الموضوع: قصه نجاح ..وقصص فشل(تجربه حياه)

بسم الله الرحمن الرحيم
أنا من مواليد محافظه كفر الشيخ
7-3-1984 لكن متسجل إني مواليد الشرقيه..عشان دي بلدنا الأصليه
والدي كان شغال مهندس كهربا في (شركه الدلتا للسكر)
وكنا ساكنين في مدينه سكنيه تابعه للشركه
المدينه كانت بتوفر خدمات ممتازه للعاملين وابناء العاملين
ومنها طبعا النادي
كنت بروح ألعب سباحه ..عشان البلبطه في الميه
كان ماسك النادي كابتن رخم موووت
كنا لما نقوله على أي حاجه..يقول( ممنــــــــــوع)
يعني مره دخلنا صاله الحديد عشان نلعب شويه
دخل يزعق ويقول :إيه الي دخلكم هنا ..هتكسروا الحديد....؟؟؟؟؟؟
المهم
كنت في اعدادي شاطر جدا في العلوم..لدرجه - والحمد لله-
الاستاذه ألحان ,مُدرسه العلوم كانت لما تعمل امتحان الشهر ..كانت تعلم ورقتي أول ورقه..وطبعا كنت بجيب 30/30
وكانت تلم الورق وتديهولي .وتقولي روح المعمل صححه هناك وخلص وتعالى
كنت بحب ماده العلوم جدا
كنت في اعدادي قاعد جمب واحد صاحبي اسمه علي
علي كان كله شويه قلمه يقع وينزل يجيبه ,يعد ربع ساعه عشان يجيب القلم
خليته مره بيجيب القلم ونزلت معاه تحت الدكه عشان أعرف إيه الي بيأخروا كده عشان يجيب قلمه الي وقع منه
على كان بينزل يتفرج على رجلين واحده زميلتنا
وللأمانه ..ساعات كنت بوقع قلمي أنا كمان..إشمعنى علي يعني
كنا فصول مشتركه

دخلت ثانويه عامه في مدرسه الحامول الثانويه بنين-كفر الشيخ
كنت – والحمد لله – موهوب في الرسم أوي
كنت بروح المدرسه ..وف الحصه الأولى ,كانت تيجي الاستاذه بتاعة الرسم تاخدني عشان اساعدها في غرفه التربيه الفنيه
ايامها كنت الدغ في حرف الــ( ر ) وكان لساني تقيل شويه
كان لما مُدرس جديد يدخل وعاوز يتعرف ع الطلبه ..يقوموا واحد واحد ..وكل واحد يقول إسمه
وأنا كنت كل مره ب تهته
وانتوا عارفين ايام ثانويه عامه..كانت العيال رخمه موووت
وكانوا يتريقوا عليا
حصلت مره إن واحد إتريق عليا بعد الحصه ماخلصت
بدون وعي مني
أكلته قلم على وشه-طلع مني فجأه كده – الواد وقع من ع التخته
والقلم فضل معلم على وشه اسبوع
اصله القلم كان طالع من واحد مغلول ومفروس
كنت دايما –طول النهار- قاعد في غرفه التربيه الفنيه أرسم
وربنا وفقني لحد ماخلصت ثانويه عامه..كنت خلصت الرسم على زجاج المدرسه كلها..كله كله
حتى البوابه الحديد..رسمت عليها
ومضيت اسمي,,ولحد دلوقتي مش عارف اتشال اسمي من عليها ولا لأ
مكنتش بحب يكون ليا اصحاب
وبالذات ان كل العيال ايامها- ثانوي بقا- كل واحد معاه البت بتاعته
الواحد بقا ياعيني كان غلبان ومكنش له مزه

