يا ريت يا جماعة تحكوا و تفرحوني عن الخناقات مع الجيران اللي حصلتلكم
سواء بسبب العربيات و الركن أو لأسباب تانية
إحكوا كدة و خلوني أتمزج.
خاصة لو حاجة سببت قطيعة أو خناقة إتطورت و الناس إتفرجت و كدة!
عرض للطباعة
يا ريت يا جماعة تحكوا و تفرحوني عن الخناقات مع الجيران اللي حصلتلكم
سواء بسبب العربيات و الركن أو لأسباب تانية
إحكوا كدة و خلوني أتمزج.
خاصة لو حاجة سببت قطيعة أو خناقة إتطورت و الناس إتفرجت و كدة!
تموووت في الخناقات ده يا موتورايزر ههههههههه
( بهرج طبعا معااك )
معلش يا باشا هو حضرتك هتستفيد ايه لما تسمع حكاوى عن خناقات حصلت وخلاص ولاى سبب يكن؟؟؟
ههههههه أه و الله أصل عارف لو خناقة مع واحد خبطك ولا حاجة بتاخد لحظتها و متشوفوش بعض تاني .
إنما الجيران بقي بيفضلوا متربصين لبعض و لابدين في الدرة :d
معلش يا ماكا باشا انا عارف إن الموضوع غريب بس أصل انا علاقتي بجيراني مش كويسة و في تربصهم بيا بحس إنهم كوميديين جداَ فا كنت عايز أعرف لو حد له تجارب مشابهة.
و الله يا باشا مش لوحدك , انا بحس جوهم بغل دفين و رغبة فى الانتقام
وياريت لو تحكلنا موقف كوميدى من ايهم
أنا شبه معرفش أى حد من جيرانى!
اكيد يا relentless لسه ناقل جديد مثلا
ويارب تكون معرفتك بالجيران مش بالخناق...:DDDD
انا اتخانقت مع واحد من الجيران بسبب الركنة انا الركنة عندي قدام البيت صعبة شوية لاني علي شارع رئيسي و جنبي كلية الهندسة فبيبقي شبه مستحيل انك تلاقي ركنة بسهولة
في يوم راجع كنت بخلص ورق حكومي و في عز الحر و انت عارف تناحة موظفين الحكومة و طالع عيني عشان الاقي ركنة
فييين في الاخر لمحت واحد من بعيد بيطلع بعربيتة طبعا جريت انا علي المكان عدل وواقف مستنية يطلع وواحد جاري جه وقف جنبي بعربيتة و عايز يخش بدالي مع اني الي جي الاول
طبعا عينك متشوف الا النور !!
طلعت عليه قرف اليوم كلة و الناس اتلمت و كانت هيصة
------
و مرة تاينة راجع الساعة 1 بليل و بدور علي مكان مش لاقي
فلقيت واحد عندة محل البيت عندي في قدامة مكانين بس حاطط طوب مش عايز حد يركن و للعلم هو مش ساكن هنا و لا من المنطقة دي اساسا
فرحت قلتله بكل ادب ممكن تشيل الطوب عشان عايز اركن قالي لا عشان مستني عربية ابني هركنها هنا الليلي دي
طبعا انا سمعت كدة واتعرفت و كنت هضربة لولا اخويا شدني
صباح الخير يا جاري انت في حالك وانا في حالي
بقدر المستطاع.... مش بحب يكون فيه أي نوع من أنواع المشاكل أو حتى عدم الاستلطاف ما بيني و بين جيراني... ولا حتى مع أي حد في المنطقة.... (الا للضرورة القصوى و ديه ماحصلتش غير من زمان أوي و الحمد لله.. و ماكانتش مع جيران... كانت مع أصحاب محلات)
ببساطة عشان دول الناس اللي في وشك علطول... و صبح و ليل بتشوفهم... و لو تعبت ولا حصلتلك مشكلة... هما اللي ممكن يساعدوك... و على فكرة... أنا مش بتكلم على يوتوبيا... أنا بتكلم عن واقع.... زي ما العداوة و الكراهية متبادلة... كمان الحب بيكون متبادل... (ماعدا من بعض النفوس المريضة... اللي بيفتكروا الحب ده نوع من المحاولة لنيل رضاهم ... و طبعا دول علاجهم بيكون الاهمال التام....)
