الموضوع: معايا 70000 جنيه وعايز عربية أوتوماتيك وعاليه عن الأرض

اعتقد بروتون ساجا هى الاختيار المناسب

طب ممكن تقوللي إيه أهم مميزات البروتون ساجا وجزاك الله خيراً

المشاركة الأصلية كتبت بواسطة m_mohamed_74

إخواني: معايا 70000 جنيه وعايز أشتري عربية أوتوماتيك بس تكون عالية عن الأرض عشان تستحمل المطبات الجمييييييييييييييلة اللي عندنا فتنصحوني بإيه؟

لو عايز حاجه زيرو السعر يعتبر قليل على الاتوماتيك
لو عايز حاجه موتورها معقول و موفره جدا فى البنزين و الشنطة مش مهمه اوى معاك يبقى هيونداى i10 عربية جميله بفتيس يابانى من شركة Jatco و تقفيلها ممتاز و مش ضيقه من الداخل لو نزلت شوفتها هتلاحظ انها اوسع من الفيرنا و كل العربيات اللى فى فئتها زى السبارك و البيكانتو و الالتو و السيلاريو و ال 113..

الحمد لله العربية عامله معايا 10,350 كم و ما شاء الله محكتش معايا فى ولا مطب حتى الان و باخد المطب من اعلى جزء فيه مش بيهمنى و العربيات جنبى بتفضل تحسس عليه و فى منهم بيحكوا.. بطن العربية مرتفع عن الارض و مفيش اى جزء ساقط و ده اللى بيخليها متحكش.. انا معايا ماتريكس رغم كل علوها و قعدتها العاليه بتحك فى مطبات ال i10 مش بتحك فيها و ده حصل اكتر من مره فى كذا مطب لحد ما اتأكدت

عيوب العربية من وجهة نظرى:
العفشة ناشفه شويه بس انا ركبت كاوتشات اكبر مقاسها 175/70 R13 و بقت مريحه اكتر
الشنطة حجمها صغير فى الاول كانت زى الفل بالنسبة لى و شايف انها معقوله بس لما ركبت سماعتين على الرف ورا بقت حاجه مزعجه
التكييف عندى مش قوى اوى فى عز الحر لو ركنت فى الشمس وقت طويل و العربية مقفوله لازم تستنى شويه معرفش ده عيب عندى بسبب نفص الفيريون و انى لعبت فى غطاء الفيريون و هى جديدة لانى كنت فاكره مش مقفول كويس ولا ده بشكل عام!! و نسيت اقولهم فى الصيانة عليه بس اداء التكييف ممتاز لو العربية مش معبيه حراره من الركنة و سرعة المروحة جامده على 4 اعلى من الماتريكس و الهواء بيوصل للركاب اللى ورا بسهوله حتى على سرعة 2
مع تركيب الكاوتش الجديد استهلاك البنزين زاد و سحب العربية قل شويه علشان الكاوتش اعرض
الكراسى ناشفه شويه بس مش متعبه
عندى صوت تزييق فى الكرسى اليمين بس نسيت اقولهم فى الصيانة عليه بس دا امره سهل ممكن يكون مسمار مش مربوط
الكاسيت اللى بينزل فى العربية بيقطع ساعات لو الجو حر و السماعات مش حلوه بس دول كلهم يتغيروا بسهوله و من غير تكلفة
علامة هيونداى اللى على الدريكسيون ظهر عليها لون اسود معرفش من استخدام الملمعات و لا عيب فيها

مميزات العربية:
موفره جدا فى البنزين بسهوله بتعمل 300 كم فى الصفيحه و ممكن توصل 380 و اكتر فى الصفيحة فى السفر مع تشغيل التكييف.. اقل استهلاك معايا كان 260-280 كم فى الصفيحة سواقة فى الزحمه و حرق كتيير و تكييف شغال معظم الوقت
موتورها هادى جدا
عزل الصوت على الطريق السريع ممتاز على سرعة 80 و 100 من بداية 120 تبدأ تسمع صوت المكنة بس مش مزعجه اوى الكلام ده من غير كاسيت
الباور فيها كهرباء ممتاز و خفيف جدا و متماسك فى السرعات العاليه على سرعة 120 و اكتر لو سبت الدريكسيون تلاقيه حجر
الفرامل قويه جدا جدا
ثباتها جيد جدا يعنى على الطرق السريعة مفيش خوف من انك تمشى على 120 و 140 و تاخد ملفات كمان
بتستحمل السفر و المسافات الطويلة بدون مشاكل انا عملت بيها فى يوم واحد حوالى 250 كم مره واحده و من غير توقف و دايما بعمل فى حدود 100 و 200 كم فى اليوم من غير توقف
العربية من جوا شيك و خاماتها جيده جدا بالنسبة لسعرها و الفئة اللى بتنافس فيها
فرش العربية شيك جدا جدا و كراسيها شكلها رياضى و جميل
العربية عملت اكتر من 10,000 كم و مفيش اى مشاكل الحمد لله و معملتش اى حاجه فيها غير تغيير زيت و فلتر عند 6,400 كم و مربطش العفشة خالص و ما شاء الله العربية زى زيرو رغم انى اكلت بيها مطبات و بلاعات و حفر على سرعة 100 و 70... و العربية اترزعت اكتر من مره
و اكبر ميزه ان الحمد لله مفيش اى عيوب صناعه فى العربية لكن اللى قارفنى انى ركبت سنتر و انذار من هنا علشان كنت جايبها هاف اوبش و طبعا كل كام شهر السنتر يعلق.. انما الفول اوبشن فيها كل حاجه و مميزات كتيييير و كماليات كتيره جدا عن الهاف اوبشن

انا حطيت صورة فيها بطن العربية و هى مرفوعه

الافضل تحدد احتياجاتك
هل انت عايز عربية تشيل فيها حاجات كتيير (يبقى عايز سيدان)
عايز عربية موفره و موتورها صغير و لا مش فارقه معاك
عايز اريح عربية بغض النظر عن سعر اعادة البيع مهما كان قليل فى حاجات كتيير تحكم على اساسها

ربنا يوفقك للاختيار المناسب

بالسعر دة ممكن تجيب كورولا 2002 اتوماتيك عربية ممتازة و عالية عن الارض