مساء الفل ياجماعة غصب عنى التأخير
الشغل عندى كتيير اليومين دول
المهم نرجع لموضوعنا كنا وقفنا عند انى رجعت الشغل فى منطقة الغرقانة
المنطقة اللى فعلا وشها حلو عليا للمرة التانية لية بقا فيها
اتعرفت على أول حب فى حياتى وفيها عملت فلوس حلوة ومنها ابتديت
مشروع صغير .. مكتب رحلات على الشاطئ فى فندق تانى بس المره دى
فى شرم نفسها مش فى الغرقانة
المهم نرجع لاول حب فى حياتى اللى عمرى ما كنت بتخيل انى
أحب فى يوم من الايام لانى كنت عملى جدا
ومش حاطط موضوع العواطف فى دماغى
يعنى كنت مشروع مؤجل شوية لحد ما أربى إخواتى
و أجوز أختى وبعد كدا أفكر فى نفسى
المهم أول حب فى حياتى كانت واحدة أيطالية
أكبر منى ب 6 سنين لاء واية عندها عيلين كمان ولد وبنت
( اهو واحدة جاهزة بعيالها يعنى مش هنتعب فى خلفة ولا دياوله )
بس سبحان الله دا نصيب بقى
المهم التعارف معاها كان كالاتى
هى وبنتها جايين يسألوا على رحلة مركب وطبعا كالعادة بدئت أهزر
معاها وسألتها هى بنتك مخطوبة او حد عندها
boy friend قولتلها انا جاهز بعد 15 سنة
يدوب اكون عملت حاجة ( بنتها كانت 5 سنين )
طبعا ضحكت شوية وهزرت مع البنت
وخلاص نتقابل بكره على المركب
انا طالع معاكم علشان الجروب كبير كانوا 30 شخص
لحد كدا وانا مش فى دماغى اى حاجة واحدة عادية زى
اى واحدة بتيجى تحجز رحلة واليوم اللى بعديه
روحت خدهم من الفندق وطلعنا راس محمد بالمركب
وبدئت اشرح للناس الرحلة وهنقف فين والاكل الساعة كام ...
كل دا فى 10 دقايق وبقيت الرحلة بحاول انى اتكلم مع
كل زبون اذا كان عايز يعرف معلومة او يسأل عن اى
جاجة تانية زى رحلة تانية مثلا
المهم قعدت اتكلمت معاها شوية وهزرت مع أطفالها
وسبحان الله عجبتنى جدا وكملت بقيت الرحلة كلام معاها ...
طبعا كنت كل شوية أقوم أطمن على باقى الزباين
لو عايزين حاجة وارجع أكمل معاها لحد ما اليوم خلص
وسألتها اننا نتقابل نكلم كلامنا باليلل فى أى كوفى شوب
وخد نمرتها علشان علشان لو معرفناش نتقابل على الاقل نبعت لبعض رسايل
واتقابلنا فى نفس اليوم باليلل وقعدنا اتكلمنا من 8 بالليل الى 4 صباحا
طبعا العيال كانت نامت مننا واحنا مش واخدين بالنا خالص
حكينا لبعض كل حاجة عن حياتنا الشخصية وفعلا بعدها
حسيت انى قريب منها جدا بس عمال أقول لنفسى
دى اكبر من ب 6 سنين ومطلقة وأجنبيىة ومعاها طفلين
يعنى هيا دى اللى تقع فيها من الملايين اللى بيجوا شرم كل سنة
اهو كلة نصيب ومحدش عارف الخير فين ومكنتش عارف ان الليلة
دى ممكن تغير مصير حياتى وتودينى لبلد تانية و.....
و إلى اللقاء فى حلقة قادمة
المفضلات