-
احمد باشا اقولك حاجه طالما انت نزلت وسلمت يبقى انت بتحبها بس بتزوق الموضوع انه من الزوق والادب انك تسلم عليهم يهني حجه وخلاص عشان تشوفها وتكلمها وصدقني انا حاسس بيك بس انا الحمد لله مبشوفهاش خالص ومبحاولش اشوفها لاني ما صدق اتلميت على نفسي شويه مع اني ساعات بكون مخنوووووووووق او وافتكرها خصوصا لما اسمع اغنيه كنا بنحبها او اشوف اي حاجه تفركني بيها بس برده معتش ينفع ارجع تاني وبقولها بكل صراحه للاسففففففففف ما ينفعش نرجع
بجد يا احمد لو كنت بتحبها وشايف انها تستاهل تيجي على نفسك شويه وترجعلها حاول لكن لو شايف ما ينفعش يبقى شيلها نهاااااااائي من دماغك ولا تسلم ولا تتكلم
-
بسم الله الرحمن الرحيم
انا كده ياشباب وصلت للغرض الاساسي لعرض الموضوع ده..
وانه اعرض خلاصه تجاربي في الحياه من خلال مواقف عشتها..وعشتها بجد ..مش مجرد ان حد حكهالي ..او حكمه قرأتها في كتاب..
دي حاجه انا اتعملتها لما اتصدمت بيها في الحياه
.
أولا:
التميز شئ مهم ..التميز بيديك قيمه وسط الناس..
وده حسيته من خلال تميزي في الرسم والشعر والمستوى الدراسي
ثانيا :
الرياضه بتديك ثقه بنفسك جدا
وده جربته لما كنت بشتكي من التلعثم ..والموضوع ده قل بعد ممارستي الرياضه ..وظهور ملامح القوه على جسمي
ثالثا :
الصاحب الصالح ..بيرفعك
زي ايام ثانويه عامه ..اصحابي كانوا سبب كبير في نجاحي
رابعا:
الصاحب السئ ..بينزلك
زي صاحبي الي علمني السجاير في الجامعه
خامسا:
المظاهر خداعه جدا ..المهم والاهم الجوهر
زي البنت بتاعة بولاق الي حكيت عليها
سادسا:
البيئه المحيطه بيك ..مستحيل تأثر فيك لو ده كان اختيارك
انا قعدت في بولاق الدكرور وسط الحشيش والمخدرات ,ومع ذلك –بفضل ربنا – ما إتأثرتش بالبيئه دي ..عشان انا اخترت كده
سابعا:
لازم قبل ما تاخد قرار .تكون متأكد منه 100 % عشان ماتندمش عليه
زي قرار تحويلي من طب لصيدله ..والي ضيع عليا سنين من عمري
ثامنا :
قصص الحب في الجامعه ..غالبا تفريغ عاطفي لشباب هرموناتهم زياده في سن المراهقف..
وانا جربت كده بنفسي مع زميلتي في الجامعه.
تاسعا:
الفرق بين الصاحب الحقيقي وصاحب المصلحه..
صاحب المصلحه تقفل بابك في وشه ..مايستاهلش انك تضيع ثانيه من وقتك معاه
وصعب فعلا انك تلاقي صاحب حقيقي ..صاحب حقيقي يحبك ..ولو وصل الامر انك يبيع نفسه علشانك ...يبيعها وهوا مبسوط انه اشتراك
عاشرا:
اعمل الي انت عاوزه ..طالما انه صح..واوعى توجع دماغك بالناس عشان ماتتعبش..زي ماانا تعبت فتره من الزمن قبل ما اوصل للحقيقه دي..
اني اعمل الصح ..ومايهمنيش كلام حد
عشان الناس بتشوف الحاجه زي ماهيا عاوزه تشوفها ..مش زي ماهيا في الحقيقه..