سبحان الله
مع احترامى لجميع المتخانقين و لكن قبل ما تتخانق على هيافة من هيافات الدنيا ارجو ان تتذكر
ان الرسول الكريم عليه الصلاة و السلام قال فيما معناه
ما زال يوصيني جبريل بالجار حتى ظننت أنه سيورثه .
--
رواه البخاري ومسلم .
قلت المفيد
جزاك الله خيرا
ولله يا باشا كانت بتحصل حاجات من دى ايام ما ولدى الله يرحمه ماكان موجود لاكن من بعد ما توفاه الله والعربيه اتباعت مافيش الكلام ده حتي لما جوز اختي بيجي يركن عندنا مش بيلاقي مكان عند البيت ويروح يركن في حته تانيه
سبحان الله ! الموضوع ده فى وقته :)
بكره ان شاء الله رايحين نعمل شكوى فى الجيران و احتمال تتعمل قضية ربنا يسهل :)
بسبب مشاكل فى البيت و هما منفضين بقالهم سنتين , ا للى هيفصل بينا بقي القضاء , ادعو يا جماعة ربنا يكرم :)
عندى بردة للاسف بعض الحوارات الخايبة منهم لكن بفكر نفسى علطول بان..(تسعة اعشار حسن الخلق فى التغافل)لان ببساطة لو ركزت فى كل حاجة حتمشى تتخانق مع دبان وشك
الموقف الوحيد اللى حصل انى كنت راكن العربيه ولقيت واحد راكن صف تانى ومعشق العربيه سالت عرفت انه دكتور صاحب عياده (نساء وتوليد) طلعت ملقيتش واحد راجل يوحد الله المهم قولت للبنت هو انتوا عندكوا عربيه نوبيرا مركونه تحت قالتلى دى بتاعت الدكتور قولتها خليه يخرجنى علشان هو قافل عليا ومعطلنى ونزلت والله استنيته اكتر من ربع ساعه وكان محروق دمى جدا والناس فى الجراج مقدروش يزقوها شويه لقيت الدوك نازل بقا وبيقولى على فكره انا سالت الناس قالولى ان العربيات دى مش طالعه وبايته هنا قولتله ده على اساس انهم ماسكين مواعيدنا ياعنى ولاايه والناس دى عرفت منين انى مش خارج لقيته بيجادل معايا ويقولى انا بسيبها على المور بلقيها فى نص الشارع قولتله خلاص اتعب واركنها بعيد واتمشى او دخلها الجراج بس ماتاذيش غيرك
لقيت فى الاخر انه باردو مافيش فايده ومافيش حاجه اسمها مراعاه الجار او الغير والجراج علشان موقف فيه عربيه مش عارف اوقف العربيه التانيه فاميش غير الشارع
المشكله بقا باروح لوالدتى يوم الخميس وابات هناك فى فيصل واحد غريب الطباع عملت معاه مشكلتين قبل كده البيه مش ساكن فى العماره ده ماجر محل وعامله مخزن وبيسب عربيته بايته هناك واخرتها عامل حديد ادام المحل والبارد كان مره باعتلى البواب بيقولى شيل العربيه على مافهمت الوضع قولتله خليه يخبط دماغه فى اقرب حيطه وكل لما اروح ادعى ربنا الاقى المكان فاضى علشان اقف واحرق دمه >>>>>>>>>>>>اخر بجاحه
طيب خد عندك دى...هى مش حصلت معايا حصلت قدامى
الساعة 7 صباحا..قومت من النوم ( وكنت نايم من أقل من ساعة) على صوت عربية عمالة تدى كلاكسات بطريقة هيستيرية..بصيت من الشباك لقيت عربية فيرنا صاحبها واقف جنبها و ايه من الشباك مش بيشيلها من على الكلاكس و عربية لانسر شارك مش من المنطقة(لأننا حافظين كل عربيات الشارع و عارفين مين اصحابها)قافالة على صاحبنا ده...عرفت بعدها ان صاحبنا ده نازل رايح شغله و مستعجل اوى و الاخ بتاع الشارك حاططها على الـp و مش عارفين يحركوها..
كان طبعا الكلاكسات هتفرتك دماغى..بس هعمل ايه يعنى واحد محتاس مش عارف يروح شغله بسبب واحد تانى بارد عايز يتشتم
.
