؟؟

معدل إستهلاك البنزين

سؤال عن معدل إستهلاك البنزين في ألتو 1100

أنواع البنزين المستخدم في السيارات والرقم الأكتاني وعلاقته بنسبة إنضغاط المحرك

معدل إستهلاك البنزين عندي غريب

الكلمات الدلالية لهذا الموضوع

المفضلات

المفضلات

ضوابط المشاركة