الموضوع: (منقول)رد اخ عمل 100 الف بجين 2 عن المقارنة بينها مع اللانسر

;) ;)

most of the engines in lotus cars are toyotas
the engine is made by proton with help from lotus
the campro engine will be replaced by campro 2 - 127hp

و الموتور ده هينزلوه امتي ؟؟

الانسر بييأفل فى كوريا ترجع تتصدر من اليابان

المشاركة الأصلية كتبت بواسطة Ahmed REDA

انا كنت باشتري عربيتي من 6 او 7 شهور وكنت بالفعل باختار من نفس الاختيارين بتوعك

وكنت بالفعل حجزت اللانسر وخلصت كل حاجة

جيت في يوم الاستلام شفت الجين تو فى المعرض واتفرجت عليها رحت لغيت حجز اللانسر وخدت البروتون



احب اصحح بعض المعلومات عن البروتون



الناس متخوفة من البروتون أوي بسبب كلمة ماليزي ومدياها سمعة وحشة أوي بالسبب ده

لكن لتصحيح المعلومة العربية تقفيل ماليزي (مش تصنيع ماليزي)

فلو هانقول على البروتون ماليزي إذن فمن المنطق اننا نقول على اللانسر مصري بقى لأنها تقفيل مصري

وبرضه لو هانقول ان ماليزيا معندهش خبرة فى التقفيل أهو عالأقل احسن من تقفيل مصر



بالنسبة للانسر فهي مكونات يابانية + تجميع مصري + بعض الخامات الخفيفة مصري كالبلاستيكات والفايبر والزجاج والكاوتش

أما بالنسبة للبروتون فهي تجميع ماليزي + مكونات أثبتت جدارتها فى عربيات تانية كتير

الموتور صناعة انجليزي (وهو موتور السيارة Lotus Elise) وطبعا اللي يعرف العربية دي يعرف موتورها

1600 -- اتنين كامة -- ستاشر فالف -- اتنين انجكشن

+ انه فيه نظام اقتصادي لتوفير البنزين لما تكون بتمشي هادي من غير قرص عالعربية

اوتوماتيكيا العربية بتفصل نصف الموتور وبتشتغل بتمانية فالف بس + كامة واحدة بس لتوفير استهلاك البنزين



بالنسبة للتكييف فهو تكييف فرنساوي من انتاج شركة بيجو (واكيد الناس تعرف تكييفات الفرنساوي عاملة ازاي)



والجير بوكس بتاعها سواء مانيوال أو اوتوماتيك فهو فى الأصل فتيس ميتسوبيشي ميراج ياباني



والعفشة والمساعدين سبورت وكمان كوني أصلي



كاسيت سي دي بلوبونكت + 4 سماعات ألباين



والكراسي الداخلية ريكارو إيطالي



ده باللإضافة طبعا للـABS و الاتنين الإيرباج + انه فيها نظام EBD مانع الانزلاق (اللى هو بيقيس سرعة كل عجلة لوحدها ولو واحدة بتلف زيادة يبقى العربية بتزحلق يروح يحكمها)



فالملخص النهائي انه العربية البروتون مالهاش بلد تصنيع أصلا

لأنه الفكرة قايمة على استخدام احلى واحسن حاجة من كل نوع عربيات وتجميعهم في عربية واحدة



وده أصلا اللى أي شاب بيحب يعمله لما ييجي يشد عربيته



ولذلك فأنا باعتقادي انها عربية شبابية 100%



ده غير طبعا انها ممتعة جدا فى سواقتها وثباتها عالطريق حكااااااااية والله ماشفت عربية فى ثباتها غير الأوبل فيكترا





فانا طبعا لما كنت باشتري مبدئيا كده اللانسر أغلى

ومفيش abs ولا ايرباج ولا مثبت سرعة

غير ان ثباتها عالأرض مش قد كده (تعتبر من العربيات الخفيفة نسبيا) ومش بتاعة جري لأنها عالسرعات بتبقى ريشة

غير سياسة بروتون فى اختيار انضف واحسن القطع للتجميع (دور فى العربيات شوف مين بيحط سماعات ألباين أو كراسي ريكارو ستاندارد)



فاتوكلت على الله واشتريت البروتون والحمد لله بقالها معايا 7 شهور وعشرة على 10

وعامل بيها لحد دلوقتي 35 الف كيلو

بالنسبة لقطع الغيار وكده انا طبعا معرفش كل الأسعار لكن هقول على الحجات اللى صادفت معايا غيرتها

غيرت فانوس أمامي كامل بـ1100 و فوج أمامي كامل ب 250 من التوكيل

وطبعا انا عربيتي موديل 2006 كانت اللى نازلة من غير الدلايات والعتب والسبويلر الفايبر

رحت ركبتهم فى التوكيل بحوالى 2700

غير كده بالنسبة بقى للصيانة العادية بتاعتها فهي لحد دلوقتي زيوت وفلاتر بس واسعارهم عادية