.
المهم خير اللهم اجعله خير لقيت احد البلكونات اتفتحت و خرج واحد يقوله يا استاذ بعد اذنك الكلاكسات دى انا مش عارف انام كده..رد صاحبنا بتاع الفيرنا و هو مستمر فى سيمفونيىة الكلاكسات..طيب انا اعمل ايه دلوقتى انا عايز اروح شغلى و لفيت على صاحب العربية ده كل العمارات اللى فى الشارع مش لاقيه لو عندك حل تانى قوله لو معندكش اسكت...رد بتاع البلكونة بعصبية يا استاذ برده مش هينفع كده ماهو الكلاكسات مش حل برده مش عارفين ننام...راح صاحبنا بتاع الفيرنا قالو ادام معندكش حل اسكت...المهم كلمة من هنا على كلمة من هنا..لقيت بتاع الفيرنا عايز تتخانق انزل....راح اخينا التانى ده نازله...و الموضوع مخدتش اكتر من 20 ثانية و لقيته ماسكين فى بعض ضرب و موقعين بعض على الارض...و هو البوابين دخلوا بعدوهم عن بعض راح الراجل اللى لسه نازل ( طلع صاحب محل عندنا ) راح فاتح محله و مطلع سنجة محترمة ( و دى كانت اقول مرة محدثكم يشوف سنجة كده على الطبيعة ) و كانوا البوابين خلو الواد بتاع الفيرنا يطلع شقته و حامل السنجة واقفله قدام العمارة و هشرحوا يعنى هشرحوا...!!
.
.
استنوا بس..اللذيذ فى الموضوع ان اثناء متابعتى للخناقة من البلكونة و انا دماغى هتفرقع و نفسى انام لقيت شخص عجيب كده نازل و لابس و متشيك ( يعنى ده بقاله اكتر من ربع ساعة بيلبس على الاقل) راح فاتح الشارك و راكنها فى مكان تانى مش قافل فيه على حد و راح طالع بيتهم تانى ( تقريبا كان لسه هيكمل فطار)...و محدش شافه
.
بينى و بينكم كان خلاص الزعيق هدى و الوضع حاليا ان واحد قاعد فوق و التانى واقفله بالسنجة تحت و الجيران بيكلموا الاستاذ بتاع السنجة عشان يخلصوا الموضوع...روحت داخل نايم مع انه كان نفسى اعرف ايه اللى هيحصل بعد كده
صحيت على الساعة 12 ظهرا كده لقيت بوكس شرطة واقف تحت العمارة و كام مخبر كده و راحوا ماشيين و الفيرنا بتاعت الاخ اللى كان عايز يروح شغله مش موجودة...و الامن مستتب و تمام التمام
.
.
نصيحة أخوية بقى ابقوا خدوا بالكم لو اضطريت تتخانق من موضوع السنجة اللى ممكن تطلع فجأه و تلاقى نفسك فة مواجهة سنجة و انت لابس و متشيك ورايح شغلك دى.
.
.
خناقة سخنة اهه بالهنا و الشفا يا حاج موتو
٩٥ % من الشعب ده مكانه مستشفى العباسية
انا جارى اللى تحت مكفر سيئات اهلى
طيب دول الجيران و ممكن نقاطعهم و نريح دماغنا
طب القرايب نعمل فيهم ايه
الحاجة الوحيدة الكويسة العملوها جرانى .. هما انهم علمونى انى عمرى ما اتصدر فى حاجة ابدااااا
اللي بيتخانقوا معاك عشان بتركب انبوبة ؟؟؟
علاقتي بجيراني لا تتجاوز سلام عليكم وعليكم السلام
وفي ناس لو شوفتهم في مكان غير البلكونة مش هعرفهم في الشارع
دلوقت علاقتي بقرايبي الجيران اقتصرت على السلامات والطيبات وخلاص فينش
بس كان في حتة خناقة من اسبوعين عند الجيران عايزة موضوع لوحده
فيها كل مظاهر الفساد واستغلال السطلة والنفوذ وفي نفس الوقت فيها شهامة وجدعنة الجيران
انا واخد شقة جديدة فى عمارة والشقة مش متوضبة المهم عايزين نوضب
