الموضوع: عاوز اتجوز.............. اة عاوز اتجوز فيها حاجة ؟؟؟

المشاركة الأصلية كتبت بواسطة a7med_pharma

كلنا هذا الرجل يا شريف
...........................
أديك عرفت اني حصل معايا نفس الموضوع..تقريبا بنفس التفاصيل
منا قولتلك قبل كده

.
عموما...
صعب تلاقي بنت تكون بتحبك ..عشان بتحبك
بتحبك عشان ظروفك ..عشان معاك عربيه ومعاك فلوس أو ... أو......
انت فاهمني بقا
تقريبا البنات همهم دلوقتي انها تتجوز واحد مستريح ...يريحها
ومعدش مراعي ظروف الشباب
وكل اب عاوز يجوز بنته..عاوز عريس بنته يبدأ من عند هوا ما إنتهى
يعني المطلوب تكون شاب ..وعندك وعندك وعندك ..وتجيب تجيب وتجيب

طيب نسرق يعني عشان نتجوز
بلاها جواز من اصله ..وأدينا قاعدين هنا في الإجتماعي بننعي حظنا



.
سلامي ليك يا اوكتوووو حبيبي
وشريف حبيبي

على فكرة مش كل البنات ومش كل الاهالي والكلام ده بجد وواقعي مش نظري يعني
في بنات فعلا مستعدة توافق على الجواز وتقنع اهلها حتى لو حد ظروفه مش سامحه انه يكون مستريح مادياً دلوقتي بس يقدر على الأقل إنه يدبر الاساسيات وعندها استعداد تكمل معاه وتساعده كمان بس ده في حالة انه يكون على خلق ودين ويكون بيحبها فعلا وعايز جواز واسرة واستقرار مش مجرد امتلاك لواحدة عاجباه او زوجة والسلام تخدمه وتخدم اهله وعياله او واحدة تصرف معاه في البيت (خد بالك في بنات ممكن تصرف في البيت لو لاقت ان جوزها مش قادر يسد لوحده فعلا وبدون ماتجرحه) لكن مش واحد جاي طمعان في مرتبها مثلا.
انا ليا واحدة صاحبتي اهلها طلبوا من عريسها طلبات تعجيزية عشان هما مكانوش عايزينه وكانوا بيطفشوه بس هي اتمسكت بيه (رغم ان مكنش فيه قصة حب قوية بينهم بس هي كانت شايفاه مناسب كأخلاق وطيبة وزوج يصونها) وهو برده جه على نفسه واتمسك بيها وجاب طلباتهم دي كلها (رغم انها من وجهة نظري مغالى فيها بعض الشئ ولما كانت بتحكيلي كنت بقولها بصراحة اهلك بيفتروا على الراجل ولو طفش يبقي عنده حق) وهما اتجوزوا حاليا وخلفوا بنوتة بس للأسف الشديد عايزة اقولك انهم مش عايشين حياة سعيدة وهما الاتنين مكتئبين من بعض بشدة وكل ماتكلمني تشكيلي همها وتكرهني في الجواز وتخليني احمد ربنا اني لسة متجوزتش وشيلت الهم اللي هي شايلاه ده.

اللي اقدر اقوله إن تجاربكم السابقة مش مقياس ابداً وبرده مش عشان اتقدملي اكتر من عريس وكان فيهم عيوب يبقي كل الشباب وحشين لأ دي دروس الواحد بيتعلم منها عشان يقدر يختار بمقاييس صحيحة وبإختصار امور الخطوبة والجواز دي نصيب وقدر وعمرها مابتيجي بالحسابات ابدا ولا عشان اتنين بيحبوا بعض يبقي لازم يتجوزوا لانهم ممكن ميكونوش مناسبين لبعض اصلا ولو اتجوزوا يكرهوا بعض كمان وياما ناس معاها فلوس ومش عايزين يتجوزوا وياما ناس بدأت من الصفر وبشقة إيجار جديد كمان وربنا كرمهم ووسع عليهم رزقهم والحياة مشيت.

وانا قلتها لأهلي وبقولها لكل الاهالي مفيش حاجة اسمها يأمن مستقبلها بالفلوس الست يوم ماتضيق بيها العيشة مع جوزها ومش عايزة تكمل معاه هاتبيع هدومها عشان تطلق منه مش بس هاتسيبله المؤخر.
وبرده نفس الحال بالنسبة للراجل لو مبقاش طايق يعيش مع مراته هايطلقها حتى لو صارف دم قلبه و معاه 10 عيال كمان يعني لا الفلوس ولا اي حاجة ممكن تخلي اي اتنين متجوزين يبقوا على بعض بجد الا المودة والرحمة اللي ربنا ذكرها في القرآن والعشرة الطيبة بين الزوجين.