الحمد لله جبت موتور من بور سعيد يوم الثلاثاء 8/12/2009
بعد اللف انا والميكانيكي لحد العصر وتشغيل اكثر من موتور وحاجة وارد اليابان وحاجة وارد الاتحاد الاوربي والواحد جاله صداع وزهقت ومليت ودي بعض اللي لا حظته :
بعض المواتير محلول جزء منها ومتركيب ممكن يكون الكارتير وممكن يكون المانافو وممكن يكون الفتيس وممكن يكون الكربراتير (هتقولي عرفت ازاي هقولك الميكانيكي هو اللي عرف مش انا بتظهر اما من المسامير او السيلكون اللي بين الاجزاء وبعضها) واللي تلاقيها مش حاله حاجة خاص تلاقيها مرشحة بعض الزيت عليها وفيها بوش بسيط في الكرنك او نفخ بسيط جدا طالع من ماسورة قياس الزيت..
واليكم بعض التكلفة
الموتور ب 2000 جنيه
افراج جمركي وتخليص ورق 100 جنيه
العيال اللي شغلت وجربت وشالت وحطت 50 جنيه
30 جنيه وانت طالع من الجمارك معرفش بتوع ايه ؟!!!!!
غير بقى اجرة الميكانيكي انت وشطارتك معاه غير بقى الزيوت
زيت الفتيس 42 جنيه 3 كيلو اسو
زيت الموتور لو هتجيب اسو 59 او توتال 2500 ب 54 او شل الاحمر ب 58 حسب استخدامك بس انصحك تجيب اول مره زيت كالتكس ابو 35 جنيه تغسل بيه الموتور من جوه وتغيره بعدها بيومين او ثلاثة وتحط زيت نوعه كويس بعد كده
شوية مصاريف باقية وكهرباء وكده
المهم الاجمالي وصل 2480 جنيه
بعض ملاحظاتي على الموتور:
1- الحمد لله الموتور كويس وربنا يسترها معاي ومع كل الاعضاء الكرام ويباركلي في الموتور.
2- طرمبة البنزين كانت لا تعمل قمنا بحل الطرمبة القدمية من الموتور القديم وتشغيل السيارة عليها لكن بعد كده خمرنه الطرمبة الجديدة في البنزين وفضلنا ندوس على الدراع لحد ما حضرت والحمد لله وسنقوم بتركيبها حين الانتهاء من بعض امور الصيانة.
3-ساعة الحرارة كانت لا تعمل قمنا باستبدالها بالساعة القديمة( لا ادري ما سبب عدم عملها اللي يعرف يقولي هل ممكن الركنه بتعت الموتور هي السبب ؟!!! )
4-ساعة الزيت كانت لا تعمل قمنا باستبدالها بالساعة القديمة(لا ادري ما سبب عدم عملها اللي يعرف يقولي هل ممكن الركنه بتعت الموتور هي السبب ؟!!! )
5-طرمبة المياة فيها صوت خشونه رهيب ومزعج الميكانيكي قالي امشي بيها يومين ولو ما نعمتش تعال نحلها ونركب الطرمبة القديمة.(ايه رأيكم ؟)
حبيت افيد الاعضاء اللي ناوين يغيرو مواتيرهم
والسلام عليكم
ارجوكم تدعولي ربنا يتمم على خير ويباركلي في الموتو
المفضلات