اول حاجة جبنا ونش علشان نطلع الرمل والاسمنت وننزل الردش وكدة تيجى الجيران تقولك اية لا انت كدة هتكسر السلم وانت طالع بالحاجة دى (اجزاء الونش)وكمان الونش هيكسر وجهة العمارة وهو شغال قلتلهم اعمل اية خلاص انا اجرت الونش ادفعولى حق الايجار وانا امشية طبعا كل واحد دخل شقتة
المهم بعديها بكام يوم جبت شوية طلبات تانى وقلت اجيب عمال يطلعوها (اوفر من ايجار الونش) وانا بطلع الحاجات من علىة السلم لقيت واحد من العمارة طالعلى يا استاذ انت كدة هتوسخ السلم رديت وقلتلة وانا اعميل اية اجيب ونش مش عجبكم اجيب عمال مش عجابكم ان شاء الله المرة اللى جية هعمل مهبط طائرات فوق العمارة وابقى اجيب الحاجة بالطائرات اعتقد دى مش هتضركم
دة موقف من ضمن المواقف
استنوا لسة فى مواقف كتير هكتبها بعدين لما افضى
انا دلوقتى بقيت مسجل خطر فى العمارة وعمال مشاكل مع 4 شقق من 21 شقة وعلى فكرة المشاكل الشقق اللى متخانق معاهم هما دول اللى المفروض انى رايح العمارة وفى بينا سابق معرفة
احنا جرانا اللى جمبينا مزعجين شد وخناقات مع بعضهم وصوت عالى طبعا وصوتهم كلوا معايا فى الاوضة لدرجة انا بروح انام فى living من كتر دوشتهم ثانيا حشريين اوى وبيرمو نفسهم كل شوية حاجة ملل :fun_36_3_4[1]: واللى تحتينا علاقة غير وطيدة اوى وخصوصا صاحب العمارة بسبب الركنة مرة ثانيا بسبب مشاكل كامنة من سنين مكنتش لسة اتولدت مع افتراض حسن النوايا من ناحيتنا وسوئها من ناحيتهم دا حتى السلام عليكم مكنوش بيردوها او بيقولوها
مرة بيغسلوا الشيش وقعولي الشيش علي العربية و عينك ما تشوف إلا النور
خبطة في السقف و الباب الشمال بسبب سن الشيش و الإرتفاع عاملة زي ما تكون العربية واخدة كرباج ، و المشكلة انها جاية في طرف السقف يعني تقدر تقول أخدت خبطة في العارضة
و طبعا مقدرتش افتح بوقي، الناس أول ما خبطوة قالولي الشيش اتفك غصب عننا و احنا مستعدين ندفع تمن التصليح، فطبعا من زوق الناس اتكتمت رغم ان الجنب الشمال شكلة مشوهه بالنسبة ليا بسبب الخبطة دية و لحد النهاردة مش عارف اصلحها و لا مصلحهاش، و طبعا يوم ما أجيب ابيع العربية حلاقي اللي حيشتريها فية فتاكة الدنيا و مش بعيد يقولي نزل 5000 جنية من تمن العربية علشان الخبطة كنوع من الإستهبال يعني ما هي ناقصاة هو كمان رغم ان السمكري قال متكلفكش 70 جنية يعني و اعملها عادي دية مش خبطة في الدواخل بس فعلا مش عارف اعملها ولا لأ
النهاردة دكتور في الجامعة لسة حاكيلنا موقف لذيذ أوي حصل معاه في أمريكا
كانوا في الشتاء والتلج كان بينزل بغزارة لدرجة إنه بيغطي العربية بالكامل ، فكان راجع في يوم من الشغل ولقى ركنة فاضية قدام بيت جاره قام ركن فيها
فلما صحى تاني يوم وبيبص لقى جاره بيشيل التلج من على عربيته ، طبعاً هو مصدقش إن فيه جيران بالأخلاق الفظيعة دي
اتضح بعد كده إن الراجل كان فاكر إني دي عربيته لأنها واقفة في الركنة بتاعته
يعني كل واحد هناك ليه مكان ركنة ، ومحدش بيركن مكان حد
شفتوا نظام واحترام أكتر من كده
طبعاً الدكتور اعتذرله إنه مكنش يعرف الموضوع ده وراح شاله التلج من على عربيته
انا كمان عندى موضوع صغير.