ايام ثانوي بدأت مع السباحه ألعب ملاكمه ( وكنت بمارس الحديد كرياضه مكمله للملاكمه)
حسيت بنفسي حلو وجسمي بدأ يكون مختلف
ولقيت البنات عاوزه تكلمني
الحمد لله أيامها كنت بصلي كل فروض ربنا في المسجد..مكنتش بصلي نهائي في البيت..ولا فرض في البيت
كان يومي بين الصلاه - والجيم – والملاكمه – والمذاكره
مكنتش بذاكر كتير ايام ثانوي
وده طبعا كان مخوف كل الي حواليا
بس ايامها
كنت مرتاح بشكل غير طبيعي
كانت حياتي كلها متوازنه بشكل رائع
كنت بصلي بانتظام – وكنت بمارس الرياضه بانتظام – مكنتش اعرف بنات خالص-وكنت بذاكر – وكنت برسم في وقت فراغي- وكان كل الاساتذه بيحبوني وبيسموني الفنان
بس
حكايه اللسان التقيل دي ..كانت عامله ليا مشكله
روحت لدكتور تخاطب في المنصوره..
الراجل أقنعني بشكل غريب ان التلعثم مش عيب
وقالي ان تشرشل كان مُتلعثم ..وان تشرشل كان دايما يقول
Stuterring will never stop me
يعني التلعثم لن يوقفني ابدا
كنت بروحله 3 ايام في الاسبوع ..وكانت الجلسه بـ 25 حنيه
وكنت طبعا عشان اروحله المنصوره ..مشوار كبير ومصاريف أكتر
يدوبك 5 جلسات ومكملتش
عشان ظروف ثانويه عامه والوقت والتكاليف ..مكملتش
.
ولما لعبت رياضه..وجسمي ظهر عليه الحديد
حسيت بثقه غريبه في نفسي..وقلت معايا حكايه التلعثم دي
خلصت تانيه ثانوي وجبت 96.4 %
الكل قال " أحمد كده مش هيلحق طب"
وانا ولا في دماغي
انا كنت واخد احياء في تانيه ثانوي..وانتم طبعا فاهمين ده معناه ايه
يعني يا اما طب او صيدله ..أو ..............
المهم
كان ليا اصحاب محدودين ..كنا بندي بعض ميسدات بالليل بالتليفون الارضي واحنا سهرانين نذاكر..عشان طبعا ايامها اختراع المحمول مكنش لسه انتشر
كنا نعدي على بعض بالليل عشان نروح نصلي الفجر ف الجامع
ونلعب كوره بعد الفجر يا اما في الملعب بتاع النادي لو مفتوح
ولو كان الملعب مقفول
كنا بنلعب ع الاسفلت..واقولكمش بقا
لعب الكوره ع الاسفلت
بهدله..وبالذات لو كان الكل بيخبط في بعضه من غير حَكَم.
تالته ثانوي خلصت
وجبت مجموع 97%
ودخلت طب القاهره.................
أنا عارف إن لحد دلوقتي الأحداث لسه روتينيه
بس التقيل جاااي ورا



خلاصه المرحله دي

الرياضه بتديك ثقه جامده جدا بالنفس
والقرب لربنا بيديك راحه خرافيه..ولا أروع
وان اصحابك ..بيطلعوك أو بينزلوك
يعني انا - والحمد لله - اصحابي كلهم كانوا بيساندوني وبساندهم وكلنا كنا بنزق بعض للأحسن
الموهبه بتخليك مميز ..والتميز شئ رائع
التفوق برضووو احساس ممتاز..والكل بيحترم الأنسان المميز





يُتبع
الي جالي بقا
أحداث وخناقات وضرب وبنات ..فيلم عربي

مرحله الجامعه


مجموعي جاب طب القصر العيني ..فرحه كبيره بدخولي طب
كان في دماغي اني هغير الكون لما اكون دكتور..واني هكتشف علاج للسرطان والايدز ..كانت احلام اتكسرت على صخره واقع التعليم الجامعي في مصر ام الدنيا

