بسم الله الرحمن الرحيم
المشكلة يا اخى ان فى ناس كتير حلم حياتهم يركبوا عربية , وفى ناس كتير العربية بالنسبة لهم مش ترفية خالص , وفى ناس بتجيب عربية واتنين و تلاتة بدون الحاجة لهم , انا اعرف اسر عندها فوق ال 3 عربيات رغم ان حاجتهم الفعلية لعربيتين مثلا بالكتير.
والحكومة فى نفس الوقت ما عندهاش الأجراء اللى تقدر تمنع بية زيادة العربيات , كل اللى بيعملوة انهم بيحاولوا نقل القاهرة لمدن جديدة زى ما حضرتك شايف لعل هذا يقلل من الحركة فى القاهرة , لكن تبقى مشكلة كبيرة وهى إن سكان المدن دى مش لاقيين معظم إحتياجاتهم حواليهم , ولو لقوها من الممكن ان الزحمة تخف شوية فى القاهرة على اساس انهم مش محتاجين يخرجوا من المدن بتاعتهم كتير
وممكن حضرتك تلاحظ دة فى التجمع الأول و بعض مناطق الخامس , الأول مثلا منطقة زى البنفسج 1 و 2 المناطق دى طبيعى ان اللى يسكن فيها بيكون معاه عربية عشان يقدر يوصل بيها للأماكن زى شغلة و شراء احتيجاتة , وهى دى سبب مشكلة كبيرة فى المرور , ان المدن الجديدة موجودة لكن لسة القاهرة مزدحمة لإن بها اساس حاجات كتير اوى
المصالح الحكومية الكبرى لسة فى القاهرة , الشركات الكبرى فى القاهرة , يبقى للأسف القاهرة هتفضل على هذا الزحام يمكن لمدة 10 سنين كمان نظراً لإن الأماكن المهمة كلها فى القاهرة ,
ولو بصيت حضرتك على اماكن النزهة (الفسح) هتلاقى كلها فى القاهرة , النيل و المولات و المطاعم و الحدائق , فى حين ان سكان المدن الجديدة مش متوفرلهم الحاجات دى , إلا فى الرحاب و اماكن اعتيادية بالنسبة لسكان الرحاب و اكيد بيتجهوا للقاهرة بعربياتهم برضو
للأسف المشكلة كبيرة و هتفضل كبيرة لإن الحل إن المدن الجديدة تكون متكاملة , ودة صعب جداً دلوقتى نظراً لإن المدن دى لسة كتير منها بيتبنى مثل بعض احياء التجمع الخامس و التجمعات الخاصة بين الأول و الخامس والأماكن دى لسة تعتبر صحراء , واللى ساكن هناك بينزل بعربيتة لشغلة و لشراء حاجاتة وزيارة اقاربة اللى موجودين فى القاهرة , وانا اخدت التجمع الأول و الخامس كمثال لإنهم اكبر التجمعات الجديدة اللى اتبنت بجوار القاهرة
الشئ الوحيد اللى نقدر نقول علية يبشر بالخير فى زحام القاهرة , إن الجامعات مثل GUC , CIC , أكاديمية القاهرة , أكاديمية القاهرة الجديدة ,,,, ألخ اتنقلوا للقاهرة الجديدة و بكدة على الأقل سهلوا بعض الشئ , لإن الجامعات دى لو كانت داخل القاهرة كان زمان الموضوع اصعب من كدة بكتير
انا من وجهة نظرى شايف الحل , إن المدن الجديدة اللى بتتبنى تبقى كاملة المرافق و الإحتياجات الخاصة بسكانها بجد , لإن دة اللى ممكن يقلل زيارتهم للقاهرة , مع إسراع الحكومة فى نقل الوزارات كلها و المصالح الهامة كلها إلى القاهرة الجديدة (طبعا الغلطة هنا مش هتتكرر لإن فى مناطق لسة متبناش فيها وممكن ان شوارعها تكون واسعة جدا وتستوعب اعداد السيارات هناك و يكون لكل وزارة او ملصحة park خاص بها )
انا اسف للإطالة بس لسة عندى كلام كتير اوى عايز اقولة
المفضلات