فى مصر فقط يحل لاى محل ان يحتل الرصيف امامة بالاضافة انة بيمنع اى حد انو يركن ادامة على اساس ان الشارع وارثة عن ابوة.
أخوكم قرر انو يغير القاعدة دية.
أنا ساكن فى عمارة وتحتنا محل للهدايا وجرى العرف انو مينفعش اى حد من السكان يركن ادامة وعلشان انا مكنش معايا عربية فمتضرتش بالموضوع دة.أختلف الحال تماما بعد لما جبت العربية ونظرا للزحام الشديد فبضطر اركن ادامة "مش غلاسة يعنى" المهم البية صاحب المحل قاللى شيل عربيتك من هنا يا كابتن.
اللى دايقنى انو قاللى "كابتن" مع انى مكنتش لابس شورت ولا كنت بتنطط ادامة :biggrin2: كلمة من هنا على كلمة من هنا.قولتلة أعلى ما خيلك أركبة.
أتصلت بالحى "ليا حبايب هناك" اشتكيت انة بيستخدم الرصيف لاغراض تجارية ..تانى يوم بتوع الحى لاقيتهم بيشلولوة واجهة المحل علشان مش قانونية وطالعة عالرصيف.
بصراحة لقيت المشكلة حتكبر وكلمت الحبايب فى الحى وقولتلهم كفاية كدة قرص ودن.
وحليت المشكلة بتليفون وظهرت فى الشارع فى شكل الشخص النبيل.
ومن ساعتها وانا بركن ادام المحل لو ملقيتش مكان فى الشارع.
طيب تخيلة بعد كل القصص دى كلها والخنقات دى ..............كل اللى الاعضاء اللى مشتركين فالموضوع ده جيران وفعمارة واحدة اية ممكن يحصل بنا...............اكيد برضة هيحصل مشاكل.....ولا كلنا هنراعى بعض
طبعا حضرتك على عيني وراسي بس ممكن اعرف حضرتك اتخانقت معاه ليه مع العلم انه زي ما حضرتك قولت انه مش ساكن ولا من المنطقه اساسا لكن هو قالك ان ابنه جاي يركن هنا هي الفكره لو كانت اشتغاله ومفش اي حد جه ركن لكن مادام حد جاي اوك ولو راي غلط حضرتك ممكن تتفضل تقولي لاني الصراحه بحاول استفاد من المواقف دي واتصرف ازاي لو حصلتلي وشكرا
اه من الجيران
انا عندي جيران كدا و جيران كدا
عندي اللي سلبي جداً و لو الشارع فيه حريقة محدش منهم ليه دعوة و سلبيين جداً
و عندي بقى اللي بيعمل مطب قبل الجراج بتاعي علي طول!!
و بصراحة اتكلمت معاهم بذوق و ادب و برضه مفيش فايدة و مش فاضي لهم.. بس بصراحة حاجة تقرف
انا زهقت من جيراني..بس واضح اني مش لوحدي
متفكرونيش بقى
انا حاليا معنديش مشكلة مع الجيران خالص لأن حتى لو قدام البيت مشغول بركن الناحية التانية لكن البيت القديم عند والدى فى شارع جانبى يدوب يعدى عربيتين جنب بعض و فى اماكن فى الشارع الناس عاملة الرصيف كبير فا مينفعش عربية تقف ، المهم قدام البيت عندنا واسع و البيت اللى جنبنا قدامة أضيق شوية و البيت دة فى واحد جارنا "تكسجى" ، هو شاب يعنى مش كبير وعربيتة حاجة ما شاء الله اوبل تقريبا موديل ستينات والأكصدام بتاعها عبارة عن برميل متفصل على شكل اكصدام
والدى جالة الضغط بسبب البنى أدم دة وكل يوم والتانى زعيق وهو مبيحسش ومبيفهمش
يعنى ابسط حاجة ييجى يعملها وهو بيركن انة مبيفرملش اصلا ييجى يحضن ورا العربية لحد ما يخبط فيها وعربيتة تقف وهكذا على طول ، والدى من غلبة راح جايب حجرة حاططهالة فى المكان اللى بيقف فية علشان توقفة ميخبطش فى العربية وهو كل يوم ييجيى يشيلها وبرضو يقعد يخبط فيها
البى ام الصراحة ما شاء الله مبيحوقش فيها البرميل اللى هو راكبة بس المشكلة الفترة اللى فاتت العربية كانت مرشوشة وطبعا الخبطات دى بتجرحها ، وساعات يقف لازق الأكصدامين فى بعض ويقعد يركب وينزل العربية عمالة تطلع وتنزل بيحك الأكصدامين فى بعض بمنتهى التناحة
ولو ركن قبل والدى بيقف قدام البيت بتاعنا فا والدى لما يقف بتكون العربية قافلة البوابة شوية وفى واحد شبة كفيف لما بينزل بيخبط فيها ، انة يفهم الكلام دة مش ممكن !!