المهم
دخلت طب ورحت القاهره عشان الدراسه
كان معايا 2 زمايلي دخلوا معايا طب..وواحد زميلنا دخل علوم
والدي ووالدهم راحوا القاهره يشوفوا لينا شقه نسكن فيها لحد مايجي الدور بتاعنا في المدينه الجامعيه
جابولنا شقه في شارع فيصل ( الي جمب الهرم)
قعدنا فيها شهر..العيال الي كانوا معايا دخلوا المدينه قبلي
فأنا مكنش ينفع أسكن لوحدي في الشقه عشان كانت بـ 1200 في الشهر
سبتها ورحت قعدت في حدايق المعادي ..في شقه صغيره كانت بـ 300 جنيه في الشهر
ودي كانت اول مره يعدي عليا الشهر الكريم رمضان ..وانا لوحدي
احساس قاتل لما تلاقي الشوراع فاضيه ساعه الفطار ..الناس داخله بيوتها عشان تفطر..وانت واقف في البلكونه مستني المدفع ....لوحدك
وتفطر لوحدك...طبعا ساعات كنت بعيط( ايامها كان الواحد اول مره يبعد عن اهله).
شفت هناك اشكال من البشر غريبه أوي
تشوف البانجو في الشارع عادي
والحشيش عادي جدا ان الناس تشربه في الشارع
انا طبعا أيامها كنت غلبان أوي,,ومكنش ليا إحتكاك بأي حد عشان بصراحه كنت بخاف منهم
جه عليا الدور في السكن الجامعي
ودخلت مدينه جامعيه في الدقي..كانت عماره 5 ادوار ..وكل دور 5 شقق..وكل شقه 4 غرف..وكل غرفه 3 سراير ..كل سرير دورين

وكان طبعا أكل المدينه الجامعيه مقرف..دايما الفراخ كان فيها دم
كان في في كل دور انبوبه وبوتجاز
كنا ننزل نجيب الغداء..ونطلع نقف بالدور عشان كل واحد يحمر ربع الفرخه بتاعه على البوتجاز الي ف الدور
وكان العمال في المدينه بياخدوا الفراخ الباقيه من الغداء ..يبيعوها للمطاعم بره..حاجه ببلاش كده

في المدينه دي شفت أشكال من الناس ..والله ماكان في دماغي انها تكون موجوده
في مواقف ماتتحكيش ..انا هقول الي اقدر احكيه
كان معايا واحد معايا في نفس الغرفه..إسمه أحمد
كان من الصعيد
دخل مره الحمام بتاع الشقه(كان حمام مشترك وكان افرنجي)
المهم ..عمل حمام وطلع
دخل بعده واحد اسمه ابراهيم ( كان في حقوق.طول بعرض وهضبه)
فجأه
ابراهيم طلع من الحمام يشتم ويزعق .ويقول مين ابن ...... الي كان في الحمام .وراح داخل على أحمد ده الاوضه وماسك رازعه في الحيطه ويضرب فيه
الي حصل ( بدون مبالغه ) أحمد ده كان فاكر ان الحمام ده بلدي ..وإن بلاعه الميه الي تحت الحوض هيا الــ................. .العين
وطبعا المنظر كان مقرف
مش قصدي اقلب بطنكم ..بس ده حصل فعلا
ايامها كنت لسه بلعب حديد ..لكن مش بانتظام
دخلنا على امتحان الترم ..دخلت نمت الساعه 3 الفجر عشان يدوبك انا ساعتين واصحي اذاكر تاني..يدوبك مكنتش لحقت أنام ..صحيت على صوت تخبيط وضحك قدام الاوضه..طلعت وانا مخنوق أشوف في إيه؟؟
لقيت زمايلنا بتوع حقوق الي في الغرفه الي جمبنا ,عاملين شيشه بلدي عموله( قزازه بيروسول ..وخرطوم ..وحجر ) وبيكركروا
طلعت أزعق..كنا هنتخانق وتبقا مشكله ..قلت أقصر الشر وأنزل أكلم المشرف الليلي ( استاذ خالد) كان قصير شويه ورفيع
نزلت أخبط عليه ..ربع ساعه أخبط عليه عشان يفتحلي ( هوا اساسا المفروض مايكونش نايم)
وصحي يقولي عاوز إيه..؟؟حكيتله ع الي حصل
قالي بالنص :" هوا إنت بروح أمـ...........,جاي تصحيني عشان كده"
ساعتها انفجرت فيه,
لزقته في الحيطه ونزلت فيه ضرب..أصلها كانت نقصاه هوا كمان يشتمني بأمي

