الموضوع: لسه مستلم اسبرانزا A113 حالا

طب رايك اجيبها افضل ولا شيفروليه سبارك لان الاتنين في نفس التمن تقريبا

المشاركة الأصلية كتبت بواسطة ماجد يوسف وهبه

متشكر يا جماعة جدا على التهانى وربنا يديلكم وأشوفكم كل واحد راكب العربية اللى يتمناها

انا دلوقت عملت حوالى 450 كم واليكم الأنطباعات حتى الآن:

الحلو فيها:
- امبارح الحقيقة عددت من امتحان صعب شوية فى وجهة نظرى. الدائرى كان واقف بطول حوالى 4 أو 5 كم من أول مطلع الأتوستراد لغاية منزل البحر الأعظم ودة كان الساعة حوالى 6 مساءا والمسافة دى كلها كنت ماشى بسرعة أقل من سرعة مشى البنى آدم بشوية واضررت انى أشغل التكييف لأنى ماقدرتش أفتح الشباك ولا اتحبس بدون هوا داخل العربية. ومع ذلك أدائها فضل زى ما هو وانا كمان ما تعبتش خالص من طريقة السواقة دى مع انى لو كنت بالألنترا كان زمانى انا وهى فى قاع النيل.الوضع ده استمر حوالى 45 دقيقة.
- امتصاص الصدمات على السرعات البطيئة هايل.
- سحب الموتور حلو جدا ولا يتأثر اطلاقا بالتكييف بل أكاد أقول انه اكبر من احتياج العربية.
- حجمها رائع يمكنها من سهولة المناورة
- عالية عن الأرض بمسافة كافية. اعلى كثير من الأكسنت مثلا.
- فرامل قوية جدا ويمكن دى احسن حاجة فى العربية قدرتها على الأستجابة السريعة والقويه بالأضافة الى ABS يصبح عندنا نظام تحكم من أفضل الأنظمة اللى انا جربتها واحساسى أنه حتى أحسن من الألنترا. وعلى فكرة الكاتالوج بيقول أن المفروض كفاءة الفرامل تزداد تدريجيا علشان التيل يتناسب مع الطنابير لكن انا من أول يوم حاسس ان كفاءة الفرامل جيدة جدا.
- نظام الزجاج الكهربائى والغلق المركزى أيضا من أحسن الأنظمة لأنك مش محتاج تزود حاجة عليه فعلا. مثلا لما تقفل لوك الأطفال علشان تلغى عمل الأزرار الخلفيه ماتقدرش أنت كمان تشغله انما عندى تقدر

الوحش فيها:
- انا رفعتها فى محطة بنزين فلت أشوف اللى الناس مش شايفاه. ولقيت حاجات غريبة فى الشاسية من الأمام هأجل الكلام فى الموضوع دة لغاية لما أرفعها تانى وأصورها وانشر الصور وأطلب رأيكم.
- اسوأ حاجة فيها نظام التعليق زى ما يكون مشوار المساعدين قصير وبعد كدة بيخبط فى الشاسية يعنى لو انت ماشى وخدت مطب على السريع شوية تحس أن العجل خبط فى الشاسيه نفسه مش أمتص الصدمة.
- صوت سارينة الأنذار منخفض للغاية.
- أنوار اللمبات اللى فى التابلوة (الدينامو - الفرامل - الأشارات - الخ) ضعيف جدا بالمقارنة بأضاءة التابلوه نفسه ده بالأضافة الى ان صوت الأشارات لما تشتغل واطى برضة لذلك سهل جدا انك تنسى الأشارة شغاله وانت ماشى.
- نيجى بأه لأهم حاجة وهى الأحساس بعدم الأستقرار على السرعات العالية (طبعا انا جربت لغاية 100 كم/س فقط نظرا لفترة التليين). تبقى ماشى على 60 كم /س وتحس انك ماشى 140كم/س مثلا مش عارف ده لأنى بقارن بعربية كبيرة زى الألنترا اللى جبت بيها 195كم/س ولا دة طبيعى فى العربيات اللى نفس الحجم دة. الرأى النهائى فى الموضوع ده مؤجل لمزيد من التجارب
- مشكلة الفتيس اللى بيعض فى الأول والثانى لسة موجودة وان خفت قليلا لتعودى عليها أو لتليين التروس نفسها
- صوت الفتيس عالى كأن التروس عمرها الأفتراضى قرب. برضه مش عارف ده طبيعى ولا لأ.

مبدأيا دى تنفع لو واحد بطوله عندة مشاوير صغيرة داخل البلد لكن واحد عنده عيلة كبيرة وبيسافر كتير لا أنصحه بيها اطلاقا


دى الأنطباعات الأولى وهحاول أعمل تقرير نهائى بالصور بعد صيانة الألف كم أن شاء الله

يالنسبة للأستاذ ابراهيم اللى بيسأل عن حجم الشنطة وحجم العربية ككل بالنسبة للماتركس هى طبعا أصغر من الماتركس بكتيير ولا تقارن ابدا بيها. الشنطة يادوب تشيل شوية خضار من السوق بس ممكن تقفل الكرسى اللى ورا وتاخد أكتر من كدة يعنى الفاكهه كمان.

وسنوالى الأخبار تباعا

انا لقيت كلام تقريبا عكس كلامك عن نفس السيارة وبصراحة الواحد بقى محتار جدااااااااااااااااا هى كويسة ولا معقولة ولا وحشة وحرام الواحد يضيع فلوسة فيا ريت نقدر نوصل لقرار سليم بخصوص الحكم على الاسبرانزا
http://www.nilemotors.net/Nile/showthread.php?t=9173

هل هناك اى فروق بين الاثنين غير في الحجم ؟ حد عارف حاجة؟

حضرتك ما قلتش اخر الاخبار مستنين باقى الموضوع الشيق

انا آسف يا جماعة على التأخير بس فعلا مش عايز ادى حكم نهائى الا لما أكون متأكد 100% من رأيى

بس كل المؤشرات بتقول اللى بيفكر يشترى يستنى شويه لأن فيها حاجات لا يمكن السكوت عليها والوضع الآن مرهون بزيارة للتوكيل (أعتقد انها هتكون أكثر من مرة).

وآسف للتأخير مرة ثانية

وعد أول ما هوصل لرأى أول ناس تعرفوه هو أنتم.

مستنيين الصور