وأخرها بقى عربيتى كانت مع والدى من امبارح ولما روحت اخدها انهاردة لقيتها كانت واقفة فى نفس المكان ورا البنى أدم دة وخط ابيض بعرض الأكصدام أكيد بسبب خبطة محترمة منة لأن المعجون مطرقع تقريبا فا عامل خط بعرض الأكصدام
اللى والدى اكتشفة مؤخرا إنة فهمة على قدة جداا ومبيبقاش فاهم حاجة اصلا من الكلام ، وبالرغم من كل الحوارات دى برضو خابطلى العربية !!!
انا بحاول دائما أراعي الجيران ,
و كام مرة الاقي واحد من العمارة اللي قصادنا راكن مكاني فأقول في نفسي اننا جيران و مش مشكلة و أدور على ركنة و لما الموضوع اتكرر طلبت من البواب بتاعهم يقوله ميركنش مكاني , و برده الموضوع اتكرر ,
و اكتشفت انه ضابط في الجيش و بارد جداً و مش بيراعي الجيرة و لا أي حاجة ,
فقررت إني مش هخليه يركن مكاني تاني و في مرة جيت متأخر و لقيته راكن مكاني فركنت موازي ليه و قفلت الشارع و شديت فرامل اليد و سبت العربية و طلعت , لغاية لما نزل و معرفش يطلع غير لما نزلته ,
و من ساعتها مركنش مكاني و الحمد لله ساب المنطقة كلها دلوقتي.
الحمد لله عندى جران من ارخم نوع فى الدنيا
اولا احنا فلل و بنبص على مساكن حكومة ف اولا صراع طبقى و حقد فى النظرات و تحفز و كل حاجة ممكن تتقال بشكل بشع
لدرجة مرة عنت جايب عيش للكاب بتاعى ف ست من الستات التخينة الغريبة دى بتقولى انت بتأكل الكلب عيش و احنا مش لاقيين ناكول
............ طب دى يترد عليها ازاى
و خدو من دة بلاوى كتييييييييييييييييييييييي ييييييييييرررر
و طبعا بسبب الركنة ال اية واحد مبيحبش يركن غير تحت البلكونة بتاعتة هههههههههههه
ف صراحة انا بتجنب الاحتكاك بيهم خالص ماعدا واد ساكن قدامنا قليل الادب و اى حد يطلع البلكونة يلاقى الباشا عريان وواقف بيبحلق ف طبعا الى حصل انى شتمتة من البلكونة لاقيتة نازلى و نزلتلة و .................حجات كتير و قلة قدب و طبعا الواحد فى الحالات دى مبيبقاش زى ما الناس فكراة فرفور و الحمد لله مبقاش بيبص ف الشباك اصلا و لو حصل و كان حد واقف تلاقية باصص الناحية التانية ههههههههههههههه ناس مبتجيش غير ب العين الحمرا
و الحاجة الى خلتنى اموت من الغيظ بقى و دة كان اخر موقف لحد دلوقتى الحمد لله
مرة واحدة صوت بووووووووم و العربية بتزمر اوبااااااا انا قولت حد دخل فيها
اطلع الاقى طوبة على سقف العربية
طبعا الحل كان
و انا فى الشارع و ب
اعلى صوت
وهاتك يا شتيمة ف الى عمل الموضوع دة و فى الشارع و فى كل الناس الحاقدة السلبية بطريقة بشعة الى قدمنا دول و العمارة كلها اترصت فى البلكونات كما هو الحال لو حد حتى خرج من البيت عندنا تلاقى العمارة الى فوشنا كلها طلعة تبص مين الى قفل الباب بتاعتا ههههههههههههههههههههههه
ولا حد اتكلم ولا فتح بقة
..................
كفاية كدة ...