الموضوع: إيه أكتر كائن بتخاف منه وانت سايق ؟

1-التريلات:و والله لو مش محمله وحمولتها خفيفه..بخاف منها لان السواق بيكون زى مقولتم مخدر وبيلاقى العربيه خفيفه وبيتصور نفسه راكب فيرارى حجمها ضخم حبتين..فبيطير..
لو محمله الحمد لله...بيلاقى العربيه تقيله معاها.فبيقول لنفسه ياعم البضاعه أغلى من البهوات اللى راكبين الملاكى.
2-ملاكى شباب..وانا منهم بس انا قصدى الغشم منهم ..متصور إن الغرزه دى شطاره وإنها مجرد تعديه بين عربيتين .وهى مش فن ولا حاجه..هى فكره ستر..مصلى العشا وربنا كارمك.حتعدى الغرزه..مبتصليش و مش فى دماغك الدنيا..حتعدى بردو..بس حتعدى هنا..فى الدنيا التانيه.

3-موتوسيكلات:أصله بيبقى ماشى على السريع و لا منه واخد أقصى اليمين ولا منه سايبلك الحاره عشان تعدى منها..بيبقى ماشى وواخد لنفسه حاره..وانت مش متصور انه واخد حاره..فاللى بيحصل إنى ممكن أتاخره كده شويه بالمرايه..وأقوله...(شويه كده والنبى يا أخ)

4- الميكروباص والنص نقل:دول سواسيه.لان للأسف عربياتهم بتبقى موديل حديث نوعا...بتكلم عن اللى على الطرق السريعه..فبيتصور نفسه انه من الممكن إنه يكون راكب عربيه زى ما الكابتن شوماخر بيبقى راكبها..وبيحاول إنه يعمل رقم جديد مسجله بإسمه..وتلاقيه فعلا بيطبق نظريات جديده زى الكبس خلف أسفل منتصف الهدف..مع إستخدام النور بما يعرف بإسم فن الترعيش..وماسك الكلاكس..فيسبب رهبه للهدف..تيجى تقوله براحه يا أسطى..يكون رده..:(إنى خايف على العربيه أكتر مانى خايف عليك يا باشا)..على أساس إنه مركب 14 فرده إستبن مثلا

5-المينى باصات..بما إنى مش من سكان العاصمه بس لما بنزل فى شارع السودان وبلاقى المينى باص بخاف من هذا الكائن الضخم اللى بيتحرك برشاقه الغزاله...و الاقى السواق بيلعب بيه بصوره غريبه.

6-ملاكى سواء ستات أو كبار سن:دول عارفين حجمهم الطبيعى فمحدش منهم بيحاول يتجعفر على حد.

7-أوتوبيسات..من خلال تعاملى مع هذه الفئه من الناس بقول إن سواق الأتوبيس من أكتر الناس خبره فى السواقه و معرفه بأصولها..بس من أقل الناس تطبيقا لها..

8-التاكسيات..زى مقال الزميل..ناس غلابه وإحنا ولاد......أهالينا اللى جايبين العربيات فلو إتخبطت من واحد منهم يقولك غلبان..وانتم حرام عليكم..و كأن مجرد إمتلاكك لعربيه خلاك جبار والعياذ بالله..

9-التوك توك:بيعدى مبين العربيات زحلقه كده..يعنى عادى إنه ممكن يحف فيك عادى جدا..مش حيشغل دماغه..انا كنت فى دفنه والد أحد الاصدقاء..خبطنى توك توك أول حاجه نزل و فإيده سكينه نص مرعبه.فهو ده نوعيه سائق التوك توك لو مكنش عيل.

العجل والبنى أدمين:سواسيه..لان مش من المنطقى إنك تقابله فى طريقك اساسا..
أحب أضيف الكلاب اللى بتطلع على السريع و بتتحول من وقت للتانى منتج جديد من اللحمه المفرومه..
اتمنى مكنش طولت ..وإن كنت طولت فعلا

اولاً الموضوع جامد والتعليقات أحلى وأحلى
نبدأ على بركه الله
- تريلات
لو محمله زلط يعتبر أكتر حاجه بتقلقنى جداً وإلى جرب طريق السويس الصحراوى هيقدر كلامى
تحس إنك دخلت الحرب وفى طلقات عشوائيه نحيتك وانت يا عينى عليك من غير حول ولا قوه
- أوتوبيسات
مش أوى بس فى الملفات او لما يحب ياخد الحاره إلى انا ماشى فيها فى الزحمه وتلاقينى بعند معاه مش عارف ليه

- ميني باص
عادى مش أوى

- ميكروباصات
مش عارف الواحد يبدأ منين مع الميكروباصات دى بس هى تستحق المرتبه التانيه بعد النقل التقيل

- نص نقل
حاجه كده زى ما يكون واحد طب عليك وانت مش عامل حسابك فى اى حاجه ويسيب الطريق كله ولازم يمشى وراك انت بالذات حتى لو انتم بس لوحديكم فى الطريق ... ممكن تكون حاجه نفسيه بالنسبلهم

- ملاكي (شباب)
عادى ويمكن لو انا كنت بفكر أعدى ..مش هعدى عشان ممكن يحسبنى بشد معاه ولا حاجه وسعاتها ممكن يلبس عربيه فى الرصيف ولا فى اى حاجه .
وفى ناس سوقتها حلوه بجد من الشباب لدرجه إنك ممكن تمشى وراه وتأمن انه مش هيلبسك فى المطبات ولا الحركات دى.

- ملاكي (كبار السن)
طبعاً ليهم إحترامهم ..بس فى ناس منهم بصراحه شغال بمبداً إنه ماشى لوحده فى الشارع
يعنى لو مسك الشمال مستحيل يسيبه ولو حصل ايه وممكن يفتكر فى آخر لحظه انه كان المفترض يدخل فى الشارع إلى فات ويضرب فرامل جامده ومش مهم إلى وراه أكيد

- ملاكي (ستات)
عشان منظلمش حد
هنقول نسبه كبيره منهم تبعد عنهم أحسن وخاصه لو عربيتهم جديده.تعرف على طول إنها لسه جديده فى السواقه

- تاكسيات
أكيد هبعد عنهم على طول حتى لو الطريق زحمه هدى إشاره وغير الحاره بتاعته.محافظه على وش عربيتى

- توك توك
حاجه كده ممكن تتوقع منها أى شئ ومهما تخيلت لن تصل لما يمتلكه هذا الكائن من حركات خاصه و أسلوب قياده ثورى

- موتسيكلات
لما يحب يعديك وانت ماشى على سرعه وتحس انه ممكن يطير لو عربيه تانيه عدد جنبيه أو لقا زلطه صغيره

- عجل
زى الموتوسيكل لما يقرب منى ويعدى من حته ماينفعش صرصار يعدى منها ويجرحلك العربيه من الجنب

- بني آدمين

بسيبهم يعملو كل إلى فى نفسهم
حتى لو حب يعدى الشارع مرتين عادى بسيبهم برده رغم إنى أعصابى بتفلت ساعات عليهم

غريبة دي .. يا ترى إيه الأسباب ؟؟

اصلى لسه مبتدىء
اللى جنبى هو اللى ساعات بيلهينى