إتعملي محضر فصل من المدن الجامعيه ..وإتعملي حاجه إسمها إخلاء إداري..يعني مليش سكن تاني في المدن الجامعيه .
عادي
رحت سكنت مع واحد صاحبي بعد إمتحانات الترم الأول في طب القاهره
صاحبي ده كان ساكن في المقطم ..منطقه اسمها الـ 70 فدان. كانت في مطلع المقطم..الاتوبيس المهكع بتاع النقل العام مكنش بيعرف يقف في المطلع..فكنت بنزل فوق في المقطم ..وانزل ماشي
صحـــــــــــــــــــــــ ــــــرا
المجمع السكني ده كان فيه عمارات كتير أوي
مكنش ساكن منها غير 10 شقق بالكتير
فــــــــــــــــــــــــ ـــــــــــراغ من كل ناحيه
ورعب بالليل
تخاف تنزل من البيت بعد صلاه العصر
رعب بجد
كان ساكن في الشقه الي تحتنا..عرسان جداد
قفشت صاحبي ماسك السماعه الطبيه بتاعتي وحاططها ع الارض وبيسمع الكلام الي بيتقال بين العريس والعروسه ..طبعا كان كلام سر

ما استحملتش اقعد معاه اكتر من اسبوع ..
سيبته وروحت قعدت مع واحد صاحبي في حته اسمها الدمرداش
قعدت معاه لحد أخر الترم التاني في سنه اولى طب
منطقه الدمرداش دي بقا ..كلها سودانيين وصوماليين
الشقه الي جمبنا على طول كانت – والله اعلم – شقه دعاره
كنت مره بذاكر بالليل ..الباب خبط..روحت فتحت ..لقيت واحد رفيع وطــــــــــــويل واسود..شكله مسطول بجد..بيقولي :"دي شقه السودانيين "
قولتله :"لا ياعم مفيش هنا سودانيين "
فجأه كان هيزقني ويدخل الشقه غصب عني..صدرتله رجلي وزقيته ..وقع من ع السلم...السلم كان في وش باب الشقه على طوول
وكنت بقا تشوف اشكال طالعه واشكال نازله ..اسود ف اسود
الكلام ده كان في الدمرداش
وهناك ..منه لله ..صاحبي ده مع انه كان في طب ..وكان ازهري
علمني شرب السجاير..وياريتني مااتعلمتها

.
.
.
سنه اولى خلصت
وروحت كفر الشيخ عشان اقضي الصيف مع اهلي
الي حصل بقا في الكليه في سنه اولى
داخل دنيا تانيه غير الدنيا الي انت كنت عايش فيها
ناس من كل بيئه ..بنات في طب معاهم عربيات وبيشربوا سجاير( يانهار ابيض بيشربوا سجاير) ايامها الحاجات دي كانت جديده عليا.
ودخلت المشرحه
مشرحه طب دي بقا...سلام قول من رب رحيم
اول مره دخلت المشرحه..البنات زمايلنا في الدفعه كانوا خايفين وبيعيطوا
وانا كان متهيألي اني هموت من الرعب لو شفت اموات
.
.
.
بعد شويه الموضوع بقا عادي جدا
لدرجه اني كنت بجيب الفطار واروح افطر ف المشرحه
تكون ماسك السندوتش بايد ..وبالايد التانيه بتشيل الدهون من تحت جلد الجثه عشان تتفرج على الي الاعصاب والشرايين والعضلات الي تحته.

والبنات بقوا بيتخانقوا معانا على الي يلحق مكان في المشرحه عشان يشوف الجثه كويس.
وكان الطلبه يحطوا الكراسي فووق بعض عشان يطلعوا يشوفوا من الزحمه الي كانت بتبقا حوالين طربيزه الشرح الي عليها الجثه.
حطيت مره 3 كراسي فوق بعض عشان اطلع عليهم واشوف كويس
المروحه خبطتني ...ووقعت من فـــــــــــــــوق الـ3 كراسي

.تيجي بقا المرحله الي بعد كده
دخلت تانيه طب وأخدت شقه لوحدي في بولاق الدكرور بـ 150 جنيه في الشهر




خلاصه المرحله الي فاتت

صاحب سئ علمني شرب السجاير
واني كنت عصبي زياده وضربت المشرف.مع اني كان ممكن اشتكيه واعمله مشاكل
واني بجد صدقت الكلام الي بيتقال ع الصعايده(مش كلهم طبعا)





يُتبع