يعني الحقيقه ان الضلمه ..مش بتخوف ..عشان مفيهاش حاجه مُرعبه
بس الناس اختارت تشوف الضلمه مرعبه ..عشان هما عاوزين كده
الحادي عشر :
ودي من نواتج الزمن الهباب الي احنا عايشينه
حرص ولا تخونش..ومفبيش حاجه اسمها كلمه الراجل بـ 1000 ورقه
غلط
غلط
انا مشروع عمري كان هيضيع مني بسبب كده..اني كنت مثالي زياده عن اللزوم اوي..وده ياخدنا للنقطه رقم 12
الثانيه عشر:
الي له ضهر ..ماينضربش على بطنه
لولا ان عمي مفتش مالي واداري في الصحه ..كان ممكن صيدليتي تضيع مني ..وشكرا للعضو الكريم الي اضاف الجزئيه دي
الثالثه عشر :
الي بيتعب بيلاقي
انا تعبت بجد في الصيدليه ..عشان كده ربنا رزقني فيها واكرمني أوي
الرابع عشر :
الحب جميل اوي
بس جرح القلب ..صعب أوي لدرجه ان انا مهما وصفت مش هقدر اديله وصفه الحقيقي ..صعب لدرجه محدش يتخيلها الا الي حسها او عاشها
بعد الشر عليكم من كسر القلوب
بس الي يبيعك ..لازم تبيعه ..مهما كان ده صعب عليك .
الخامس عشر:
الي بيعمل خير ..بيترد له خير
وده اتعملته من الراجل بتاع الكاوتش ..واترد ليا لما نور عربيتي قطع مني في طريق زراعي مقطوع
السادس عشر:
صاحبك مش الي بيخرج معاك كل يوم ..وبتلعبوا ع القهوه مع بعض
فرق كبير جـــــــــــــــــــــدا
صاحبك بتعرفه وقت الجد ...ووقتها بس بتبان معادن الرجال
السابع عشر :
زي ماقلت قبل كده ..المظاهر خداعه
بأكد عليها كمان مره ..زي موقف وكيل النيابه الي انا عملته ..بس مش عيب الي انا عملته ..طالما أخدت حق صاحبي ..وبالقانون ( بلطجه شياكه)
الثامن عشر :
مشاركه همومك مع من تحب ..بتريح
ودي كانت مشاركتي ليكم هنا يا احلى شباب في مصر
..........................................
يارب يكون حد من هنا استفاد من تجربه حياتي .
وتحياتي لكل واحد شاركني هنا في موضوعي
بس ياريت تبصوا لموضوعي على انه حاجه ممكن تتعلموا منها ..مش حدوته
.
نفسي بقا حد هنا يشاركنا تجاربه ..وإتعلم منها أيه؟؟؟؟
تحياتي لأول مشارك بعدي
.
-
نسيت اهم نقطة انت ذكرتها فى اول الموضوع *الالتزام الدينى والتقرب من الله بيعطيك قوة وبيحسن ادائك فى كل خطوة
وشكرا ليك تجربة مفيدة يمكن انا اكون عدتها من زمان بس فكرتنى بأيام جميلة وكل انواع الذكريات بحلوها ومرها بنجاحتها وفشلها بكل الى انت ذكرته وعلشان كده انا قولت لك كمل ولا يهمك يمكن لان كل واحد فينا شاف نفسه فى تجربتك مع اختلاف الزمان والتجارب
ويمكن لنفس السبب انت اتهاجمت من ناس ماكانش عندهم شجاعتك ربنا معاك
وبالتوفيق يا دوك :rolleyes2:
-
عايز اقولك انى قريت التوبيك ده اكتلر من 10 مرات
بجد انته انسان محترم و خلوق
تقبل مرورى
-
شكرا ليك w-m-a
مش عارف راحت مني أزاي
القرب لربنا بيريح أوي أوي أوي أوي أوي
بجد بيخليك مطمن جدا ..مش بتخاف
مش بتخاف تموت ..عشان عارف انك مش مقصر في حق ربنا ..وعارف انك لو رحتله في اي لحظه ..مش هتلاقي غير رضاه عنك
ودي بجد حستها لو بعدت عن ربنا فتره .
زي ماقولت ..هفكركم بس
كنت بركب البيجو ..وكان السواقين بيجروا زي المهابيل ع الاسفلت ..مكنتش بخاف
لما بعدت عن ربنا ..بقيت بخاف لو السواق جري بالعربيه ..ساعتها حسيت ان خوفي ده ..سببه اني بعيد عن ربنا ..ولو مت دلوقتي ..مش هلاقي غير غضبه عليا
وإنتوا عارفين غضب ربنا عامل إزاي..
.
.
وشكرا لكل الشباب الي شاركوني تجربتي.......
