بظبت العفشة ومحتاج مشورتكم ضرورى جدا

**zocor742** · 21-11-2009 09:28 PM

السلام عليكم

عاملين اية يا اخوانى.......
دلوقتى انا من زمان اوى ونفسى اظبت عفشة العربية وعشان مكنتش اعرف مكان اتعامل معاة كويس.فاكنت مستنى لما اشوف حد معرفة يخدنى لصنايعى كويس.والحمد لله ربنا كرمنى بصديق معاة اوكتافيا ودانى للورشة اللى بيتعامل معاها فى شغل العفشة وكدة

الاول بس عايز اوضحلكم الشكاوى اللى كانت عندى فى العفشة
1- لما بعدى اول طلعت على مطب او عديت على نقرة بسمع صوت طقة جاى من العجلة الامامى يمين والشمال خفيفة اوى بس موجودة بردو فى الشمال.
2_العربية لما اكون دايس بنزين واجى اشيل رجلى بحث زى ماتكون فى نتشة مصدرها من العجل تحتى زى ماتكون حاجة بتلق.
3_ كنت بشتكى من عدم نعومة العفشة فى الطرق الغير ممهدة ومحتاج تربيط عفشة.
*طبعا كل الاعراض دى لو ماشى فى طريق غير ممهد او غير مرصوف بسمع مزيكة بضايقنى وتقفلنى من العربية

المهم روحنا الورشة وحطينا العربية على كوريك شكل اللى فى البنزينات بتاع الغسيل والتشحيم اللى بيرفع العربية لفوق... فانزل الراجل يكشف على العفشة بالكامل مقصات وبطاحات وشيك على المساعدين والكلام دة كلة . بعد كدة ندالى انا وصحبى نزلنا تحت العربية فى البير بتاع الكوريك

وبدأ يشرح العفشة فيها اية.... قالى عندك اول حاجة جهازين الفرامل الحديدة اللى ماسكة الجهاز مش ثابتة وقالى امسك الجهاز كلة وهزة هيتحرك معاك ويلق فى ايدك ودة اللى بيعمل عندك صوت الطقة مع المطبات والنقر عشان الجهاز مش ثابت ومع الحركة بتسمع صوت الطقة والخبطة

تانى حاجة المقصات الامامية عندك محتاجة بيض وجلب . ولقيتة طلع فوق ومسك العجلة اليمين والشمال قدام وكانوا محطوتين على حاجة اسمها صينية فى الكوريك وبدأ يحركهم العجل قدام ولورا ولقيت العجل بيتحرك معاة قالى العربية كنت بتحث ان فيها نتشة لما تبقى دايس بنزين وتسيب مرة واحدة قولتلة فعلا قالى دة عيب المقصات...... ياتجيب جلب وبيض مقصات يا تجيب مقصات جديد او استيراد نظاف وانا هظبتهملك

وقالى كدة العفشة مفهاش حاجة غير تربيط والبطاحات سليمة عندك والمساعدين تمام واليايات تمام
وبدأ يفك جهازين الفرامل وبص عاليهم قالى الحديدة اللى مثبتة الجهاز فى العجل عند خابورين التثبيت مبوشين
اشترى حديتين زى دول بالخوابير بالمسامير بتوعهم ونركبهم .روحت اشتريتهم ب90 جنية وربهم تمام وطلعت جربت العربية الطقة اللى كان فى العجل راح رجعتلة قولتلة تمام العيب دة اختفى سيبنى بكرة ابص على المقصات فى السوق وابقى اجيبهم نركبهم واخد مصنعية 30 جنية كشف و تربيط وفك وتركب الحديتين والجهازين

دلوقتى انا عايز خدمة منكم اعمل اية فى موضوع المقصات دة هل ممكن اشترى جلب وبيض مؤقتا والعيب هيختفى . ولا اريح نفسى واجيب مقصات وخلاص احسن واجيبهم جداد ولا استيراد نظاف
انا سئلت عند بتوع الاستيراد لقيت المقصات حالات والمقص الواحد اللى حالتة تمام ب100 الى120 جنية وواحد من بتوع الاستيراد قالى عندى مقصين جداد فاككهم من عربية جديدة لسة متقطعة ورالى العربية وعدادها 3050كيلو بس وشوفت حالة المقصات جداد نوفى لسة بيلمعوا وعايز فيهم 160 ج اول كلمة

اية رأيكم فى كلام الصنايعى وشيفين اعمل اية فى موضوع المقصات دة
وشكرا لمرور حضرتكم للموضوع

**MoMohsen** · 22-11-2009 12:57 AM

هو المقصات ممكن تجيبهم استيراد بس الافضل انك تجيب مقصات اسبانى و دول تمنهم 440 جنيه.
انا كان عندى جلب المقصات بايظة و غيرت الجلب بس مجبتش مقصات و تمنهم 60 جنيه و هما 4 جلب و نوعهم كورى.و العربيه بعدها ما شاء الله زى الفل.
وعلى فكرة عيب جلب المقصات معروف اوى فى النوبيرا بس لو غيرت وجبت المقصات الاسبانى انسى العيب دة خالص.
يا ريت تقولنا الورشه دية فين عشان نستفاد بردة.

**mahmoudysf** · 22-11-2009 03:00 PM

ممكن مكان الورشه

**zocor742** · 22-11-2009 06:32 PM

شكرا ياجماعة على ردودكم
الورشة دى فى الاسكندرية
بجوار صينية المطافى بالسيوف

**melmegharbel** · 22-11-2009 07:08 PM

حد يعرف ورشة للعفشة كويسة فى القاهرة

**zocor742** · 22-11-2009 07:41 PM

الباش مهندس سميرعياد وسيادة المستشار محمد ممدوح اية راى حضرتكم بالموضوع

**Mostafa_Aiad** · 22-11-2009 07:49 PM

لو سمحت الورشة فين في السيوف علشان انا ساكن في السيوف و عندي مشكلة في العفشة واسم الصنايعي اييييه.

**zocor742** · 22-11-2009 08:07 PM

طيب حضرتك ممكن تكلمنى على الخاص وانا اشرحلك بالظبت المكان واسم الصنايعى ولو عايزنى اوصلك بنفسى مفيش مشاكل انا ساكن جنبك فى سيدى بشر فى شارع 15 يعنى بينى وبينك فردة كعب