السلام عليكم ورحمة الله وبركاته ،
أنا بدأت تعلم قيادة السيارات يوم 8 ديسمبر 2007 على سيارتى الجديدة الكيا سبكترا 2003 ، والحمد لله بعد حوالى 4 ساعات تعليم أستطيع الآن قيادة السيارة بمفردى وحاليا أتدرب عليها ، ولكن النهاردة اكتشفت حاجة غلط فى سواقتى ، والحقيقة أنا مش مبسوط لان الغلطة دى خطيرة جدا .
النهاردة كنت ماشى على الاوستراد وكنت عايز أغير طريقى من اتجاه الى الاتجاه المعاكس ، وقفت بالسيارة عند فتحة الاتجاه المعاكس وكانت رجلى على الدبرياج وعلى الفرامل ، ولما لقيت مافيش سيارات جاية من الناحية الاخرى حاولت أترك الفرامل وأروح برجلى على البنزين ، فى اللحظة اللى كنت بأسيب فيها الفرامل لقيت العربية بترجع للخلف ، مع العلم ان السيارة على الغيار الاولانى ، طبعا دوست فرامل مرة أخرى والعربية بطلت منى ، مسكت فرامل بقوة ودورت الموتور واتحركت بالعربية ، ازاى معرفش ، ومش فاكر أنا عملت ايه بالضبط ، والله دى حقيقة ، المهم انى اتخلصت من الموقف الخطير ده خاصة ان فى سيارات خلفى وأخرى جاية من الاتجاه المعاكس ، المهم ربنا ستر .
والله انا عندى سؤالين :
السؤال الاول :
ايه اللى انا عملته غلط عشان العربية ترجع للخلف مع انها كانت على الغيار الاولانى ، هل فى حاجة غير انى سبت الدبرياج ؟
السؤال الثانى المهم :
لما أكون عايز أدخل من اتجاه الى اتجاه معاكس ، والعربية فى حالة وقوف تام ، ماهو التصرف السليم والآمن لى ولسيارتى ؟
أرجو الرد من أصحاب الخبرة بقيادة السيارات المانوال .
مع جزيل الشكر والاحترام .