شكرا
شكرا
-
ربنا يكرمك يا ابو حميد ويوسع رزقك ويرزقك بالزوجه الصالحه والاولاد الحسني الخلقه والخلق (بضم الخاء واللام :) )
علي فكره انا كل مشكلتي تتبلور في جزئين وهما قريبين منك
1- كلية الطب انا بقالي فيها حوالي 5 سنين ونص ولسالي 6 وامتياز وكان برضه عندي احلام كبيره . والله كان كل املي اني اكتشف علاج السرطان :) بس دلوقتي بقي كل املي اني اشتغل في دوله عربيه :) شوفت الفرق والحقيقه ده ايقنتها وانا في تالته جبت اولي وتانيه امتياز وروحت واخد مطب في تالته جبت جيد جدا بالعافيه الحمد لله.
2-الناس من حولي انا زيك كده تمام بحب اضحك في وش كل الناس وبحب اكون اجتماعي وخدوم ولكن وأه من لكن دايما بانخدع ودايما بتكسف ودايما الناس بتستغل طيبتي لمصلحه وبعد كده اكتشف ده .... وبتأثر كتير بكلام الناس وده بيضايقني في احيان مش قليله بس المشكله انك بتحتاج وقت انك تغير من طبعك والموضوع صعب جدا ...
موضوعك شيق جدا وانا شخصيا استفدت منه
ربنا يكرمك
اخوك عمرو
-
-
موضوع جميل بس عايز اعلق على نقطة (الاحلام) واللى ذكر اكتر من واحد لما دخلوا الكلية كانوا عايزين يغيروا العالم والكلية احبطتهم
بدون انشاء
طيب وايه الفرق بينكم وبين يعقوب ولا زويل...الخ
الناس دى تعليمهم كان زفت وامكانيت ضعيفة بس خدوه وجريوا على مكان محترم يتعلموا فيه ويعملوا حاجة واتعلموا ووصلوا للهما فيه
يبقى انا ممكن ابقى زيه وابقى احسن منه كمان لو انا عايز
كام واحد بيتخرج من طب ولا صيدلة ويروح يشتغل مندوب مبيعات
وكام واحد تانى بيروح يحضر ماجستير ودكتوراة من مصر ويفتح العيادة
وفى نفس الوقت كام واحد بيشوف بره فى ايه وازاى يكملوا دراستهم (او يدرسوا بجد من الاول) مبيشغلوش نفسهم حنتجوز امتى وحنكسب كام (لان ده حيجى بعدين لوحده) لكن بيجروا وبيطوروا من نفسهم
لكن لو قعدت احبط فى نفسى واقول خلاص هو قدرنا كده هو تعليمنا كده يبقى مش حوصل لحاجة
ده يمكن ردى للناس الصغيرة اللى لسه بادية وبتتعلم
انت اللى بتعمل مستقبلك وبتحدد مسارك فى الحياة
-
لاانكر يا دكتور احمد انك شخصية متميزة وفريدة من نوعها واتمنى لك كل التوفيق
وسر من اسرار نجاحك الشخصى( وبالذات فى بلد زى بلدنا الغالية التى تفتقد لاى system ممكن ان يوظف قدرات الناس بشكل علمى فيحدث تطوير تلقائى سواء للبشر او للبلد زى الدول المحترمة المتقدمة) بعد دراستى لشخصيتك فى منظومة العشوائية التى نعيش فيها هى (قدرتك الرائعة على جذب الانظار) وتوظيف هذه المنحة الربانية لصالحك (بالحلال وبما يرضى الله طبعا ) والدليل انك حتى خليت كل اعضاء المنتدى يتفاعلوا معاك فى هذا الموضوع بالرغم انه موضوع شخصى جدا ومرتبط بحياتك الخاصة واصبحت بذلك محور اهتمام المنتدى كله
احييك على ذكاءك الاجتماعى النادر
وهى دى مصر يا عبلة
-
انا مش عارف اقول ايه
بجد موضوع متميز و انا قرأت جميع المشاركات و استفدت كتير منه
د احمد انا بتمني ليك كل الخير و بجد انت شخصيه محترمه
نصيحه مني واحده (خليك دايما مع ربنا و متبعدش عنه)
سلامي ليك كتير.
Content Relevant URLs by
vBSEO 3.6.0 PL2