اضافه جديده لسلسلة تجربتى ....
النهارده هنغير اويل سيل العقربه ... حد هيقولى هتغيره ليه ... اقولك عشان بيسرب زيت فوق الفتيس ...

طيب العده المطلوبه ....
بيبه 10 طويله ...
مفك عاده ....
مسمار 5 سم ....
شاكوش ...
اويل سيل عقربه جديد مقاس 13/26/7 .....

الخطوات ....
ضع الفتيس على وضع المور .... و شد فرامل اليد ... و متحركش الفتيس تانى من مكانه لحد منخلص شغل ... عشان متبوظش ظبطة الفتيس ...

هنفك القنطره فوق البطاريه و كابلات البطاريه و نشيل البطاريه بره العربيه ....
هنفك الاربع مسامير الى مثبتين حامل البطاريه و نشيله ...



و بعدين لازم تنضف سطح الفتس كويس عشان نعرف لو لسه فى تسريب ... و كمان عشان مفيش حاجه تدخل جوه الفتيس و احنا شغالين ....

و بعدين هنفك البنز المثبت لقضيب العقربه بإدينا ... مش محتاجه اى عده ... و نشيل المسمار ....



هنفك الاربع مسامير الى مثبتين العقربه فى مكانها .... و نخلى بالنا دراع العقربه داخل جوه قد ايه ؟؟؟؟؟ و نرفع العقربه لحد متطلع بره خالص .... بس خلى بالك من الجوان اوعى يضيع ... و خلى بالك اوعى اى حاجه تقع جوه الفتيس ... وخلى بالك من ظبطة الشوكه بتاعة العقربه و هى طالعه عشان هنركبها على نفس الظبطه ...



و ادى شكل الفتيس من جوه بعد مفكينا العقربه ....



هندق على مسمار التثبيت الى ماسك دراع العقربه من جوه لغاية ميقع جوه العقربه.... خلى بالك ... عشان يتبقى مكان تحت المسمار عشان يقع فيه لازم تزق الدراع لجوه خالص قبل متدق ... و خلى بالك و انت بتدق عشان متبوظش الغطا البلاستيك الى مغطى فتحة ملىء الزيت ....



هنطلع الدراع بره خالص .... و كمان المفصل الى كان راكب جواه الدراع .... هنلاقى الاويل سيل قدامنا .... شده طلع بره ممكن بمساعدة مفك او حاجه ... و نظف الدنيا كلها .... و الدراع و كله ....







وده شكل الغطا البلاستيك الى تخلى بالك عشان ميتكسرشى من الدق ...



وده شكل العقربه بعد مفكينا كل حاجه ...



و ده مكان الاويل سيل ....



و ادى شكلها بعد التنظيف ....



هنركب الاويل سيل الجديد و نركب المفصل و ندخل الدراع .... و نركب مسمار التثبيت ... طبعا عن طريق الدق عليه ... و نزيت دراع العقربه بأى زيت خفيف ....

و بكده نبقى خلصنا .... نركب بقى .... ركب الجوان الاول فى مسمارين التثبيت بتوعه ... و بعدين فاكر ظبطة الشوكه و الدراع ؟؟؟ ركب العقربه على نفس الظبطه ... هتركب بعد شوية مجهود و محاوله .... مش صعبه يعنى ....

ركب بقى المسامير الاربعه .... و ركب مسمار الدراع و اشبكه بالبنز بتاعه ...
و ادخل جوه العربيه و حاول تجرب كل الغيارات ... و اطمن ان كله تمام ...
ركب حامل البطاريه و اربط الاربع مسامير بتوعه ...
ركب البطاريه ... و القنطره بتاعتها ... و الكابلات ... و اطلع جرب .....

اتمنى انى اكون افادتكم ... متنسونيش من دعاكم ...