هام جدا عند تعطل في دائرة الشحن.

**hassanmm** · 13-01-2010 10:05 PM

إذا تعطلت دائرة الشحن ونورت لمبة الشحن في التابلوه... وأنا على طريق السفر.. كم كيلو متر تقريبا يمكن أن تسيرها السيارة وهي تسير على طاقة البطارية فقط ؟

**mr_sameh** · 14-01-2010 12:30 AM

سؤال مهم جدا بس اعتقد باليل غير النهار

**reamoz** · 14-01-2010 12:26 PM

على حسب العربية مش كله زي بعضة
يعني العربيات الإنجكشن بتستهلك كهرباء أكتر من الكربراتير علشان طرمبة البنزين كهرباء
عموما لو حصل الموضوع ده العربية هتمشي إن شاء الله لو البطارية حالتها كويسه حوالي 100 كم تقريباً
بس لازم يراعى عدم إستخدام أنوار الكشافات الأمامية إلا للضرورة والمشي بسرعة 90 إلى 100 كم علشان الموتور مسيسخنش بصورة كبيرة تخلي مروحة التبريد تشتغل كتير ويعتمد على الهواء بصورة كبيرة في الحفاظ على درجة حرارة الموتور وطبعا عدم تشغيل التكييف والكاسيت
انا الموضوع ده حصل معايا مرة كنت راجع من ليبيا وكان معايا عربية سيينا 1600 والدينامو قطع شحن قبل الحدود بحوالي 400كم طبعا أول مااللمبة نورت نزلت بصيت على سير الدينامو لقيته سليم فامشيت لحد أول مدينة ودورت على كهربائي وقيست الشحن علشان اشوف أيه الأخبار لقيت مافيش شحن من الدينامو وطبعا هناك انا معرفش الصنايعية كويسين ولا لأ وكمان العربية دي مش موجودة هناك أصلا فا مش هلاقي ليها أي قطع غيار
المهم خليت الكهربائي يشحنهالي على التونجر نص ساعة على الشحن السريع
وتوكلت على الله مشيت بتاع 150كم لحد ماوصلت مدينة تانية قضيت اليلة فيها علشان كانت الدنيا ضلمت وهناك مفيش حاجة إسمها عواميد نور على الطرق والصبح شحنت البطارية بتاع ساعة ونص تاني ومشيت حوالي 100كم وبعدين شحنت تاني وهكذا لحد ماوصلت لمطروح ودي كانت عربية الشركة ماإتصلت بيهم بعتولي سواق بعربية تانية قابلني في مطروح وسيبته يعيش بقى عند كهربائي في مطروح ومشيت انا بالعربية التانيه

**ahmed_h_g** · 14-01-2010 09:29 PM

يعنى البطاريه ال50 أمبير تمشى العربيه الأنجكشن كام كيلو بالنهار ؟

**caysersosaih** · 15-01-2010 06:49 PM

شكرا ومتابع باهتمام

**reamoz** · 17-01-2010 10:20 AM

المشاركة الأصلية كتبت بواسطة ahmed_h_g

يعنى البطاريه ال50 أمبير تمشى العربيه الأنجكشن كام كيلو بالنهار ؟

بناء على التجربة اللي حكيتها
بإذن الله ممكن نقول 100كم تقريباً

**reamoz** · 17-01-2010 10:21 AM

المشاركة الأصلية كتبت بواسطة hassanmm

شكرا جزيلا يا سيد reamoz على الإهتمام والرد السريع وعلى شرح تجربتك بالتفصيل .
جزاك الله كل خير.....................

وجزاك خيراً إن شاء الله
إحنا هنا علشان نستفاد من خبرة بعضنا

**reamoz** · 17-01-2010 10:26 AM

نسيت أقول كمان إن عربيتي الحالية (فورد فيستا) عملت كدة معايا بردة من فترة وكان باليل بس الحمد لله كان فاضلي 25كم فقط للبيت وصلت وركنتها وتاني يوم الصبح رحت للكهربائي لقى الشربون كان خلصان ركبلي شربون جديد وغيرلي البلي والسير بالمرة وخليت السير القديم معايا إحتياطي