وانا باعمل صيانة ال30 الف سألت على خليته يكشف على تيل الفرامل قاللي لا لسة بدري عليه بيعمل متوسط 50 ألف ولما بيتغير بيتغير 4 تيل (ورا وقدام عشان الـABS شغال عالاربعة) وتمنه 450 جنيه



أما بالنسبة للمشاكل اللى قابلتني في العربية وهي لسة جديدة فهي كالتالي:

1- كان فيه صوت طقطقة فى العجلة الأمامية شمال وتم ظبطه فى أول صيانة (1000 كيلو)

2- كان ريموت المفتاح مش بيشتغل غير وانا قريب اوي من العربية وطلعت المشكلة كلها تغيير بطارية

3- فيه مرة الزجاج الكهربا علق ورحت عملته

4- زرار المرايات الكهربا كان شغال 3 اتجاهات بس والرابع كان فاصل وتم تغييره

5- لما ركبت فيها أمبليفايرات للصوت ضعفت البطارية (لأن البطارية اللى محطوطة على قد العربية بالظبط) راحوا غيرهوالي ببطارية جافة أقوي ومدفعتش جنيه

6- أول ما جبت العربية استعبطت وحطيت بنزين 90 راحت لمبة الماتور منورة ورحت التوكيل شفطوا التانك كلوا ورموه وغيروا فلتر بنزين + حاجة تانية كده مش فاكر اسمها وقالولي حط 92 بس ممنوع منعا باتا تحط 90





دي كل المشاكل اللى قابلتني مع العربية حتى الآن وكلها طبعا الضمان مغطيها ماعدا المرة اللى كانت عيب بنزين دفعوني تمن الفلتر والبتاعة التانية دي حوالي 80 ج



آخر حاجة هاقللكم عليها هي استهلاك البنزين (ودي الكمبيوتر بيحسبها فى العربية وبتظهر على شاشة فى التابلوه)

مبدئيا كده لما بتكون العربية زيرو بتلاقيها بتسحب بنزين زيادة شوية + عزمها قليل وحتى لو جيت تقرص عليها هاتلاقي الـrpm يعلى والعربية ماتجريش (بيكونوا قافلين الموتور من الكنترول يونيت) وشوية شوية مع كل صيانة بيعلوها شوية لحد صيانة الـ5000 بيفتحولك فيها كامل عزم العربية



بعد صيانة الـ5000 وحتى الآن :

متوسط استهلاك السيارة للبنزين جوة البلد (ماشي بالراحة يعني الموتور شغال كاة واحدة و 8 فالف بس) بيتراوح مابين 7 لـ8 لتر لكل 100 كيلو ولو مع التكييف بتوصل لـ10

متوسط الاستهلاك جوة البلد مع الشد والقرص بيوصل أقصى حاجة لـ11 لتر لكل 100 كيلو مع التكييف بتكون فى حدود 12

متوسط الاستهلاك فى السفر لسرعات أقل من 110 كيلو فى الساعة بتوصل لـ6 لتر لكل 100 كيلو و7 أو 7.5 بالتكييف

متوسط الاستهلاك فى السفر لسرعات أعلى من 110 ك/س بتوصل لـ8 و9.5 أو 10 بالتكييف



والارقام دي ارقام حقيقية عن تجربتي بقالي 7 شهور

الارقام اللى في الكتالوج هاتلاقيها بالطبع أقل من كده لكن معروف طبعا ان أرقام الكتالوج بتقاس تحت الظروف المثالية



لو انت شاري بقى العربية لسه زيرو هاتشوف الاستهلاك فى التابلوه بيوصل لـ 13 و 15 ماتتخضش

لأنك لحد ما تعمل بيها 5000 كيلو ويفتحولك الماتور فى الصيانة هاتلاقي كتير جدااا وانت سايق ان انت بتدوس بنزين زيادة والعربية بتحوله لـrpm عالفاضي (يعني مش بيتنقل لحركة) عشان ماتقرصش عليها فده اللى بيعلى استهلاك البنزين شوية وهي لسة زيرو





أما عن اهم الحجات الناقصة كان المفروض تكون فيها

كان نفسي المرايات تكون تقفل وتفتح كهربا (والشباب دايما بيطيروا المرايات)

والكاسيت يكون عادي مش في التابلوه عشان اللى يحب يغيره (وبرضه الشباب بيحبوا يحطوا سيستم عالي)

ومافيهاش درج تابلوه (التابلوه ضرورة لأي شاااب - أمال يعني نحط الحشيش فين ؟؟ )

ولا طفاية سجاير (فيه شاب مابيدخنش ؟!؟!؟!)



دي تجربتي يا جماعة حكيتها للاستفادة ونتمنى واحد يكون معاه لانسر يحكي تجربته عنها (وتكون بتاعته مش يقول ركبتها مع واحد صاحبي لأن محدش بيحس مزايا وعيوب العربية غير صاحبها)



وياااااه بقى لو واحد يكون جرب اللانسر وجرب البروتون ويحكي برضه عن الفرق اللى حسه بينهم يبقى كده الموضوع تماااام

============
تم تغير عنوان الموضوع من " (منقول)رد اخ عمل 100 الف بجين 2 عن المقارنة بينها مع الياريس " لـ " (منقول)رد اخ عمل 100 الف بجين 2 عن المقارنة بينها مع اللانسر ".

