الموضوع: حد جرب البوليش اللى بلون السيارة ...simoniz

فيه موضوع كان عمله زميل لينا فى النتدى بيشرح ازاى تعمل الكار كير للعربيه بنفسك و كان استخدم البوليش Simonize اللى بلون العربيه.
http://www.nilemotors.net/Nile/95922-a.html
[gdwl]
إزاي تعمل كار كير لسيريونتك بنفسك .. الأدوات و إستخدامها بالترتيب :


هذه الصورة بحجم اخر انقر هنا لعرض الصورة بالشكل الصحيح ابعاد الصورة هي 1024x768.

1- مكنسة صغيرة توصل علي بطارية العربية .. بتشيل من العربية الدواسات بتاعتها و تنفض الكراسي من التراب اللي عليها بالراحة و بعدين تشغل المكنسة و تبتدي تشيل التراب اللي في الدواسات و مزانق الفرش و الكونصول و أي حتة فيها تراب .. انا جربت نوعين .. دي (البرميل) و واحدة تانية صغيرة كانت ضعيفة أوي إنما دي الشفط بتاعها كويس .. متوفرة في كارفور و سعرها تقريباَ 65 جنيه .

2 - ده multi purpose cleaner أو فوم منظف متعدد الإستخدامات .. بترج العلبة و ترشها في الأماكن اللي لازق فيها تراب و مبينة فيها الوساخة زي مثلاَ ال cup holder .. بترش و تلف الفوطة و تقعد تدورها جواه و تشيلها هتلاقيها رجعت لشكلها يوم ما إستلمت العربية من المعرض .. و ممكن تنضف بيه المكان اللي بيبقي في الباب لوضع أي حاجة .. ممكن تنضف بيه أي بلاستيك في العربية ممتاز .. بس ده منظف مش ملمع يعني تستخدمه مع حاجة متوسخة مش مع حاجة نضيفة و عايزها تلمع .

3- بعد تنضيف البلاستيك المتوسخ نيجي للفرش .. لو عندك الفرش (مش جلد) و ريحته فيها كمكمة من أي نوع .. ريحة سجاير لازقة فيه .. تستخدم معاه المنظف ده هو إنجليزي مش فاكر نوعه بالضبط عشان في العربية تحت .. موجود في كارفور و سعره 24 جنيه .

4- لو عندك بقع في الفرش أو عامة عايز تغسله عشان لونه الأصلي يرجع .. تغسله بالفوم ده و هو نفس الشركة الإنجليزية و إسمه fabric and upholstery cleaner .. من الممكن إستبداله بأي منتج من شركة أخري يحمل نفس الوظيفة .. في كارفور و سعره 27 جنيه .

ملحوظة : لو الفرش جلد يستبدل المنتجين 3 و 4 بمنظف جلد متخصص .. زي mr.leather l مثلاَ أو leather care ماركة أرمور أوول .

5- أرمور أوول ملمع التابلوه .. بعد ما نضفت كل حاجة و كله تمام إعمل التابلوه بالمادة الملمعة عن طريق رشها علي إسفنجة ناعمة جداَ و تنظيف التابلوه بها .. من الممكن الإستعانة بأرمور أول وايبس .. و دي مناديل مرشوشة أرمور أول ملمعة للتابلوه ظريفة جداَ و فيه منها نوعين .. gloss finish و دي بتدي لمعة / matt finish و دي مطفية و شيك أوي .. الملمع سعره 21 جنيه .. الوايبس سعرها 16 جنيه .. من الممكن إستبدالهم بماركة أخري تؤدي نفس الوظيفة .

ملحوظة : متعملش بيه الدركسيون عشان هيخليه يتزحلق في إيدك جامد .. ممكن تنضف الدركسيون بالمنظف متعدد الإستخدامات .

كدة العربية من جوة خلصت .. إقفل .. و إدي غسلة للبادي من برة بالمياه فقط عشان تنزل أي تراب أو حاجة ممكن تخربش الدهان أثناء الغسيل .. و دائماَ في الغسيل إبداَ من السقف .. و الغسلة دي إسمها "بيكيني"

6- بعد ما غسلت بالمياه .. إغسل العربية بالشامبو و السفنجة .. دي علبة شامبو فرنسي موجودة في شل اللي عالصحراوي سعرها 20 جنيه .. و الشامبوهات الأخري سعرها يتراوح بين 20 و 60 حسب الحجم .. بس اللي ب 20 دي هتكفيك سنة لأن مبتحطش منها غير مقدار غطائين و نص كل غسلة .. و فيه نوع مصري حلو جداَ إسمه رابيدو ب 5 جنيه بيكفي مرتين .

7 - نشف العربية بالفوطة الميكروفايبر (شبه الزرقاء اللي في الصورة) عشان متجرحش الدهان .. و بعدين لمع الزجاج بملمع الزجاج و ورقة جرنال .. فيه أرمور أول وايبس للزجاج انا جربتها بس معجبتنيش .. ممكن تعمل ده للزجاج برة و جوه.

8[gdwl][mark=#d9d7d5]- جه دور البوليش .. بتفرش البوليش بشكل دائري علي حتة حتة في الصاج .. الكبوت لوحده .. رفرف لوحده .. و هكذا .. و تسيبه كام دقيقة لحد ما تحس إنه نشف و جير كدة .. بتشيله بالفوطة الميكروفايبر .. البوليش اللي في الصورة نوعه سيمونز و ده بيبقي حسب لون كل عربية ب 30 جنيه .. فيه منه ألوان كتير .. و انا بستعمله عشان اللون اللي فيه بيداري الخدوش الخفيفة شوية .. بس ممكن تستبدله ببوليش ملوش لون عادي .. موجود في كارفور بس ب 39 جنيه أو 42 .. بس بيتباع ب 30 جنيه في محطات بنزين وطنية في smile اللي بيبقي فيها .[/mark][/gdwl]

9- بعد ما تخلص وش البوليش المتين للعربية هتحسها بقت أنضف و بتلمع .. بس لسة .. نفس اللي عملته بالبوليش تعمله بالواكس (الشمع) .. هتلاقيه دايماَ علبة مدورة و فوقيها سفنجة زي الصورة .. متجبش السائل لأن ده أحسن .. ممكن تجيب أي ماركة بس انا بحب أرمور أوول و فيه ترتل واكس بس مبقاش متوفر في السوق .. سعره تقريباَ 32 جنيه.. و بعد ما تخلص هتلاقي نتيجة مذهلة هتخاف تلمس العربية .

10- بعد ما زبطت كل حاجة .. إدهن البلاستيك الغير مرشوش بال wd40 .. العبوة هي اللي في الصورة .. سعرها 12 جنيه علي ما أتذكر .. بس تدهن بيها البلاستيك الغير مرشوش فقط مــــمـــــنـــــــوع تدهن بيها أي حاجة مرشوشة! ممكن تدهن بيها بربريز الإزاز الأمامي البلاستيك و المساحات و الحتت السودة في جسم المرايات الجانبية و الشبطة الأمامية و هتلاقي اللون تحول من أسود جربان لأسود حقيقي !

11- الخطوة الأخيرة .. فوم العجل .. اللي في الصورة نوعه فورميلا وان .. فيه أنواع تانية ممتازة زي أبرو و أرمور أول .. جيب اللي يريحك سعرهم من 20 ل 34 جنيه .. رشهم دائرياَ مع العجل و سيبهم 10 دقائق ينشفوا لوحدهم متمسحش الفوم .
[/gdwl]