السلام عليكم ورحمة الله وبركاته......
احب اولا ان اوضح شيء ان تقييمي هذا ليس بتقييم خبير ولكنه تقييم شخص مستهلك للسيارة لذلك فهو يحتمل الخطأ والصواب.
البداية في يوم 12-5-2008 تم بيع السيارة اللانسر ال2007 المزودة بناقل حركة cvt وده الفتيس اللى انا اتعلمت عليه السواقة علما بأنني لم اقود سيارة مزودة بفتيس مانيوال قط .
قبل البيع بأيام كنت احاول ان اقنع والدي بالسيفيك او الجيتا ولكنه كان ميال للسيفيك اكثر وفي نفس الوقت كنت انا ووالدي متفقين ان انخفاض السيفيك من الأرض سيسبب مشكلة لنا بناء علي تجربتنا باللانسر....ونحن بعادتنا نحب السيارة المرتفعة عن الأرض.
وعند مساء هذا اليوم تم حسم قرار والدي بشراء الكورولا بناء علي نصيحة احد اصدقائه لما فيها من اوبشن زي الرز وسعرها المناسب اذا قورن بسيارة اوروبية بنفس الفئة زي الفيكترا او الأوكتافيا او الجيتا.
ومرت الأحداث سريعا حتي وصلنا الى المعرض وكان صديق والدي معه سيارة استرا 2007 مزودة بناقل حركة أيزي ترونيك عندما نظر الى الفتيس سأل مسئول المبيعات هو ده ايزي ترونيك فرد رجل المبيعات(لاحظ بداية الفشل في التسويق) :لأ ده احدث من الأيزي ترونيك وكمان دي احدث تكنولوجيا منزلاها تويوتا....(هذا هو الموقف الأول مع مسئول المبيعات).
ثم تم دفع الفلوس(165000ج علشان تسليم فوري زي اللى بيحصل في الأوتوماتيك دلوقتي) وبالتالي ذهب مسئول المبيعات ليخرج السيارة من المعرض وهنا المفاجئة ....عند ركنه السيارة امام المعرض سمعت صوتا غريبا(انه صوت الغيارات)فقلت له :هو ايه الصوت ده يا بشمهندس قالى اصل الفتيس ده علي تروس وبرده انا مش فاهم حاجة قلت في نفسي طب ما انا راكب اوتوماتيك ومعنديش الصوت ده اشمعني الفتيس ده بيعمل كده وبعد كده ركبت العربية الاقي الغيارات كلها بحس بيها وجامد جدا كمان كأني راكب جمل قلت هي ايه تكنولوجيا الجمال اللى منزلاها تويوتا في الفتيس ده طب ما انا كنت راكب اوتوماتيك برده زيرو بس مافيش الكلام ده ومع الوقت ابتديت الغيار تبقي افضل شوية في موضوع السلاسة بس الغيار بيتأخر في الأستجابة والعربية سحبها غير مرضي او غير مناسب وشوية الاقي العربية بتكركر علشان واخدة الغيار بدري اوي وشوية الاقي الأربي ام علي وطبعا كل حاجة تحصل اقارنها بالأوتوماتيك العادي.
طبعا السحب علي الوضع الأقتصاديE مكنش عاجبني فبقيت علي طول اسوق علي الوضع Es الوضع الرياضي السحب بتاعه فظيع جدا واتعودت علي كده لمسافة 20000ك او اقل بقليل لغاية في يوم من الأيام وانا نازل من علي كوبري الجلاء اللى في صلاح سالم ليلا حدثت الطامة الكبري بدوس علي دواسة البنزين كأني بدوس علي الهوا مافيش استجابة خالص الفتيس علق يا نهار ابيض اعمل ايه ده الدنيا ليل ولا حد هيعبرني .
ركنت علي جنب بقوة الدفع الذاتي للعربية والحمد لله كان الطريق فاضي واحاول احرك الفتيس يمين وشمال علشان يستجيب ولا الهوا بطلت العربية واتصلت بواحد صاحبي قالى هو اللمبة بتاعت الموتور منورة (احتمال يكون احد السيور انقطع) قلتله لأ قالى طب استني شوية وبعد كده دور العربية تاني عملت كده ودورت الحمد لله الفتيس اشتغل بس طبعا بقيت ماشي خايف لحسن يحصل كده تاني.
تاني يوم علي طول روحت التوكيل كان اخر يوم قبل عيد الأضحي دخلت لمهندس الصيانة قالى سيب العربية وتعالى خدها بعد العيد سيبته ودخلت لمدير الصيانة سألني قالى اللمبة الصفرا نورت واسئلة من دي المهم راح مطلع معايا شاب فني معاه جهاز كشف الأعطال ووصله بالكمبيوتر وقالى الفتيس دلوقتي مافيهوش حاجة وتعالى بعد العيد.
فماذا حدث بعد العيد !!!!