ادارة المنتدى

انا بحترم العربيه البروتون جدا بس ليه كده كام تعليق:
- بالنسبه للموتور فهوه 1600 سي سي.. و موتور ال LOTUS ELISE 1800 سي سي ... يعني موتور تاني.
- بصراحه اول مره اسمع موضوع 2 انجيكشن دا!! و لما بصيت على الموتور ملاحظتش حاجه زي كدا.
- فتيس الجين تو فتيس جيد من انتاج لوتس و ملوش علاقه بميتسوبيشي خالص.. و على فكره الـ MIRAGE دي هيه اللانسر الامريكي.. و الفتيس الاوتوماتيك بتاعها من اسوأ الاوتوماتيك اللي ممكن تركبه في حياتك.. و هو ما لا ينطبق هلى الجين تو.
- موضوه ان الجين تو تجميع- مش صناعه- ماليزي شيء يجانبه الصواب لأن العربيه اصلا مش بتنتج ف يمكان تاني غير ماليزيا... ده غير ان لوتس مش مورد لبروتون!! لأ.. دي شركه مملوكه لبروتون.

بس ي النهايه فعلا عربيات روعه و محترمه و شكرا على الموضوع.

most of the engines in lotus cars are toyotas

اول ما قريت الموضوع كنت داخل اقولك كدا :)

م

البروتون موتورها تصميم من شركة لوتس ( مملوكة لشركة بروتون ) و تصنيع ماليزي
و أغلب السيارة تصنيع ماليزي و الكلام اللي بنسمعه في المعارض ده هجص في هجص ( آسف على التعبير )
لأنهم عارفين المصريين عندهم عقدة الياباني و الأوروبي فبيقولوا أي حاجة علشان يضحك بيها على الزبون
بالظبط زي ما بيقعد يقول العربيات الصيني مش عارف موتور منين و عفريت جالها منين ؟؟؟؟؟ ( ليس تقليل من الصيني ) و لكن إظهار بعض الحقائق
الميتسوبيشي عمرها ما تم تجميعها في مصر إطلاقا
و اللانسر اللي بتنزل مصر صناعة ياباني مائة في المائة بمواصفات مصرية
يعني لما حد يقول لانسر مصري أو خليجي -- لا يقصد بلد الصنع بل المواصفات و ضمان التوكيل
و ما شاء الله دولة ماليزيا دولة متقدمة صناعيا جدا
و هي في المركز الثالث عالميا في صناعة الإلكترونيات بعد اليابان و الولايات المتحدة
معلومة أخرى .........
أي سيارة غير مصنوعة 100 % في مصنعها !!!!!!!!!! يعني أي مصنع له حدود للصناعة من موتور و شاسيه و صاج
أو على حسب حجم المصنع و يتم توريد باقي قطع السيارة من مصانع أخرى ....... من نفس الدولة أو من خارج الدولة ......
يعني مثلا السيارة فورد ....... أو مرسيدس ...... يصنعون بالأساس الموتور و الشاسيه و ممكن الصاج و يتم توريد باقي قطع السيارة من مصانع مجاورة لهم -- و تسمى هذه الصناعة الصناعات المغذية )
زي ضفاير الكهرباء - البطارية - الكاوتش و الإطارات - عجلة القيادة ( الدريسكيون ) - الكراسي و الفرش - الزجاج الخاص بالأبواب و مقدمة و مؤخرة السيارة - الفيوز - الرادياتير - اللمبات و المصابيح الكهربائية -- و الكشافات الكهربائية - الكاسيت - التكييف - التابلوه -- عدادات السيارة ( سرعة و لفات موتور و حرارة و خلافه ) ........ الخ
و طبعا النسب دي بتختلف من مصنع لمصنع أخر حسب حجم المصنع و قوته و هذا طبعا راجع لعوامل إقتصادية
و أنا أعرف أن مصنع تويوتا و مصنع بيجو هما أكبر مصنعين متكاملين حول العالم
....................
و ألف شكر على الشرح الخاص بالسيارة و خصوصا موضوع استهلاك البنزين و السحب
مع إن السيارة لا تستهلك بنزين معايا أنا عملت 400 كيلو متر تقريبا و فولت من يومين و كان المؤشر عند الربع
بسم الله ما شاء الله على السيارة ( ممتازة ) و الحمد لله و أعتقد أنه كان قرار موفق بشرائها
هو اللي مظبوط موضوع السحب بتاعها ضعيف على موتور بالقوة دي و التسارع و يبدوا أن التوكيل أو المصنع بيوقف سرعة العربية علشان موضوع التليين .......... شكرا لهم على ذلك

شكرا أستاذ أحمد رضا على نقلك لهذا الموضوع