مين موافق معايا انه يسيب القاهره و يعيش فى محافظة تانية

**mahmoud_magdy** · 30-12-2009 06:24 PM

طبعا كلامكو كله جميل
بس الحقيقه يمكن تكون مختلفه شويه ( الكلام للقاهريين خصوصا)
انا كنت عايش في القاهره (شبرا) ونقلت العاشر من رمضان
وارتباطاتي كلها في القاهره
ولما بعد في العاشر شويه بزهق
بزهق من الهدوء القاتل والصمت اللي مبينطقش خالص
وبحن اوي لحياة القاهره
حركه ونشاط وانوار وناس بتقدر تشوفهم
هنا ان شفت بني ادم بعد الساعه 10 حواليك تبقى معجزه
وبستمتع بالهدوء لما اعد في الفاهره يومين ثلاثه
المدن الجديده نضافه وهدوء وراحة بال
القاهره حياتها بالنسبالي لا يساويها اي مكان بل على العكس

**bmya** · 30-12-2009 06:41 PM

انا بحاول قدر الامكان مروحش القاهره خاااااااااااالص انا قعدت فيها سنه ونص تقريبا ايام مكونت شغال فيها للاسف كان بيجيلي اكتئاب اول منزل من البيت واشوف الزحمه والقرف ده وانزل قبل الشغل ب ساعتين عشان اعرف اروح في الميعاد وسواء مواصلات او بالعربيه كلهم انيل من بعض
لحد ما سيبت الشغل وقعدت في بيتنا تاني ياااااااااااااااه راحه ما بعده راحه اركن عربيتي براحتي اتمشه براحتي(بس طبعا قعدت البيت هممممممممم ما يتلم) ربنا يكرم واشتغل تاني بس ميكونش في القاهره اللي اسم على مسمى فعلا القاهره بس علينا احنا بس

**mada121977** · 30-12-2009 08:43 PM

طيب انا شغال فى القاهره دى بقالى 11 سنه والسكن فى المنصوره يعنى 11 سنه دول سفر على الطريق.. ومافكرتش ولو للحظه انى اسكن فيها ابداا علشان اللى بشوفه فيها من فوضى وقله ادب وبلطجه ...الخ , هو طبعا كل السلبيات دى موجوده فى كل مكان داخل مصر بس فى القاهره العمليه زايده كتير عن باقى المحافظات , وبعد مابدأت اتعب من السفر المستمر بدأت افكر فى البدائل لقيت افضل حل هو مدينه 6 اكتوبر .. فيها مميزات وعيوب بالنسبه لى ولكن مميزاتها اكثر من عيوبها ؛ واتمنى من الله ان تكون الاختيار الصحيح والصواب

**تامر.محمد** · 30-12-2009 09:03 PM

و الله انا مولود في القاهرة و عايش فيها
بدأت ازهق من الزحام المستمر بصراحة و التعب الزايد عن حده في اي مشوار لأي حتة

بس رابطني بيها شغلي

**wael3m** · 31-12-2009 09:36 AM

أبويا بقى كان أجدع منكم كلكم
فى سنة ٨٦ أخدنا وروحنا عشنا فى المحلة
أنا فعلا بكره القاهرة بسبب الزحمة وبحاول لما أكون فى أجازة
أنزل بعد ١٢ بالليل علشان اتمشى شوية
فعلا العيب فى شوية المتخلفين اللى بيحكمونا
لو يوزعوا الصناعات والشغل على مدن
خارج القاهرة يكون أفضل
وياريت يكون من الساحل الشمالى الى ليبيا ...
المنطقة هناك فاضية وقريبة من أوروبا ودول المغرب العربي وغرب أفريقيا

وتتعمل منطقة تانية بعد العين السخنة علشان تبقى قريبة لدول الخليج / آسيا
بس تقول ايه فى البهايم اللى بيخططوا!!!
اللى عايزين كل حاجة قريبة من القاهرة ...
والله لو عملوا كدا لتشوف احلى فراغ واحلى توزيع سكانى فى مصر

**mahmoud_magdy** · 31-12-2009 02:28 PM

المشاركة الأصلية كتبت بواسطة ahmed0nouh

صدقنى يا محمود والله والله علشان انت بس مش قاعد فيها على طول وبتنزل مجرد اجازات كدا على الماشى

انا قعدت فى العاشر كام شهر وبتردد عليها كتير قوى وقعدت عمرى كله فى القاهره , العاشر اه ممله واه ملهاش طعم واه مفيهاش حتى مكان تغير جو فيه بس الهدوء والفضا والشوارع النضيفه واماكن الركنه السهله والشجر وانعدام الزحمه فى كل حاجه نعمه نعمه بجد وبتقلب حياتك

انا فى العاشر ببقى هااااااادى جدا فى حين اول ما بوصل السلام بيركبنى عفاريت القاهره تانى , واذا كان على الخروج من العاشر ساعه تبقى فى قلب المحروقه

انا كنت عايش في القاهره برده
وكمان في حي شعبي جدااااا
برغم ازدحام القاهره الا انها عشقي الاول وحلمي اني ارجع اسكن فيها تاني برغم كل ما فيها من مساوئ وسلبيات
بحب في حركتها ونشاطها بتفاعل معاها وببقى في كامل نشاطي وانا هناك
انما العاشر هنا بتحس انك عاوز تكون طول النهارو الليل نايم وفي حالة خمول وكسل
الرفاهيات هنا الانترنت والنادي لو تعرف فيه حد وشوية كافيهات وكام مطعم لو حبيت تغير جو
غير كدا بقى العبور قريبه وفيها مول
والشروق هيفتحوا فيها حاجه قريب
العاشر للاسف مدينه مجهوله ومحدش مهتم بيها برغم عدد السكان الكبير اللي موجود فيها
واظن انها اول مدينه جديده تنشأ على ارض الواقع
وبرغم كدا مفيهاش اي وسيله ترفيهيه زي بقية المدن
وتنور العاشر طبعاااا ومتنساش اما تيجي بقى تقولي علشان اعرفك على المدينه (على اد معرفتي يعني)