الموضوع: لا احلى ولا اروع من مرور العجوزة

يا بختك .. انا في مرور العجوزة و بحاول اطلع رخصة و مش عارف و كل ده سايق من غير رخصة

كويس عقبال باقى وحدات المرور

المشاركة الأصلية كتبت بواسطة Hacker5

يوم السبت الساعة 9 صباحا توجهت انا و ابن عمتى الى مرور العجوزة لاستخراج رخصة قيادة خاصة له
و كان معانا جواب من رئيس مرور بين الصريات الى رئيس مرور العجوزة
و لما وصلنا المرور كان لسة الجو هادى و مافيش غير كام واحد فى المرور المهم روحنا اشترينا دوسيه و دخلنا لواحد معرفة جوا و خدنا الورقة بتاعت امتحان الاشارات و دخلنا لرئيس الوحدة و طلع راجل زوق جدا و بيحب يخدم يعنى المهم خد الورقة و دبس الصورة و راح خاتم على الورقة بالختم بتاعه و بعدين قالنا روح سلمها فى للعسكرى اللى واقف على باب الاشارات
و لما الساعة قاربت على العاشرة ابتدوا الشغل و قعدوا يندهو على الاسامى و كل اللى يدخل يمتحن الاشارات يخرج معيط و بيضرب كف على كف (دى اخرت اللى مايجبش واسطة )
و على 10:30 ندهو على ابن عمتى و دخل و بعد مرور 20 ثانية تقريبا لقيته خرج مبتسم و قالى الحمد لله ممتحنتش و الظابط خلانى امضى على الورقة و قالى اطلع برة عند الظابط معتز عشان يمتحنك
و روخنا بقى للظابط و قولناله احنا تبع عادل بية البنا رئيس الوحدة قالنا مافيش مشاكل بس تعالو بعد ساعة و نص و معاكو عربية ملاكى عشان فى مدرسة بتمتحن مكونة تقريبا من 18 شخص و كلهم شباب يتاوح سنهم بين 18 و 20
سيبت العربية جوا المرور و خرجنا برة عشان نفطر و نشربلنا حاجة و بعد 45 دقيقة رجعنا المرور و روحنا وقفنا عند منطقة الامتحان لقيت الظابط بيقولى طب هات قريبك و خليه يطلع بالعربية برا المرور
(حاجة سهلة اوى ) ههههه
روحت رايح مطلعها بين العربيات و جبتاهالة قدام الظابط و روحت نازل و ركب هوا و خرج بيها برا المرور يعنى مافيش 7 متر اتجاه امامى و بعدين خد يمينة عشان يطلع برا المرور و قاله بس يالا خد الورقة وروح خد رقم رخصة من شباك 8 اعتقد و بعدين اتصور و الحمدلله بعد نص ساعة كنا واخدين الرخصة و ماشين
اللى عاجبنى فى المرور دة ايه بقى؟
كل حاجة ماشية بنظام زاى ماشوفنا هههههههه
لوح جاهزة للسيارات الزيرو و سرعة التركيب و سرعة انتهاء الاجرائات
الموظفين و الظباط هناك فى منتهى الزوق
و يا بخت اللى المرور بتاعه العجوزة و انا الحمد لله واحد منهم لانى شوفت كذا مرور و العياذ بالله حاجة زاى الزفت و عقبال كل الوحدات اللى فى مصر
معلش وجعتلكو دمغكوا
سلام

نفس اللي حصلي النهاردة بالمللي ,كنت واخد معايا واحد خلصلي هوة كل حاجا و انا حتي ممسكتش الورق بتاعي ,كل اللي مسكتة النهاردة كان الرخصة
رحنا الساعة 12 و كان معايا جواب توصية من رئيس مرور xxxxx و واحد تاني مش حينفع اقوول اسمة
المهم دخلنا لرئيس مرور العجوزة راح مدبس مع ورقي جواب علية الختم بتاعة ,
بس رحت اشتريت مياة و ببسي و قعدت في العربية برة
الواد اللي جايبة كلمني تلت مرات
1 - رحنا للضابط سالني بتعرف تسوق قلتلة ايوة راح خاتم و كنت شايف الناس قدامي بتمتحت و تسقط و هيا بتسوق كويس
<ملحوظة انا فعلن بعرف اسوق كويس و بقاللي فترة بس كنت ماشي من غير رخصة>

2-رحت عشان امضي علي اختبار الاشارات و طبعا ممتحنتش

3-رحت عشان اتصور و قعدت جوة بعد متصورت 5 دقايق كان الواد جابها و خاتها و مشيت

مش عاوز اقولكم الناس كانت بتبوصلي ازاي في كل مرة من دول و انا بصراحة كنت متضايق و ضميري بيانبني و انا شايف ناس مستنية و فيهم بنات و ناس كبيرة. و اللي حصل النهاردة دة فعلن مش من اخلاقي و انا مكنش متصور ان الموضوع حيتم كدة
انا مش شايف انة مرور كويس زي الزميل مبيقول اذا كانت الواسطة و المحسوبية بتعمل فية كدة بس للاسف هوة دة الواقع اللي احنا عايشينة في اماكن كتيير دلوقتي

المشاركة الأصلية كتبت بواسطة مصراوي جدا

[SIZE=3][COLOR=blue]

لدرجة ان فيه جروب على الياهو كان واحد مصور فيه صورة كبيرة لقائد وحدة مرور العجوزة وبيقدم له الشكر وبيقول ان مش دايما الظباط فيه منهم شكاوي وان فيه ناس محترمة في البلد وتستحق الشكر والراجل ده فعلا بيحط مكتبه الخشب في الهواء الطلق بين الناس خارج غرفة المكتب وعلطول بيتابع تخليص ورق الناس وانا بنفسي شفت الكلام ده كتير

أنا برضه مرور العجوزة ... بجد والله ممتاز أوي فعلا

وفعلا أنا شوفت الظابط ( غالبا كان عميد مش فاكر الصراحة ) قاعد كدة على طرابيزة وبراقب كل الشبابيك وكل شوية يقوم ويتابع الناس ... وشوفته لما يلاقي أي حد مضايق يقوم ويتابع الموضوع بنفسه

طبعا انا متعاملتش معاه .... بس شوفت تعامل الناس هناك إزاي !

وبالمناسبة أقذر مرور شوفته في حياتي كان مرور الحوامدية ... بجد آية من آيات الإهمال والغباء المصري

ومرور الهرم كويس برضه ... أنا تعاملت معاه بعد مرور الحوامدية .... كنت حاسس بطفرة غير عادية

بس مرور العجوزة فعلا يكتسح !

إذاً كلمة السر عادل بيه البنا